Me selman sertin koup mal servi teknolozi, ek sa kapav kree bann problem kouma . . .

• kokin letan ki zot ti kapav pase ansam.

• travay dan bann ler ki zot pa sipoze travay.

• kasiet zot konzwin bann kitsoz ouswa vinn infidel anver li.

PAS LETAN AVEK OU KONZWIN

Enn mari ki apel Michael dir: “Parfwa mwa ek mo madam nou dan mem lasam, me li pa pran mwa kont. Li res okipe lor so telefonn ek li dir: ‘Aster ki mo pe gagn letan pou chek mo telefonn.’” Enn mari ki apel Jonathan dir ki dan bann sitiasion koumsa “bann koup kapav dan mem plas me zot bien lwin ar zot kamarad.”

REFLESI LOR LA: Eski souvan arive ki ou reponn enn call, enn mesaz ouswa enn kitsoz lor rezo sosial, alor ki ou sipoze pe pas letan avek ou konzwin?​—EFEZIEN 5:33.

TRAVAY

Ena dimounn zot travay demann zot pou reponn bann call ouswa bann e-mail mem aswar ouswa kan zot lakaz. Parkont, ena dimounn ki zot travay pa demann zot fer sa. Me selman, mem sa zot gagn difikilte pou met zot travay enn kote alafin lazourne. Enn mari ki apel Lee dir: “Li difisil pou pa chek bann call ouswa mesaz ki mo gagne konsernan mo travay mem si mo’nn rezerv sa letan-la pou mo madam.” Enn madam ki apel Joy dir: “Mo travay depi lakaz mem, alor li difisil pou kone kan mo bizin aret travay. Sa demann boukou zefor pou gard enn lekilib.”

REFLESI LOR LA: Eski kan ou konzwin pe koz avek ou, ou donn li tou ou latansion?​—LIK 8:18.

FIDELITE

Boukou dimounn dir ki zot gagn problem dan zot koup parski zot konzwin pa dakor avek seki zot poste lor bann rezo sosial. Sertin finn osi dir ki zot poste bann kitsoz lor Internet an sekre ek zot pa anvi ki zot konzwin kone.

Boukou dimounn realize ki bann rezo sosial bien danzere pou bann koup ek sa kapav mem amenn enn dimounn pou tronp so konzwin. Alor, sa pa etonn nou ki sertin avoka panse ki boukou koup divorse akoz bann rezo sosial.

REFLESI LOR LA: Eski ou kasiet ou konzwin bann konversasion ki ou gagne avek enn dimounn lot sex?​—PROVERB 4:23.

FIXE BANN PRIORITE

Enn dimounn ki pa fer zefor pou manz bien fini par tom malad. Parey, enn dimounn ki pa fer zefor pou pas letan avek so konzwin pou gagn bann difikilte dan so maryaz.​—Efezien 5:28, 29.

Ansam avek ou konzwin, koz lor bann sigzesion ki ou ti pou kontan koumans fer, ouswa ekrir bann lezot lide ki kapav ed ou pou anpes teknolozi gat ou maryaz.

• Manz omwin enn repa ansam toulezour

• Swazir enn ler kot ou pa pou servi bann laparey elektronik

• Organiz enn dine ouswa enn lot kitsoz spesial ansam

• Tengn ou bann laparey elektronik aswar

• Tengn ou bann laparey elektronik pandan omwin 15 minit toulezour pou kapav koz ar ou konzwin

• Fixe enn ler toulezour kot ou aret servi Internet