So lane apre, mo’nn koumans zwe dan bann fim, ek plizir fwa mo ti ena rol prinsipal. Bann zournalis ti pe rod mo zistwar, bann fotograf ti pe rod mo foto, ek bann dimounn ti pe rod mo prezans kan bann fim ti pe debi, dan bann seremoni koup riban, dezene, ek dine. Mo ti enn dimounn bien inportan.

Me tigit-tigit, mo’nn dekouver ki tousala pa ti atiran parey kouma mo ti mazine. Mo ti zwe sirtou dan bann fim aksion, ek sa ti danzere. Dan Hong Kong, bann akter pa ti servi doublir parey kouma souvan fer dan Hollywood. Alor, momem mo ti bizin fer mo bann prop aksion, kouma par exanp roul enn motosiklet lor enn loto. Mo ti zwe dan boukou fim imoral ek violan. Sertin ti bann fim diabolik.

An 1995, mo’nn marye ar enn prodikter fim. Mem si li ti paret ki mo ti ena tou pou fer mwa ere​—prestiz, larzan, ek enn mari ki kontan mwa​—mo ti deprime ek tris. Mo ti desid pou aret fer fim.

Avek boukou plezir mo’nn koumans rapel lafwa ki mo ti ena kan mo ti tipti. Sa lepok-la, toule Samdi, mwa ek mo ser nou ti al kot enn fami Temwin Zeova. Joe McGrath, papa-la, ti etidie Labib avek nou ansam avek so trwa tifi. Ti ena boukou lamour dan zot fami ek “Tonton Joe” ti tret so madam ek so bann zanfan avek respe. Mo ti kontan osi akonpagn zot dan zot bann renion Kretien. Parfwa nou ti al dan bann gran rasanbleman. Sa ti bann moman bien zwaye. Mo ti santi mwa an sekirite avek bann Temwin.

Parkont, mo ti pe bien soufer dan mo prop fami. Lavi ki mo papa ti pe amene ti fer mo mama boukou lapenn, ek li ti bien deprime. Kan mo ti pre pou gagn di-z-an, mo mama ti aret frekant  bann Temwin Zeova. Mem si mo pa ti motive san poursan, mwa mo ti kontigne, ek mo ti pran batem laz 17 an. Me enn tipe apre, mo ti ena bann move kondwit ek mo ti nepli form parti dan kongregasion.

Zis apre mo maryaz, de ansien dan kongregasion lokal ti vinn get mwa. Zot ti explik mwa kouma mo kapav retourn ar Zeova, ek zot ti fer laranzman pou ki enn misioner ki apel Cindy ed mwa. Apre tou sa letan ki mo pa ti dan kongregasion la, mo ti perdi mo lafwa. Alor mo’nn demann Cindy pou prouv mwa ki Labib vremem Parol Bondie. Li ti montre mwa de-trwa lexanp bann profesi Labib ki’nn fini realize. Tigit-tigit, nou ti vinn bann bon kamarad, ek li ti demann mwa pou etidie bann lansegnman debaz ki ena dan Labib avek li. Mo ti aksepte. Pou premie fwa mo’nn konpran ki Zeova Li enn Bondie lamour ek Li anvi mo ere.

Kan mo ti rekoumans asiste bann renion Temwin Zeova, mo ti trouve ki mo ti plis kontan zot konpagni ki konpagni bann dimounn dan lindistri sinema. Me, akoz bann lexperyans ki mo’nn fer kan mo ti tipti, mo ti ena santiman ki mo pa kapav fer konfians personn, ek mo pa ti kontan momem. Enn manb kongregasion ti ed mwa kan li ti servi Labib pou montre mwa kouma mo kapav fer fas avek mo bann santiman, ek mo ti osi aprann kouma fer bann vre kamarad.

An 1997, mwa ek mo mari ti al res Hollywood, dan Californie, États-Unis. Laba mo ti pas plis letan pou ed bann dimounn tir profi ar sazes ki ena dan Parol Bondie. Ansegn bann dimounn Labib finn donn mwa plis satisfaksion ki tou bann prestiz ki mo ti gagne kan mo ti enn aktris. Par exanp, an 2002, mo ti zwenn Cheri, enn vie konesans depi Hong Kong. Dan boukou fason, nou lavi resanble. Li ti Miss Hong Kong enn an avan mwa. Ofet, kan mo ti vinn Miss, se limem ki ti kouronn mwa. Li osi li ti vinn enn aktris ek apre li ti vinn enn prodikter ki ti travay avek bann direkter bien renome. Li osi li ti al res Hollywood.

Mo ti bien sagrin Cheri kan mo ti aprann ki so fianse ti mor avek enn kriz kardiak. Li ti enn Boudis ek li pa finn gagn okenn konsolasion dan so relizion. Parey kouma mwa, li ti reisi gagn prestiz ki boukou dimounn ti anvi gagne, me pourtan li ti malere ek li pa ti kapav fer konfians personn. Mo ti koumans partaz seki mo ti aprann dan Labib avek li, me akoz so kiltir Boudis li ti gagn difikilte pou aksepte sa.

Enn zour an 2003, Cheri ti telefonn mwa depi Vancouver, Canada, kot li ti pe fer enn fim. Li ti extra kontan. Li ti dir mwa kan li ti pe roule ek admir bann peizaz, enn kout li’nn koumans priye bien for: “Kisannla vre Bondie? Kouma to apele?” Dan sa moman-la, li’nn pas kot enn Lasal Bann Temwin Zeova ek li’nn trouv nom Zeova. Pou li, sa ti kouma enn repons ki Bondie inn donn li ek li ti anvi zwenn bann Temwin Zeova pli vit posib. Mo ti fer bann laranzman, ek enn-de zour apre li’nn  koumans asiste bann renion dan enn kongregasion lang Sinwa dan Vancouver.

Apre, Cheri ti dir mwa: “Sa bann dimounn-la vremem interese ar mwa. Mo kapav dir zot seki mo resanti.” Mo ti vremem kontan kan mo ti tann sa parski kan Cheri ti dan lindistri sinema, zame li ti ena kamarad. Cheri ti kontign asiste bann renion. Me an 2005, li ti sign enn kontra pou prodir de long fim dan la Chine, ek akoz sa li ti bizin retourn Hong Kong. Me mo bien kontan ki an 2006, Cheri ti vwe so lavi ar Zeova ek li ti pran batem dan enn lasanble bann Temwin dan Hong Kong. Li ti anvi servi Zeova plis, me akoz so travay dan lindistri sinema sa pa ti fasil pou li, ek li ti bien tris.

An 2009, Cheri so lavi ti sanze. Li ti desid pou kit lindistri sinema pou ki li kapav servi Zeova plis. Li ti fer boukou nouvo kamarad dan kongregasion. Li ti pres bon nouvel lor Rwayom Bondie aplintan ek li ti vremem kontan pou ed bann dimounn pou ena enn pli bon lavi.​—Matie 24:14.

Apre, Cheri ti desid pou aprann Nepale pou soutenir enn group Temwin Nepale dan Hong Kong, ki ti pe grandi. Me dan Hong Kong, bann dimounn ena tandans pou inior ek mem ayir laplipar Nepale parski zot pa tro konn koz Angle ouswa Sinwa, ek zot kiltir diferan. Cheri ti dir mwa ki kantite li kontan pou ed sa bann dimounn-la konpran Labib. Par exanp, enn zour kan li ti pe prese lakaz-lakaz, li ti zwenn enn madam Nepale ki ti konn enn tigit lor Zezi me ki pa ti konn nanye ditou lor vre Bondie, Zeova. Cheri ti servi Labib pou montre li ki Zezi ti priye so Papa ki dan lesiel. Kan sa madam-la ti realize ki li kapav priye vre Bondie, ki apel Zeova, sa ti tous so leker ek li ti aksepte bon nouvel. Apre, so misie ek so tifi osi ti etidie Labib.​—Psom 83:18; Lik 22:41, 42.

Kan mo ti trouve ki kantite Cheri ti kontan prese aplintan, mo ti demann momem: ‘Ki anpes mwa fer parey?’ Sa lepok-la, mo’si mo ti pe res Hong Kong. Mo ti desid pou reorganiz mwa pou kapav ansegn plis bann verite Biblik. Mo trouve kan mo ekout bann dimounn ek ed zot konpran Parol Bondie, sa fer mwa vremem kontan.

Par exanp, mo’nn etidie Labib avek enn Vietnamienn ki touletan ti tris ek souvan ti pe plore. Asterla li trouv lavi dan enn fason pli pozitif ek li bien kontan frekant kongregasion.

Mwa ek Cheri nou toulede finn dekouver enn kitsoz ki ena plis valer ki prestiz. Nou travay dan lindistri sinema ti bien interesan ek ti fer nou vinn seleb. Me ansegn bann dimounn lor Zeova donn nou plis lazwa parski nou pe rann Li laglwar. Nou finn vremem viv seki Zezi dir: “Ena plis benediksion [“lazwa,” NW] kan done, ki kan resevwar.”​—Zistwar Bann Apot 20:35.