ÑE KWÕN kar iioone Diana, kwõn kar kile bwe ej juon jiroñ eo emãlõtlõt, ejouj, im em̦m̦an ippãn bwebwenato ippãn armej ro jet. * (Lale kõmel̦el̦e eo itulal̦.) Meñe Diana ej juon eo me jen kar l̦õmn̦ak bwe em̦õn̦õn̦õ, ak enañin aolep iien elukkuun bũrom̦õj itulowa im ej l̦õmn̦ak bwe ej juon eo me ejjel̦o̦k tokjãn. Ej ba: “Aolep raan ikõn̦aan mej. Ij lukkuun tõmak bwe lal̦ in enaaj juon jikin em̦m̦anl̦o̦k ñe ijako.”

Diana ear ba bwe eban m̦an e make. Bõtab, jet iien, ejjab lo unin an mour. Ej ba: “Men eo el̦aptata aõ kõn̦aan ej bwe en wal̦o̦k juon jorrããn ilo jidimkij bwe in mej. Men in mej em̦õj an oktak im juon men em̦m̦an ippa, im ejjab juon men ij dike.”

Elõñ armej rej bar bõk ejja l̦õmn̦ak kein wõt an Diana, im jet iaaer em̦õj aer kar kajjioñ m̦an er make. Elõñ etale ko kar kõm̦m̦ani im kar loe bwe elõñ iaan rein me rar kajjioñ m̦an er make rejjab lukkuun kõn̦aan m̦an er make. Bõtab, unin aer kajjioñ m̦an er make ej kõnke rekõn̦aan kakkije jãn aer eñtaan. Armej rein rej l̦õmn̦ak bwe ewõr unin aer mej. Men eo rej aikuj kile in ej bwe ewõr unin aer mour.

Ewõr ke unin ad mour? Jen etale jilu un ko unin ad mour.