MAZINE ki ou pe get enn fim lor enn selebrite, kitfwa se enn mizisien ki popiler, ki ou bien kontan. Kan fim-la koumanse, montre so lanfans, kan li pe aprann zwe enn instriman lamizik, ek tou bann moman kot li pe pratike. Apre sa, trouv li pe fer bann konser, pe vwayaze dan boukou pei, ek vinn popiler dan lemond antie. Apre, montre bann zimaz bann meyer lane so lavi, ek finalman kan fim-la fini, li mor.

Sa fim-la rakont zistwar enn dimounn ki’nn vremem existe, me ki azordi nepli vivan. Dimounn ki dan sa fim-la ti enn mizisien, mem si kitfwa li ti enn siantis, enn atlet, ouswa enn lot dimounn ki popiler, zistwar-la ti pou fini parey. Kitfwa sa dimounn-la inn fer boukou bon kitsoz. Me reflesi ki kantite bon kitsoz li ti pou kapav fer ankor si li pa ti vinn vie ek mor.

Mem si sa li bien tris, se seki pou ariv nou tou. (Ekleziast 9:5) Mem ki kantite zefor nou fer, nou pa kapav evit vinn vie ek mor. Ouswa enn kout koumsa nou kapav mor akoz enn maladi ouswa enn aksidan. Parey kouma Labib dir, nou koumadir brouyar dan gramatin ki “paret zis pou enn ti moman, apre li disparet.”​—Zak 4:14.

Nou kapav mor ninport ki ler, akoz sa, bann dimounn ena sa latitid-la: “Anou manze-bwar parski dime nou pou mor.” (1 Korintien 15:32) Me, kan bann dimounn amenn sa kalite lavi-la, sa montre ki zot pena okenn lespwar pou lavenir. Pa zordi pa dime, sirtou kan ou pe pas par enn sitiasion difisil, ou kapav demann oumem, ‘Eski samem lavi?’ Kotsa ou kapav gagn repons sa kestion-la?

Boukou dimounn ena lespwar ki bann siantis pou trouv enn repons. Bann siantis ek bann dokter finn trouv bann kitsoz ki kapav fer bann dimounn viv pli lontan. Ek sertin siantis pe fer bann resers pou ki nou kapav viv ankor pli lontan dan lavenir. Ki bann siantis reisi ouswa non, nou ankor poz nou sa bann kestion-la: Kifer nou vinn vie ek mor? Eski ena kit lespwar ki enn zour nou lennmi lamor pou disparet? Bann lartik ki swiv pou examinn sa bann size-la ek pou reponn sa kestion-la: Eski samem lavi?