Uzye Ukuya Umuntu Musuma Kungalenga Umwi Akaye nu Umi Usuma?
Ukufuma sile na mpiti, antu aingi yakaelenganya ukuti ukuya umuntu musuma kungalenga yakaye nu umi usuma. Wakwe, antu aingi aa ku Asia yazumila umu mazwi yano umuntu umwi uwasambilila sana uwi zina lyakuti Confucius walanzile aakuti: “Vino usikulonda ukuti yauze yaakucitila, utaavicita kuli yauze.” *
VINO AINGI YAKAPINGULAPO UKUCITA
Antu aingi yacili yazumila ukuti icingalenga umuntu ukuya nu umi usuma u kuya ni miyele isuma. Yakaezya ukuya a mucinzi uku antu, ni miyele yuze isuma, kucita vino yalinzile ukucita umu wikazi, alino nu kuya na kampingu musuma. Umwanaci umwi uwi zina lyakuti Linh aakaikala uku Vietnam, walanzile ukuti: “Nkaiusya ukuti, ndi cakuti lyonsi indi uwa cisinka muli vino nkalanda nu kucita, ningapaalwa.”
Antu yamwi yakacita ivisuma pa mulandu ni mipepele ino yayamo. Umonsi umwi uwi zina lyakuti Hsu-Yun aakaikala uku Taiwan, watiile: “Nasambilile ukuti umuntu nga akucita ivisuma, alaya ni nsansa nga wafwa. Nomba nga akacita iviipe, alacuula.”
I VYANI IVIKAFUMAMO?
Ica cumi ukuti nga tukucitila yauze ivisuma, ivintu vikatuzipila sana. Lelo aingi aakaezya na maka ukucitila yauze ivisuma asi lyonsi lino ivintu vikaya wakwe vino yakwenekela. Mama umwi uwi izina lyakuti Shiu Ping, uwa ku Hong Kong walanzile ukuti: “Ivyancitikile vyalenzile niluke ukuti asi lyonsi lino aakacitila yauze ivisuma yakapokelela ivisuma. Nezyanga na maka yane yonsi ukusakamala aa mu lupwa nu kuyacitila ivisuma. Nomba ivintu vyasenwike umu cupo nupya ya wane yatusiile nu mwanane umonsi.”
Aingi yailolela ukuti asi antu yonsi aa mu mipepele akaya antu asuma. Umwanaci umwi uwi izina lyakuti Etsuko, uwa ku Japan walanzile ukuti: “Nizile inja umu mipepele imwi, nupya neene natungululanga iumba lya yalumendo na akazyana ilya mu mipepele iyo. Nazungwike vino antu yamwi aa mu mipepele iyo yali ni miyele iipe, vino yalondesyanga ukupeelwa ivifulo, na vino yataomvyanga ningo impiya zya mu ceici.”
“Nezyanga na maka yane yonsi ukusakamala aa mu lupwa nu kuyacitila ivisuma. Nomba ivintu vyasenwike umu cupo nupya ya wane yatusiile nu mwanane umonsi.” —YA SHIU PING, AA KU HONG KONG
Antu yamwi atemwa sana imipepele nupya aakacita ivisuma, yakaiza yakuvwa sana uyi ndi cakuti iviipe vyayacitikila. Vikwene avino umwanaci umwi uwi izina lyakuti Van uwa ku Vietnam wayuvwile. Walanzile ukuti: “Cila wanda nakalanga ivizao, maluwa ni vyakulya nu kuyavipeela pa maulambo ya vikolwe vyane ala nkwenekela ukuti uku nkoleelo ndapokelela mapaalo. Usi mulandu na vino nacitanga ivisuma ni ntambi zya mu mipepele pa myaka iingi, yawane izile iyalwala sana. Lyene umwanane umukazyana uwasambililanga uku mpanga yuze nawe wafwile ala ali sile ni myaka 20.”
Vino ukuya sile umuntu umusuma kutanga kwazwe umwi ukuti akaye nu umi usuma uku nkoleelo, tungati i cani icingamwazwa? Pakuti tumanye icasuko ukwi iuzyo lii, tulinzile ukukwata ivyeo ivitailwe ivingatwazwa ukwasuka mauzyo yano twakwata nu kutulanga vino tungacita pakuti tukaye nu umi usuma. Aekwi kuno tungazana ivyeo vivyo?
^ pala. 2 Ndi cakuti mukulonda ukulola na vyuze vino Confucius wasambilizyanga, mulole umu cipande 7, mapalaglafu 31-35, umwi ibuku lyakuti Mankind’s Search for God, lyakwe ya Nte Yakwe Yeova, nupya lyaya na pa intaneti pa www.isa4310.com.
Limwi Mungatemwa Ukulolako na Vii
ZYUKINI!
Mulandu Uno Cacindamila Kumanya Viipe ni Visuma
Kusambilizya ana inu imiyele isuma kungayazwa ukwizaomba ningo lino yakula.
