JÃN kar 1992 eo, Kumi eo Ej Lale Aolep Eklejia ko an Ri Kõnnaan ro an Jeova rar kããlõt jet em̦m̦aan ro rej lale eklejia me ekajoor tõmak eo aer bwe ren jipañ katõprak jerbal ko an kamiti ko. * (Lale kõmel̦el̦e eo itulal̦.) Rijjipañ rein me rej uwaan ‘jiip ro jet’ el̦ap aer jipañ im rejetake Kumi eo Ej Lale Aolep Eklejia ko an Ri Kõnnaan ro an Jeova ilo jerbal ko aer. (Jon 10:16) Kajjojo wiik, rijjipañ rein rej pãd ilo kweilo̦k ko an kamiti eo me rej jipañ ie. Jerbal eo aer ej ñan lel̦o̦k mel̦el̦e ko jet im kõl ko jet me rem̦m̦an ñan Kumi eo Ej Lale Aolep Eklejia ko an Ri Kõnnaan ro an Jeova. Im kumi in rej kõm̦m̦ani pepe ko, im ej kun̦aan rijjipañ ro ñan lale bwe kamiti ko ren l̦oore pepe ko aer. Rijjipañ rein repojak im rem̦õn̦õn̦õ in kõm̦m̦ane jabdewõt jerbal rej lel̦o̦k ñan er. Ñe juon uwaan Kumi eo Ej Lale Aolep Eklejia ko an Ri Kõnnaan ro an Jeova ej etal ñan jikin ko jet im kõm̦m̦ane kweilo̦k ko rel̦l̦ap ie, juon iaan rijjipañ rein ej etal ippãnl̦o̦k. Remaroñ bar jilkinl̦o̦k rijjipañ rein bwe ren lol̦o̦k ra ko jet im rej etal ikijjeen ra eo el̦ap ilo New York.

Juon jeid im jatid em̦m̦aan me eto an rijjipañ jãn kar iiõ eo 1992 ej ba, “Ñe ij kõm̦m̦ani jerbal ko rej litok ñan ña, men in ejipañ Kumi eo Ej Lale Aolep Eklejia ko an Ri Kõnnaan ro an Jeova bwe ren poub wõt ilo jerbal ko jet aer raorõk.” Bar juon jeid im jatid em̦m̦aan me eto an jipañ rein ium̦win 20 iiõ ej ba, “Ejjel̦o̦k bar juon jeraam̦m̦an el̦apl̦o̦k jãn men in.”

Kumi eo Ej Lale Aolep Eklejia ko an Ri Kõnnaan ro an Jeova rej lel̦o̦k el̦ap eddo ñan rijjipañ rein im el̦ap aer kam̦m̦oolol er kõn aer kate er im niknik ilo jerbal ko aer. Kõn men in, kõj aolep jen kaorõk em̦m̦aan ro ãinwõt rein.​—Pilippai 2:29.