Vino Tungalanga Ukutemwa Kuli Yauze
Pa mulandu wakuti swensi sweswe yana ya muntu wa kutandikilapo Adamu, sweswe lupwa longa. Nanti icakuti amu lupwa yonsi yalinzile ukutemwana nu kucindikana, ndakai cisi cangupale ukucita vivyo. Vii asi vino Leza uwaya nu kutemwa akalonda twacita.
VINO MALEMBELO YA MUZILO YAKALANDA PA KUTEMWA
“Uwatemwa muzo ndi vino waitemwa.” —AINA LEVI 19:18.
“Temwini anisi inu.”—MATEO 5:44.
VINO CIKAPILIULA UKUTEMWA ANTU YAUZE
Uvwini vino Leza walondolola ukutemwa umwi Izwi lyakwe pali 1 Kolinto 13:4-7:
“Kutemwa kukateeka mwenzo nupya ukwa luse.”
Elenganyini pali vii: Uzye mukauvwa uli ndi cakuti yauze yali ni cikuuku kuli mwemwe nupya yasikumusokela nga mwaluvyanya?
“Kutemwa kutakwata uzuwa.”
Elenganyini pali vii: Uzye mukauvwa uli ndi cakuti yauze yakumutunganya nanti yakumuvwila uzuwa?
“Kutemwa kutaitemwa.”
Elenganyini pali vii: Uzye mukauvwa uli ndi cakuti yauze iyacindika vino mukwelenganya nupya yasikulonda mwacita vino aliyo yakwelenganya?
Kutemwa “kusyasunga viipe vino yauze yakacita.”
Elenganyini pali vii: Leza akaitemelwa ukweleela yayo aakacita iviipe nga yalapila. “Wene ataya na kalandauzi, icipyu cakwe cisiyelelela foo.” (Masamu 103:9) Tukauvwa ningo ndi cakuti umwi watweleela pali vino ituluvyanya. Fwandi naswe tulinzile kulaeleela yauze ndi cakuti yatuluvyanya.—Masamu 86:5.
“Kutemwa kusyazangila mu kucita viipe.”
Elenganyini pali vii: Ndi cakuti iviipe vimwi vyatucitikila, tusilonda yauze ukuya nu luzango pali vino vikutucitikila. Fwandi naswe tusiya nu luzango nga yauze yakucuula, nanti icakuti antu yayo yakatucitila iviipe.
Pakuti Yeova atupaale, tulinzile ukutemwa antu yonsi, asi mulandu nu musinku, inkulilo nanti kuno yakapepa. Inzila yonga ino tungacitilamo vivyo, u kwazwa yayo aakulondekwa uwazwilizyo.
Limwi Mungatemwa Ukulolako na Vii
ZYUKINI!
Ivingamwavwa Ukuya ni Nsansa—Kutemwa
Kulanga ukutemwa nu kutemwikwa kwacindama sana nga tukulonda ukuya ni nsansa.
