Antu aingi umu nsi yonsi yamanya ukuti ukuzevya Klisimasi, u kuzevya uwanda wa kuvyalwa kwakwe Yesu Klistu. Nomba, uzye mwatala mwelenganya ngi cakuti antu aliko ale patatala palengela pano Yesu wafwilile wakwe atumwa na asambi, yazevyanga Klisimasi? Nupya uzye mwamanya vino Baibo ikalanda pa manda yakuvyalwa? Ukuzana masuko uku mauzyo yaa kumatwazwa ukumanya ndi cakuti Aina Klistu yalinzile ukuzevya Klisimasi.

Cakutandikilapo, Baibo italandapo pa kuzevya kwa kuvyalwa kwakwe Yesu nanti pa kuzevya kwa muntu ali wensi uwapepanga Yeova. Malembelo yakalanda sile pa kuzevya kwa kuvyalwa ukwa yantu yaili. Yonsi yoili yatali ya kapepa yakwe Yeova, umwineco wakwe Baibo, nupya pa manda yano yazevyanga ukuvyalwa kwao pacitike iviipe. (Utandiko 40:20; Mako 6:21) Ukulingana ni buuku limwi (Encyclopædia Britannica), Aina Klistu akutandikilapo yakananga “ulutambi lwa kuzevya amanda ya kuvyalwa.”

Baibo italanda uwanda uno Yesu wavilwe. Ivyeo vya mwi buku na lyuze (McClintock and Strongs’s Cyclopedia) vyalondololwa ukuti, “Uwanda uno Yesu wavilwe utalandwapo umu Upangano Upya nanti umwi buku ilili lyonsi.” Icisinka i cakuti, ndi Yesu aalonda ukuti alondezi yakwe yazevya uwanda uno wavyalilwepo, ndi walanzile umukulungatika uwanda kwene uwo.

Cakwe ciili, Baibo italandapo ukuti Yesu nanti ali wensi umu yalondezi yakwe, yazevizyepo Klisimasi. Ukulingana ni buku na lyuze limwi (New Catholic Encyclopedia), lyalanzile ukuti, “ukuzevya Klisimasi kwalumbwilwe umuku wakutandikilapo umwi buku ilyafumanga cila mwaka ilya Ciloma muno yaomvyanga inkoloko iyapimanga ningo sana insita (Chronograph), yakwe Philocalus kaleenga wa vikope ukuti ivyeo vii vyalemvilwe mu myaka yako ya 336 [C.E.].” Fwandi cii cikulangilila ukuti, Klisimasi walumbwilwe ala yamala nu kulemba Baibo nupya aala papita imyaka iingi pano Yesu wafumile pano nsi. Acino muli McClintock and Strong mwaya ivyeo vyakucelula ivyakuti: “Ukuzevya Klisimasi asi Leza uwakutandike, nupya nu Upangano Upya utalandapo.” *

Pa mulandu wakuti Yesu a Kasambilizya Mukalamba, wanenyile alondezi yakwe vino walondanga ukuti yacita, nupya ivintu vii vyalembwa muli Baibo. Ukuzevya Klisimasi kutaya pa vintu vivyo ivyalembwa muli Baibo. Wakwe vino mwalimu wa ku sukulu asilonda ukuti ana isukulu yacite vino atayanenyile ukucita, na Yesu kwene akalonda ukuti alondezi yakwe; ‘Yalondela ivyatantikwa mu malembelo.’—1 Kolinto 4:6.

Kwaya icintu conga icicindame cino Aina Klistu akutandikilapo yamanyile sana, kuli kuti, ukwiusya nanti Iciusyo ca mfwa yakwe Yesu. Yesu umwineco wanenyile asambi yakwe insita ino yali nu kulazevya iciusyo, nupya wayalangilile ni vyakuzevya. Ivyakucita pa kuzevya alino nu wanda kwene uno yalinzile ukuzevezyapo, vyonsi vyalembwa muli Baibo.—Luka 22:7, 19; 1 Kolinto 11:25.

Wakwe vino twalola paa, Klisimasi u kuzevya ukuvyalwa, nupya Aina Klistu akutandikilapo yatalondelanga ulutambi luu. Lyene nupya Baibo italandapo ukuti Yesu nanti ali wensi wazevizyepo Klismasi ukucisila. Fwandi ukulingana ni visinka vii, Aina Klistu aingi umu nsi yonsi yasizevyako Klisimasi, pano yamanya ukuti yatalinzile ukucita vivyo.