Se Zeova ki Lasours lavi. (Psom 36:9) Alor, eski li pa logik pou panse ki sa mem Bondie-la kapav relev bann ki’nn mor? Labib rasir nou ki Li pou fer sa dan lavenir. (Lir Zistwar Bann Apot 24:15) Kifer Li pou relev bann mor?

Kan Bondie ti kree bann dimounn, Li ti anvi ki zot viv pou touletan lor later. (Zenez 1:31; 2:15-17) So proze pa’nn sanze. Sa fer so leker fermal kan Li trouv seki nou pe bizin siporte zordi. Nou lavi ranpli ar problem ek li bien kourt.​—Lir Zob 14:1, 14, 15.

Eski Bondie ti kree bann dimounn pou viv dan lesiel? Non. Se bann anz ki Bondie ti kree pou viv dan lesiel. Li’nn kree bann dimounn pou res lor later. (Zenez 1:28; Zob 38:4, 7) Rapel bann rezireksion ki Zezi ti fer. Se lor later ki li ti resisit bann dimounn. Parey, laplipar bann dimounn ki pou resisite dan lavenir pou viv lor later.​—Lir Zan 5:28, 29; 11:44.

Selman, Bondie inn swazir enn tigit dimounn pou al viv dan lesiel. Ek laba zot pou ena enn lekor invizib parey kouma bann anz. (Lik 12:32; 1 Korintien 15:49, 50) Bann ki pou resisite pou al dan lesiel zot pou bann lerwa, ek zot pou diriz later avek Kris.​—Lir Revelasion 5:9, 10.