Nou baz nou lor bann prinsip ki ena dan Labib dan fason ki nou konsider ledikasion. Sak Temwin Zeova servi so konsians ki forme par Labib pou deside kouma pou aplik bann prinsip Bondie kouma par exanp: a

•  Ledikasion bien inportan

•  Nou bizin konsider ledikasion avek enn lespri ouver

•  Bann gran letid kapav enn danze lor plan moral ek spiritiel

•  Eski bann Temwin Zeova fer katesis?

 Ledikasion ed enn dimounn pou devlop “sazes pratik ek kapasite pou reflesi,” bann zoli kalite ki Labib met an valer. (Proverb 2:10, 11; 3:21, 22) Anplis, Zezi ti dir so bann disip pou vinn bann ansegnan bann kitsoz ki li finn ansegne. (Matie 28:19, 20) Alor, nou ankouraz ek ed sakenn dan lasanble pou ena enn ledikasion ekilibre par exanp konn lir, ekrir ek kominike. b Ek osi, ena enn konesans lor lezot relizion ek kiltir.​—1 Korintien 9:20-22; 1 Timote 4:13.

 Bann gouvernman ena konsians valer ledikasion. Akoz sa, bien souvan, ledikasion primer ek segonder obligatwar. Nou obeir sa bann lalwa-la an-akor avek sa komannman-la: “Tou dimounn bizin soumet ar bann lotorite siperyer,” ouswa bann gouvernman. (Romin 13:1) Anplis, nou ankouraz nou bann zanfan pou aprann bien lekol ek pou fer zot best, pa kontant zot ar minimum. c Kouma Parol Bondie dir: “Ninport ki travay zot pe fer, fer li debonker, kouma dir pou Lesegner e non pou bann imin.”​—Kolosien 3:23, NTKM.

 Ledikasion ed nou pou pran swin nou fami lor plan materyel. Dapre Labib, “si enn kikenn pa donn so fami seki li bizin, ek sirtou bann manb so prop fami, li’nn renie lafwa ek li pli pir ki enn dimounn ki pena lafwa.” (1 Timote 5:8) Ledikasion kapav ed nou pou respekte sa lobligasion sakre la, setadir soutenir nou fami. Kouma The World Book Encyclopedia dir, lobzektif prinsipal ledikasion se “permet bann dimounn pou vinn bann manb lasosiete pli prodiktif antan ki . . . bann travayer pou lekonomi.” Enn dimounn ki bien edike ek ki bien forme kapav ed so fami pli fasilman ki enn dimounn ki pena enn formasion ek pena enn ledikasion debaz.​—Proverb 22:29.

 Ledikasion li enn mwayin ki ena boukou valer ki bann paran donn zot bann zanfan pou prepar zot pou zot lavi adilt. (2 Korintien 12:14) Nou ankouraz bann paran pou donn ledikasion zot bann zanfan mem si zot viv dan enn rezion kot ledikasion pa gratis, difisil pou gagne ouswa ledikasion pa inportan dan zot kiltir. d Nou osi donn bann sigzesion pratik kouma bann paran kapav ed zot bann zanfan dan zot ledikasion. e

 Nou examinn bien bann size ki nou pou etidie. Labib dir: “Enn dimounn naif krwar tou seki li tande, me enn dimounn ki ena enn bon zizman, reflesi bien lor sak pa ki li fer.” (Proverb 14:15) Nou aplik sa prinsip-la kan nou examinn bien diferan opsion ki ena pou bann kour liniversite ek komie li koute ek si li itil. Par exanp, bann kour teknik kapav enn bon formasion ki itil ek ki pa pran boukou letan.

 Ledikasion spiritiel ena pli boukou valer ki ledikasion ki nou gagne lekol. Ledikasion spiritiel ki baze lor Labib permet nou konn Bondie ek gagn lavi pou touletan. (Zan 17:3) Li osi ansegn nou bann valer moral, “seki drwat ek seki inparsial, sa semin ki amenn ver seki bon la.” (Proverb 2:9) Lapot Pol ti gagn enn ledikasion nivo liniversite pou nou lepok, me li ti rekonet ki “konesans lor Kris Zezi . . . ena enn gran valer.” (Filipien 3:8; Zistwar Bann Apot 22:3) Parey azordi, boukou bann Temwin Zeova finn gagn enn gran ledikasion me zot krwar ki zot ledikasion spiritiel ena pli boukou valer. f

 Enn proverb Labib dir: “Enn dimounn ki ena bon zizman kasiet kan li trouv enn danze.” (Proverb 22:3) Dan sertin liniversite ouswa dan bann lezot sant kot gagn gran ledikasion, bann Temwin Zeova panse ki zot spiritialite ek bann valer moral kapav an danze. Akoz sa, boukou bann Temwin swazir pou pa expoz zotmem ouswa zot zanfan dan sa kalite lanvironnman la. Zot trouve ki souvan ansegn bann fos lide dan sa bann liniversite-la. Par exanp:

•   Enn fos lide: Larzan fer nou gagn boner ek sekirite

   Bann liniversite souvan prezant bann gran letid kouma enn mwayin pli sir pou gagn enn travay bien peye. Alor, deplizanpli, bann etidian fer bann gran letid sirtou pou gagn enn travay ki gagn pli boukou kas. Sertin panse ki larzan pou fer zot gagn boner ek sekirite me Labib montre ki sa kalite panse la pena sans. (Ekleziast 5:10) Pli inportan ankor, Labib osi ansegne ki “lamour pou larzan li enn rasinn tou sort kalite move kitsoz” ek souvan li fer nou perdi nou lafwa. (1 Timote 6:10) Bann Temwin Zeova fer tou zot zefor pou pa les zot anbete par “pouvwar ki larises ena pou anbet dimounn.”​—Matie 13:22.

•   Enn fos lide: Enn dimounn bizin fer bann gran letid pou li gagn enn stati sosial

   Par exanp, Nika Gilauri, enn ansien premie minis Zeorzi, ti ekrir konsernan seki bann dimounn panse dan so pei: “Enn degre liniversite reprezant enn stati sosial dan Zeorzi ek li preske obligatwar. . . . [Dan le pase,] bann zenn ki pa ti ena enn degre, ti enn laont pou zot fami.” g Me okontrer, Labib met nou an gard kont rod grander dan sa lemond-la. Zezi ti dir bann sef relizie dan so lepok ki ti pe rod laglwar: “Kouma zot kapav krwar, alor ki zot pe aksepte laglwar sakenn so kamarad?” (Zan 5:44) Lanvironnman dan liniversite kapav fer nou vinn orgeye, enn defo ki Bondie deteste.​—Proverb 6:16, 17; 1 Pier 5:5.

•   Enn fos lide: Sak dimounn bizin deside par limem seki bon ek seki move

   Bann Temwin Zeova respekte bann prinsip Bondie lor seki bon ek seki move. (Izai 5:20) Me, dapre enn lartik ki ti pibliye dan Journal of Alcohol and Drug Education, presion bann kamarad dan liniversite souvan amenn bann etidian pou “pran bann desizion ki kontrer ar seki zot kone, setadir seki bon ek seki move.” h Sa obzervasion-la an-akor avek enn prinsip Labib: “Bann move frekantasion gat bann bon labitid.” (1 Korintien 15:33) Dan lanvironnman liniversite, ena souvan bann pratik ki Bondie kondane kouma bwar ziska sou, ladrog ek relasion sexiel andeor maryaz, ek sa bann pratik-la souvan mem ankouraze.​—1 Korintien 6:9, 10; 2 Korintien 7:1.

•   Enn fos lide: Bann gran letid se enn pli bon fason pou amelior sitiasion lemond

   Nou dakor ki boukou fer bann gran letid, pa pou vinn ris, gagn laglwar ouswa gout bann plezir ki kondane moralman, me pou amelior zot sitiasion personel ek amelior lemond. Se bann bon lobzektif, me bann Temwin Zeova finn swazir enn lot semin. Parey kouma Zezi, nou konsider Rwayom Bondie kouma sel lespwar pou enn lemond meyer. (Matie 6:9, 10) Me selman, nou pa zis atann Rwayom Bondie pou rezoud bann problem ki lemond pe fer fas san fer nanye. Olie sa, parey kouma Zezi, nou partaz “bon nouvel lor Rwayom” Bondie partou lor later, ek nou ed bann santenn milye dimounn sak lane pou amelior zot lavi. i​—Matie 24:14.