Enn ansiklopedi dekrir Pak kouma “fet prinsipal bann Kretien ki selebre Rezireksion Zezi Kris.” Me, eski li enn fet Kretien?

Pou kone si vremem enn obze pa enn imitasion, li bien inportan nou verifie tou so bann detay. Parey, pou nou kone si Pak enn fet Kretien, li bien inportan ki nou konn tou bann detay konsernan Pak.

Premierman, Zezi ti demann so bann disip pou selebre so lamor, pa so rezireksion. Lapot Pol ti apel sa levennman-la “repa Lesegner.”​—1 Korintien 11:20; Lik 22:19, 20.

Anplis, sa ansiklopedi-la dir ki boukou bann koutim Pak pena “okenn rapor” avek rezireksion Zezi, “me se bann koutim ki dimounn inn invante.” Par exanp, konsernan dizef ek lapin, bann sinbol popiler pou Pak, enn ansiklopedi lor relizion dir ki dizef reprezant enn nouvo lavi. Li azoute: “Bann dimounn ti konsider lapin kouma enn zanimo fertil, akoz sa li ti reprezant retour printan apre plizir mwa liver.”

Philippe Walter, enn profeser literatir, explike kouma sa bann koutim-la finn form parti dan selebrasion Pak. Li ti ekrir ki “kan ti pe fer bann ki dan relizion payin vinn bann Kretien,” li pa ti difisil pou asosie fet payin, ki ti selebre sanzman sezon ant lafin liver (lamor) ek koumansman printan (lavi), avek rezireksion Zezi. Walter azoute ki sa ti enn letap inportan pou introdir “bann fet Kretien” dan kalandriye payin, ek koumsa li ti pli fasil pou konverti enn kantite payin.

Se pa pandan ki bann zapot ti ankor vivan ki bann Kretien ti adopte bann koutim payin, parski bann zapot ti “fer obstak” kont bann lansegnman payin. (2 Tesalonisien 2:7, NW.) Lapot Pol ti averti ki apre ki li fini “ale,” ena sertin ki ti pou “leve pou detourn laverite pouki zot kapav ris bann disip pou swiv zot.” (Zistwar Bann Apot 20:29, 30) Ver lafin premie siek, lapot Zan ti ekrir ki sertin zom ti pe deza anbet bann Kretien. (1 Zan 2:18, 26) Se apartir sa moman-la ki relizion Kretien finn koumans adopte bann koutim payin.

Kanmem, sertin kapav panse ki sa pa ti move ki bann Kretien adopte sertin koutim payin, parski sa finn permet “bann payin” konpran pli bien ki sa vedir rezireksion Zezi. Selman, Pol zame pa ti pou dakor ar sa. Mem si li ti gagn kontak avek bann koutim payin kan li ti travers lanpir Romin, zame li pa’nn adopte sa bann koutim-la pou fer bann dimounn pli konpran bann lansegnman lor Zezi. Okontrer, li ti averti bann Kretien: “Pa al asosie zot avek bann non-krwayan. Kouma seki drwat kapav fer partner ar seki move? Oubien, kouma lalimier kapav asosie li ar teneb? [“Zeova,” NW] dir: ‘Separ zot ar sa bannla, res alekar, pa tous nanye ki inpir, e mo pou akeyir zot.’”​—2 Korintien 6:14, 17.

Ki nou’nn aprann apre ki nou’nn get sa de-trwa detay-la? Sa montre ki Pak li pa enn fet Kretien.