Atthu enci anoona wiira Masaahiti a Yehova ncina no ittiini yonaanaano. Masi, myaakha cookhalaka 2.700 uttuli, ale yanswalela Nluku eekhweeli yeehaniya ‘masaahityaawe.’ (Isaiya 43:10-12) Ikhumelo yo khalayi mpaka mwaakha wo 1931, naacuweliya ukhala Anamasoma Ibiiblya. Vano kontha isiyani nicisileehu ncina Masaahiti a Yehova?

Nno ninanhimya Nluku ninonswaleleehu. Cowantikhiya co khalayi cineera wiira ncina na Nluku, Yehova, ninaaphwanyannya imaara imiliyau cene mbiiblyani. Ibiiblya cinci, nno ncinanno nihaakakhanihiya ni meehaneliyo Pwiiya awula Nluku. Masi Nluku eekhweeli ahonhimyera Moocesi wiira ncina nawe, Yehova, ni ahomwiirela: “Nna phi ncina naka mpaka.” (Nkwaha 3:15) Wuuluma wawe coo uyo heevirikaniha ni anluku otheene ahikhanle eekhweeli. Unaanitteela cinene ucisa ncina nowaarya awula noohipahuwa na Nluku.

Nno ninaahimyaca ntekweehu. Khalayi, atthu enci yahovaha usaahiti athoonyeraka umwaamini waya Yehova. Oopacera aari nlopwana oweettela isariya eehaniya Apeli. Waakhalaaya civiraka iseekulu cinci, Nowee, Aparahaamu, Sara, Moocesi, Davidi ni akhwaawe yahopanka mphantte wo “nihutte nuulupale no masaahiti.” (Maberewu 11:4–12:1) Toko vaavale ntthu nokhalaawe saahiti utiripunaali amwaakihaka ntthu ootheriye upanka itthu, hiivano niholakela waahimyera akhunanihu ikhweeli ca Nluku ninonswaleleehu.

Ninontakiha Yesu. Mbiiblyani, uyo neehaniya “saahiti ookhuluvelya ni eekhweeli.” (Apokalipise 3:14) Yesu ineennyaawe, enre wiira ‘hocuweliha ncina na Nluku’ ni ‘aanaavahera usaahiti ikhweeli’ ya Nluku. (Joau 17:26; 18:37) Phimaana, atthari eekhweeli a Yesu ahaana ucisa ncina na Yehova ni waacuweliha atthu akhwaawe. Iyo phiitthu Masaahiti a Yehova aneekurumicaaya upanka.

• Nlattuni Anamasoma Ibiiblya acisilyaaya ncina Masaahiti a Yehova?

• Ikhumelo yaakhani Yehova rinaawe masaahiti walaponi?

• Tipani khanle Saahiti muulupale a Yehova?