Bʼꞹnkʼo manji ke yo testigo e Jehová kja go mbedye o religión. Mꞹ gi mbeñege ga kjanu, ra xitsʼigedya ke ndeze mi jingua go bʼꞹbʼꞹji testigo e Jehová. Ya axko kjogꞹ dos mil seteciento kjɇɇ ma e Mizhokjimi go xipji o ntee: “nutsʼkʼeji ngetsʼkʼeji in testigoji” (Isaías 43:10-12). Mi jingua dya mi xitsʼkojme testigo e Jehová, yo ntee mi manji mi ngezgojme ntee kʼo mi xørꞹjme ne Biblia, pe nrreze kʼe kjɇɇ 1931 ni chju̱zgojme testigo e Jehová. ¿Gi nee ri pa̱rge pjekja ni chju̱zgojme testigo e Jehová?

Ri negojme ke yo ntee ra mba̱ra̱ji ke Mizhokjimi ngeje e Jehová. Mi jingua ma go dyopji ne Biblia ixko jñusʼꞹji na punkjꞹ o trju̱u̱ e Jehovánu. Ma go kjogꞹ yo paa, go bʼꞹbʼꞹ bʼɇzo kʼo go jñusʼꞹji kja xiskuama kʼo mi mama ne Biblia, pe dya kja go jñusʼꞹji o trju̱u̱ e Jehová, go jñusʼꞹtrjoji Mizhokjimi. Yo ntee pɇsʼiji na punkjꞹ mizhokjimi, pe dʼatrjo Mizhokjimi kʼꞹ na kjuana. Mi jingua e Mizhokjimi go xipji yo ntee: “Ni chju̱zgo Jehová. Nuzgo ngezgo in Mizhokjimigeji” (Isaías 42:8). Nudya me ri mⱥkjojme ke ri testigojme e Jehová.

Ni chju̱zgojme testigo e Jehová nange ri zopjꞹjme yo ntee ja ga kjaa e Mizhokjimi. E Abel nge kʼꞹ otrʼꞹ go tsjaa testigo e Jehová. E Noé, e Abrahán, e Sara, e Moisés ñe e David xo mi ngeji testigo e Jehovákʼo (Hebreos 11:4–12:1, Traducción del Nuevo Mundo [TNM]). Ma dʼa ntee ro jyⱥxkʼe bʼechjine, ¿ja rgui soge ma ro bʼꞹbʼꞹ na ntee kʼꞹ ro ñankʼa? Kʼo ro tsjaa kʼe nteekʼꞹ chjenjui yo ri kjagojmedya yo ri testigojme e Jehová. Nutsʼkojme ri ñanajme e Jehová, ri xipjijme yo ntee kʼo na kjuana ngekʼua ra mba̱ra̱ji angeze.

Ni chju̱zgojme testigo e Jehová nange ri kjagojme ja gua tsjaa e Jesús. Ne Biblia mama ke e Jesús mi nge na testigo kʼꞹ go mama kʼo ma kjuana (Apocalipsis 3:14, TNM). Ma go e̱je̱ba kja ne Xoñijomꞹ e Jesús, go jichi “kʼo na kjuana” ja ma kjaa e Jehová, go mama pje mi chju̱u̱ o tata (Juan 17:26; 18:37). Ngekʼuadya, nutsʼkojme ni chju̱zgojme testigo e Jehová, nzakja e Jesús ri jichkʼojme yo ntee ngekʼua ra mba̱ra̱ji ke e Mizhokjimi ni chju̱u̱ Jehová.

• ¿Pjekja ni chju̱zgojme testigo e Jehová?

• ¿Kjo nge kʼo ntee kʼo otrʼꞹ go tsjaji testigo?

• ¿Kjo mi ngeje kʼe testigo kʼꞹ go mama kʼo na kjuana?