Parmi bann kitsoz ki anvole dan lanatir lagrin pisanli trouv parmi bann ki pli meyer. Kan divan soufle lor enn fler pisanli, enn kantite ti lagrin, ki parey kouma bann tipti parasit, anvole dan ler. Mem si zot koumans anvole anba, pre ar later, avek labriz sertin kapav anvol distans enn kilomet ouswa plis. Kifer zot kapav res sa kantite letan la dan ler? Bann siantifik fek dekouver ki fason zot anvole li kat fwa pli efikas ek pli stab ki bann parasit ordiner.

 Reflesi lor la: Sak lagrin tini lor enn tiz ki atase ar enn touf pwal fin ki apel pappus. Sa pappus-la li azir kouma enn parasit ki permet lagrin-la res dan ler.

 Me sa bann touf pwal pappus la li pa zis ed bann lagrin pisanli res dan ler. Kan ler sirkile ek ki li travers bann touf pwal, sa kree enn vortex ouswa enn tourbiyon lao pappus-la. Sa tourbiyon-la kree enn presion ki ris pappus-la, fer li kontign res dan ler pli lontan lerla li desann dousman.

 Nou kapav dir, parski fason bann touf pwal pappus-la inn bien fer, sa permet li fonksionn kouma enn parasit ki permeab, efikas ek stab. Anplis 90 poursan pappus-la vid! Savedir li bien leze.

 Bann siantis pe esey kopie fason ki lagrin pisanli anvole. Par exanp pou pa gaspiy lenerzi zot pe esey kree bann tipti dronn ki servi bien tigit ouswa pa servi kouran ditou. Pou kapav servi sa bann dronn-la pou fer enn kantite kitsoz kouma par exanp chek polision ki ena dan ler.

 Ki ou panse? Kan ou get fason extraordiner ki lagrin pisanli anvole ki ou pou dir? Linn aparet par limem ouswa eski inn kree sa?