“মহাক্কী মখূৎনা অফবা থবক তৌদুনা অৱাৎপা লৈবা মীদা মতেং পীবা ঙম্নবা থবক কন্না শূসনু।”—এফিসা ৪:২৮.

ঐখোয়বু শেম্বীরিবা মপুনা ঐখোয়বু শু-নোম্বা কনবা মীশকশিং ওইহন্নিংই। মরমদি শু-নোম্বা কনবা মীওই অমনা নুংঙাইনা হিংবা ঙমই। অদুগা মহাক্না মশাগী অমসুং মহাক্কী ইমুং মনুংগী দরকার ওইবশিংসু পীবা ঙমই। অদুদসু নত্তনা কনাগুম্বগী দরকার ওইবশিংদসু মতেং পাংবা ঙমই। মহাক্না থবক ফজনা তৌবা মরম্না থবক মফমদসু মথক থোংবশিংনা য়াবা ওইগনি অদুগা মাগী থবক্তসু অকায়বা লৈরোই। মীওই অমনা শু-নোম্বগী ফংজবা মহৈ অদু “ঈশ্বরগী খূদোন্নি” হায়না বাইবলদসু চপ চানা পল্লম্মী।—পাউ শন্দোকপা ৩:১৩.

“ঐখোয়না হীরম পূম্নমক্তা পূকচেন শেংনা লৈনীংবগী অফবা অচুম অরান খঙবা পূক্নীং লৈ হায়বা ঐখোয়না চেৎনা থাজৈ।”—হিব্রু ১৩:১৮.

ঐখোয় পুকচেল শেংবা মীশক ওইরবদি করিগুম্বা মখল অমত্তগী অকিবা লৈরোই। পুক্নীং শান্তি ফংগনি। অদুগা ফজনা পোত্থাবা অমসুং অহিং নুংঙাইনা তুম্বা ফংগনি। অদুগীসু মথক্তা অতোপ্পশিংনা ঐখোয়বু থাজগনি অমসুং ইকায়খুম্নগনি। অদুবু পুকচেল শেংদবা মীশক অমগীদি হায়রিবশিংসি ফংলরোই। মহাক্কী পুক্নীংদা মহাক্না তৌরুবা পুকচেল শেংদবগী থবক কয়াদু কনাগুম্বনা খঙলক্কদ্রা হায়বগী মতমচুপ্পদা অকিবা লৈগনি। মরম অসিনা মহাক্না কৈদৌঙৈদসু পুক্নীং শান্তি ফংদে।

“নখোয়গী নচৎ নতৌদা শেন্থুম করামদবা ওইসনু। নখোয়গী লৈজরিবা অদুদা পেনবা ওইয়ু।”—হিব্রু ১৩:৫.

ঐখোয় খুদিংমক্না হিংনবা, চান-থক্নবা অমসুং অতৈ দরকার ওইবশিং ফংনবগীদমক পৈশা দরকার ওই। অদুম ওইনমক ‘শেন্থুমদা করাম্বা’ হায়বসিদি খুদোংথীনিংঙাইনি। মরমদি পৈশা য়াম্না পাম্বা মীশক অমনা মহাক্কী লৈজবা মতম অমসুং পাঙ্গল পুম্নমক পৈশা তান্নবগীদমক শীজিন্নখিবা য়াই। মদুনা মরম ওইরগা মহাক্না মহাক্কী মপুরোইবা নত্ত্রগা নুপীদা অমসুং অঙাংশিংদা মতম পীবা ঙমদবদগী ইমুং কায়রকপা য়াই। অদুগা হকচাংসু শোকলকপা য়াই। (১ তীমোথি ৬:৯, ১০) অদুগীসু মথক্তা পৈশা য়াম্না তান্নবগীদমক মহাক পুকচেল শেংদবা মীশক ওইরকপা য়াই। মসিগা চান্ননা লৌশিং লৈবা মীওই অমনা অসুম্না ইরম্মী: “থাজবা য়াবা মীদি বোর মরাং কায়না ফংজগনি, অদুবু থুনা ইনাক খুন্নিংবা মহাক্তি চৈরাক পীদবা তৌরোই।”—পাউরৌ ২৮:২০.

“অফবা লৌশিং অমসুং শিংনা চৎপা ঙাকউ।”—পাউরৌ ৩:২১.

ফজনা মহৈ মশিং তম্বনা মথৌদাং খঙবা মীশক অমা ওইবা অমসুং অফবা মমা মপা ওইবা ঙমহল্লি। অদুবু স্কুল, কোলেজতগী ফংলকপা মহৈ মশিংদু খক্তনা ঐখোয়গী পুন্সি লোম্বা নাইদনা নুংঙাইনা লৈবা ঙমহনগনি হায়বদি চপ চানা হায়বা ঙমদে। পুন্সিগী তাঙ্কক খুদিংমক্তা তশেংনা মায়পাকপা মীশক অমা ওইনবগীদমক ঐখোয়না ঈশ্বরনা তাকপী তম্বীবশিং ইঞ্জবা দরকার ওই। ঈশ্বরনা হায়বা তাজবা মীওইশিংগী মরমদা বাইবলনা অসুম্না হায়: “মহাক্না তৌবা খুদিংমক্তা মহৈ য়াল্লি।”—থাগৎ ঈশৈ ১:১-৩.