TAMA BONA SINA
8: Haheitalai
ANINA BE DAHAKA?
Haheitalai namona e hahedinaraiamu tama bona sina ese e gwauraimu ḡaudia na edia mauri ai e badinamu. Heḡereḡere, bema natumu na baine kamonai oi o gwa, “A hamaoroa, lau na dia rumai,” vadaeni basio hoa bema natumu na hereva koikoidia baine gwaurai.
“Momo ese e gwauraiamu herevana na ina: ‘Na herevamu heḡereḡerena ba kara, dia na karamu heḡereḡerena ba kara.’ Sponge ese ranu e dodoamu heḡereḡerena, natu ese ta gwauraimu herevadia bona ta karamu ḡaudia na be abi dae haraḡamu, bona be hamaorodamu bema ita ese ta gwauraimu ḡaudia na asita badinamu.”—David.
BAIBUL ENA SISIBA: “O haroromu, o tomamu taunimanima basie henao, a ḡau be oi o henaomu a?”—Roma 2:21.
DAHAKA DAINAI MAI ANINA BADA?
Tama sina edia haheitalai ena siahu, natu maraḡidia bona badadia ediai danu na mai anina bada—emu kara ena siahu ese natumu bamodia edia kara ena siahu na e hereaia. Una ese e hahedinaraiamu oi sibomu na heḡereḡere dala maorona ai natumu ba hakaudia diba—una na emu hereva heḡereḡerena ba kara.
“Ena be reana ḡau ta na nega momo baita gwauraia loulou, bena baita lalomu, natugu eme kamonai eiava lasi, to bema eda hereva heḡereḡerena basita karamu, ena be una na nega tamona mo, to natu ese una nega na be gwauraia hedinaraimu. Natu ese ta karamu ḡaudia iboudiai na e itamu, ena be ta laloamu ita na se itada.”—Nicole.
BAIBUL ENA SISIBA: “Atai amo e maimu aonegana . . . na . . . asi ena dibaka.”—Iakobo 3:17.
DAHAKA BA KARAIA DIBA?
Emu kara ba haeroa. Oi be dahaka muvi o itamu bona dahaka ane o kamonaimu? Adavamu bona natumu be ede o kara henidia tomamu? Turamu be taunimanima ede bamodia? Ma haida o lalodiamu, a? Eiava baita gwaumu, oiemu haheitalai be, o uramu natumu ese baine tohotohoa tauna ena haheitalai heḡereḡerena, a?
“Lau bona adavagu na asia uramu natumai na ai ese asia karamu karadia bae kara.”—Christine.
Emu kerere daidiai ba sori. Natumu na mai dibadia umui na dia ḡoḡoevadae. Bema o kereremu negadiai, adavamu bona natumu ediai sori herevana bo gwauraiamu, natumu na kara momokani bona manau karana bo hadibadiamu.
“Ḡau badana na natuda na bae itaia, eda dika na ta gwaurai hedinaraimu, bona eda kerere daidiai ta sorimu. Bema unu basita kara tomamu, idia na ta hadibadiamu edia kerere na bae huni.”—Robin.
“Ita na tama bona sina dainai, eda haheitalai na mai siahuna natuda ediai, bona idia ihadibadia ai eda haheitalai na tulu namo hereana, badina nega iboudiai e itaiamu dainai. Ia na vaitani e hekeho hanaihanaimu bukana ta na heto.”—Wendell.
