Cila mwezi, tukalondesya ukutamba mapuloglamu na mavidyo akukomelezya aakayako pa JW Broadcasting. Nanti ciye vivyo, aina itu aingi umu Africa yasikwanisya ukutamba mapuloglamu yaa akayako pa intaneti. U mulandu ci?

 Incende izingi umu Africa mutaya intaneti. Nupya umu ncende umwaya intaneti ilingi isiomba ningo sana nanti yakoma sana umutengo. Wakwe, mwangalizi umwi uwa ciputulwa wa ku Madagascar waile acitila daunilodi puloglamu ya pa mwezi iya JW Broadcasting, ukwaya ningo intaneti kuno yakalipilisya pakuti umuntu aomvyeko intaneti. Walipile lupiya madola 16, ulwali ulukulu ukucila pali luno antu yamwi yakakwata cila mulungu. *

 Usi mulandu ni intazi zii, ndakai antu aingi sana umu Africa yakaipakizya ukutamba JW Broadcasting ukwaula ukuomvya intaneti. U mu nzila ci?

 Ukufuma umu 2017, antu akaikala uku kaeya ka lwanga lwa Sahara umu Africa, yakatamba JW Broadcasting ukuomvya caneo imwi ya pa setilaiti. Yakaomvya caneo ii ukwaula ukulipila cila wanda, maawazi 24, mu ndimi 16.

 Pakuti yakwanisye ukucita vii, ya Nte Yakwe Yeova yakalipila pakuti yaikila mapuloglamu yao pa setilaiti. Setilaiti ino yakaomvya ikafika umu mpanga 35 uku kaeya ka lwanga lwa Sahara umu Africa. Cila mwezi, yakalipila impiya ukucila pa madola 12,000 pakuti yatambisye mapuloglamu yaa. Lelo insita zimwi, yakalipila impiya na zyuze pakuti yatambisye ivikucitika papo kwene ukuomvya caneo yuze. Cii cikalenga ukuti antu aingi yaipakizya ukutamba maukongano na mapuloglamu yauze aiyele ndi cakuti kuli umwimilizi wino aa ku Maofesi Yakalamba Yakwe ya Nte yatuma uku musambo.

 Antu aingi, ukwikako sile na asi ya Nte, yakatamba mapuloglamu yano ya Nte yakaika pa caneo iya pa setilaiti uku mang’anda yao kwene. Lelo aina itu aingi yatanga yakwanisye ukukala iviombelo ivya kuomvya pa kutamba mapuloglamu aakaya pa caneo iya pa setilaiti. Pa kwazwa aina itu yaa, mu Mang’anda ya Wene ukucila pali 3,670 ikamo iviombelo ivya kuyazwa ukutamba JW Broadcasting. Ndi cakuti pa Ng’anda ya Wene paya mpiti TV nanti pulojekita, yakaomvya impiya umupiipi na madola 70 pa kukala alino tukutwala iviombelo ivya kuomvya pa kutamba mapuloglamu yayo. Lelo pa kukala iviombelo vyonsi ivikalondekwa cikasenda impiya madola kufika kuli 530.

 Aina na ya nkazi yakataizya sana pali caneo ii. Eluda umwi uwa ku Cameroon walanzile ukuti: “Umu lupwa lwitu, caneo ii yaya kwati a mana umu lwanga.” Umwina Odebode uwa ku Nigeria watiile: “Tukatamba vino yakaika pa caneo ii miku itatu mu mulungu. Ana yane yakalondesya ukuti insita iyo ifike. Yakatunena nu kuti tuyule JW caneo na pa insita zyuze.” Ya Rose nayo kwene aa ku Nigeria yatiile: “Ukucila ukulatamba sile malyasi apa macaneo yauze insita yonsi, lyene nkatamba sana vino yakaika pa caneo yakwe ya Nte iya pa setilaiti. Ndi cakuti natamba amalyasi pa macaneo yauze nasokanga sana pa mulandu ni vyacitikanga nupya uwazi wasimulanga. Lelo ukutamba JW Broadcasting kukankomelezya nupya kukanteekezya. Aali caneo ino natemwa sana nupya u wila ukulu ukufuma kuli Yeova.”

 Umwangalizi wa ciputulwa uwa ku Mozambique walanzile ukuti mu ciputulwa muno akaombela pa Mang’anda ya Wene ikapo iviombelo ivya kuomvya pa kutamba vino yakaika pa caneo yakwe ya Nte iya pa setilaiti. Aina aa mu vilongano vii yakafika pa mang’anda ya Wene ala kwasyala iawala lyonga nanti ukucilapo kuti ukulongana kutandike, pakuti yatambe JW Broadcasting ukuomvya setilaiti.

 Pa ukongano wa mpanga izingi uwaliko umu 2019 uwayelile uku Johannesburg, uku South Africa, isile malyasi akalamba pa caneo ukwikako sile na malyasi yano umwina uwa mwi Iumba Ilikatungulula walanzile yano aa mu ntunga zyuze 9 yakutikeko. Umwina Sphumele uwaya muli dipatimenti iya local Broadcasting ku musambo uwa ku South Africa walanzile ukuti: “Mpiti twaomvyanga intaneti pa kusalanganya malyasi. Nupya ukucita vii kwalondekwanga intaneti isuma ni impiya izingi izya kukalila mabando. Lelo ukuomvya caneo yakwe ya Nte iya pa setilaiti kutasenzile impiya izingi nupya yaomvile ningo sana.

 Pa mulandu ni misangulo inu iyakuitemelwa ino mukasangula uku mulimo wa mu nsi yonsi, aina itu na ya nkazi umu Africa yakatamba JW Broadcasting ukuomvya caneo iya pa setilaiti. Tukataizya sana pa misangulo ino mukasangula ukuomvya inzila izya pa donate.isa4310.com.