KATAK KO KÕN TAITÕL̦IN BOK IN
Wõn Rein Ri Kõnnaan ro an Jeova?
“Mike ej juon iaan Ri Kõnnaan ro an Jeova im eto aõ jel̦ã kajjien. Bõtab, ijjab mel̦el̦e kõn tõmak ko an kabuñ in an. Wõn in Jeova? Etke kabuñ in ejjab tõmak ilo holiday ko? Iba ebõd kumi in Mike ekobal̦o̦k ippãer.”—Becky, jãn California, U.S.A.
“Ke jet iaan armej ro rej jokwe iturũ rar jino katak Baibõl̦ ippãn Ri Kõnnaan ro an Jeova, ikõn l̦õmn̦ak im ba: ‘Ta mel̦el̦ein ãt in, Ri Kõnnaan ro an Jeova? Ãinwõt ekõjak ãt in ñan etan kabuñ!’”—Zenon, jãn Ontario, Canada.
“Kõm̦ro kõrã eo ippa ekõn l̦õmn̦ak bwe unin an Ri Kõnnaan ro an Jeova lotok kõm ej ñan kõm̦m̦an bwe en nana am̦ro mour kõn am̦ro jab etal im jar. Kõm̦ro ar l̦õmn̦ak bwe el̦aññe kabuñ eo am̦ro ar jab lukkuun jipañ kõm im uwaaki kajjitõk ko am, eokwe ejjel̦o̦k bar juon kabuñ emaroñ jipañ, ekitibuj Ri Kõnnaan ro an Jeova.”—Kent, jãn Washington, U.S.A.
“Ilo m̦ool, ikar jaje kõn kabuñ in, Ri Kõnnaan ro an Jeova im kõn men ko rej tõmaki.”—Cecilie, jãn Esbjerg, Denmark.
Joñan in ekkã am̦ lo an rein itoitak im kwal̦o̦k naan ilo m̦õko im̦õn armej im ilo̦bwilej. Bõlen kwõj loe aer ajej an armej bokin riit im kajjitõk ippãn jabdewõt ñe ekõn̦aan katak Baibõl̦. Bõlen juon iaaer ekar lewaj bok in ñan kwe. Meñe ãindein, ak kwõmaroñ kõn̦aan jel̦ãl̦o̦k wõt kõn Ri Kõnnaan ro an Jeova. Bõlen kwaar bar bõk ejja l̦õmn̦ak ko wõt an armej ro kar kwal̦o̦k kake itulõñ.
Ia eo kwõmaroñ bõk mel̦el̦e ie el̦aññe ewõr am̦ kajjitõk ak ewõr men en̦ kwõj abn̦õn̦õ kake kõn Ri Kõnnaan ro an Jeova? Elemen am̦ maroñ jel̦ã kõn tõmak ko aer? Jããn in jipañ ko aer me rej rejetake jerbalin kwal̦o̦k naan im ñan kalõk im̦õn kweilo̦k ko aer rej itok jãn ia? Etke rej lowaj eok ñan m̦weo im̦õm̦ im kepaak eok ilo jabdewõt jikin rej iioon eok ie?
Kõrã eo ilo pãrokõrããp ko m̦oktal̦o̦k etan Cecilie ej ba, “Elõñ mel̦el̦e ko iar riiti kõn Ri Kõnnaan ro an Jeova ilo Internet. Ewõr jet men iar roñ kõn rein im ear l̦ap aõ kar roñjake an armej kar kananaik er. Kõn men in, ear jab em̦m̦an aõ l̦õmn̦ak kõn Ri Kõnnaan ro an Jeova.” Bõtab tokãlik, ear make kõnono ippãn jet iaan Ri Kõnnaan ro an Jeova im ear lo lukkuun uwaakin aolep kajjitõk ko an.
Kokõn̦aan ke jel̦ã uwaak ko rejejjet ñan kajjitõk ko am̦ kõn Ri Kõnnaan ro an Jeova? Eokwe, jouj im kepaake Ri Kõnnaan ro an Jeova, rein me rar kõm̦m̦ane bok in. (Jabõn Kõnnaan 14:15) Kõmij tõmak im kõjatdikdik bwe katak ko tok jet renaaj jipañ eok ñan jel̦ã wõn kõm, ta ko kõmij tõmak kaki, im ñan mel̦el̦e kõn jerbal ko kõmij kõm̦m̦ani.
