Ningacita Uli Pakuti Nzane Ukupepa Kwa Cumi?
Vino Baibo yalandapo
Pa kulangilila upusano uwaya pali yano yaya mukupepa kwa cumi na yano yaya mukupepa kwa ufi Baibo ikati: “Mulayamanyila ku milimo yao. Uzye antu yakakulula matingi ku munga, nanti masamvu kuli nkololwe?” (Mateo 7:16) Wakwe vivi kwene vino mungapusanya matingi uku cimpuza lino mwalola ivisekwa vyakweo, avino mungapusanya nu kupepa kwa cumi nu kwa ufi ku visekwa vyakweo nanti ukulola imiyele yakweo.
Ukupepa kwa cumi kukasambilizya ivya muli Baibo, asi ivya mano ya antu. (Yoane 4:24; 17:17) Pa vintu vivyo paya ni cumi pa umi na pa upalilo wa manda pe muli paladaise pano nsi. (Masamu 37:29; Ezaya 35:5, 6; Ezekelo 18:4) Ukupepa kwa cumi kusitiina ukumanyisya antu pa visambilizyo vya ufi.—Mateo 15:9; 23:27, 28.
Ukupepa kwa cumi kukaazwa antu ukumanya Leza, ukwikapo nu kusambilizya api zina lyakwe, ilyakuti Yeova. (Masamu 83:18; Ezaya 42:8; Yoane 17:3, 6) Kusisambilizya ukuti Leza watala kumumanya nanti ukuti atange aye cuza witu lelo kukasambilizya ukuti akalonda tuye ya cuza yakwe.—Yakobo 4:8.
Kupepa kwa cumi kukasambilizya ukuti muli Yesu Klistu ali muno Leza akapususizya antu. (Milimo 4:10, 12) Antu aya umu kupepa kwa cumi yakauvwila masunde yakwe Yesu nu kwezya na maka ukumukolanya.—Yoane 13:15; 15:14.
Antu aya umu kupepa kwa cumi yakaika amano pa Wene Wakwe Leza ukuti uulakulula sile antu. Yakaombesya ukunena antu yauze pa Wene kwene uu.—Mateo 10:7; 24:14.
Kupepa kwa cumi kukasambilizya antu ukutemwa yauze ukwaula ukwenekela ukuti nayo yayatemwe. (Yoane 13:35) Kukasambilizya ukuti yalinzile ukucindika antu amitundu yonsi nu kupokelela antu ankanda izipusane, intambi, indimi alino na ankulilo izipusanepusane. (Milimo 10:34, 35) Kutemwa kukalenga antu ayamo ukukana ukuya umu kulwa inkondo.—Mika 4:3; 1 Yoane 3:11, 12.
Kupepa kwa cumi kutakwata ya simapepo akulipila, nupya kusiama umuntu ali wensi uwayamo amazina alulumbi aya umu mipepele.—Mateo 23:8-12; 1 Petulo 5:2, 3.
Kupepa kwa cumi kusiya umu vikanza vya miteekele nanti apanono. (Loma 8:26) Nomba antu ayamo yacindika uteeko uwaya kuno yakaikala nupya yakauvwila ukulingana ni sunde ilyaya muli Baibo ilyakuti: “Pelini Kesa vyakwakwe, Leza nawe mumupele vyakwakwe.”—Mako 12:17; Loma 13:1, 2.
Kupepa kwa cumi ali nzila ya umi, mutaya ivya ntambi nanti ivya kupanga sile. Antu ayamo yaya ni miylele isuma iyalandwa muli Baibo muli vyonsi vino yakacita umu umi. (Efeso 5:3-5; 1 Yoane 3:18) Ukucila ukuya nu ulanda, yakaya nu luzango lino yakupepa ‘Leza wa nsansa.’—1 Timoti 1:11.
Aya umu kupepa kwa cumi anono sana. (Mateo 7:13, 14) Antu aya umu kupepa kwa cumi yasuulwa sana, yakasekwa, nupya yakayacuzya pa mulandu nu kucita ukulonda kwakwe Leza.—Mateo 5:10-12.
Ukupepa kwa cumi ‘kutandinga’
Ukusoolola imipepele ukulingana na vino imipepele iyo ikulenga twayuvwa kutazipa. Baibo yasowile insita lino antu “yalalonda yakasambilizya aingi yano alayazanzya pa kuyanena sile vintu vino yakulondesya kuuvwa.” (2 Timoti 4:3) Nomba Baibo ikatukomelezya ukulondela “upefi uno Leza Tata akalola ukuti uwa mpomvu” nanti icakuti upefi uwo utamanyikwa.—Yakobo 1:27; Yoane 15:18, 19.
Limwi Mungatemwa Ukulolako na Vii
MASAMBILILO AA MULI BAIBO AACINDAME
Uzye Leza Wakwata Izina?
Leza wakwata mazina ya mucinzi aingi, wakwe Uwa Maka Yonsi, Kaumba, na Umwene. Lelo izina kwene lyako Leza lyaomviwa muli Baibo maila apipi nanti ukucila pali 7,000.
MASUKO KU MAUZYO AMULI BAIBO
Yesu Watuuzile Antu—Wayatuuzile Uli?
U mulandu ci uno tukalondela Yesu ukutupapatilako? Uzye ukuzumila sile muli Yesu i cingalenga sile umuntu ukupusuka?
MASAMBILILO AA MULI BAIBO AACINDAME
Uzye Uwene Wakwe Leza I Cani?
Mu mulimo wakwe onsi, Yesu wasambizyanga antu pa Wene Wakwe Leza kucila vino wasambizya pa vintu vyuze. Pa myaka iingi, alondezi yakwe yakapepa ukuti Uwene uwo wize.