Malaike Gin Jomage?
Dwoko ma Muma chiwo
Malaike gin chuech ma nigi teko kod nyalo moloyo dhano. (2 Petro 2:11) Gidak e polo ma en kama ni malo moloyo piny.(1 Ruodhi 8:27; Johana 6:38) Bende iluongogi ni chuech mag roho.—Tich Joote 23:8, 9.
Malaike noa kanye?
Nyasaye nochueyo malaike kotiyo gi Yesu, ma Muma luongo ni “jal makayo kuom chuech duto.” Muma lero kaka Nyasaye ne otiyo gi Yesu e chueyo gik moko kowacho kama: “Kokalo kuome [Yesu] ne ochue gik mamoko duto manie polo gi manie piny, gik mineno gi gik ma ok ne,” moriwo nyaka malaike. (Jo-Kolosai 1:13-17) Malaike ok kend kendo ok ginyuolre. (Mariko 12:25) Nochue moro ka moro kuom “yawuot Nyasaye madier”.—Ayub 1:6.
Malaike nochue chon kata ka pok ochue piny. Ka ne Nyasaye ochueyo piny, malaike nochako “kok matek gi mor.”—Ayub 38:4-7.
Nitie malaike adi?
Muma ok nyiswa kwan-gi, kata kamano, onyisowa ni ging’eny ahinya. Kuom ranyisi, e fweny ma ne omi jaote Johana, noneno gana gi gana kod tara gi tara mag malaike.—Fweny 5:11.
Be malaika ka malaika nigi nyinge kod kite?
Ee. Muma nyisowa nyinge mag malaike ariyo ma gin: Mikael kod Gabriel. (Daniel 12:1; Luka 1:26) * Nitie malaike moko ma ne oyie ni gin gi nyingegi, kata kamano, ne ok giwachogi.—Chakruok 32:29; Jong’ad bura 13:17, 18.
Moro ka moro kuom malaike nigi kite. Malaike nyalo wuoyo e kindgi giwegi. (1 Jo-Korintho 13:1) Gin gi nyalo mar paro kendo ginyalo pako Nyasaye. (Luka 2:13, 14) Gin gi nyalo mar yiero kind gima ber gi gima rach. Mano nonenore ka ne moko kuomgi oriwo lwedo Satan Jachien e ng’anyo ne Nyasaye.—Mathayo 25:41; 2 Petro 2:4.
Be malaike nigi migepe mopogore opogore?
Ee. Malaika ma nigi teko kod nyalo moloyo malaike mamoko en Mikael, ma en malaika maduong’. (Juda 9; Fweny 12:7) Joserafi nigi migawo mar chung’ but kom loch mar Jehova. (Isaya 6:2, 6) Jokerubi nigi migawo makende kendo gin gi tije makende ma gitimo. Kuom ranyisi, jokerubi ne rito yo ma dhi e puoth Eden bang’ ka oseriemb Adam gi Hawa.—Chakruok 3:23, 24.
Be malaike konyo ji?
Ee, Nyasaye tiyo gi malaike makare e konyo ji e kindegi.
Nyasaye tiyo gi malaike e tayo jotichne sama gilando wach maber mar Pinyruoth. (Fweny 14:6, 7) Yo ma otiyogo gi malaike konyo joma lando wach maber kod joma winjo wachno.—Tich Joote 8:26, 27.
Malaika konyo kanyakla mar Jokristo mondo obed maler mondo joma richo kik chide.—Mathayo 13:49.
Malaike tayo kendo rito jotich Nyasaye momakore kode.—Zaburi 34:7; 91:10, 11; Jo-Hibrania 1:7, 14.
Machiegnini, malaike biro kelo kuwe ne dhano e kinde ma gibiro kedo e lweny kanyachiel gi Yesu Kristo ka gitieko joma richo.—2 Jo-Thesalonika 1:6-8.
Be ng’ato ka ng’ato nigi malaikane ma rite?
Kata obedo ni malaike rito jotich Nyasaye mondo gibed gi winjruok maber gi Nyasaye, mano ok nyis ni koro Nyasaye omiyo Jakristo ka Jakristo malaika ma rite. * (Mathayo 18:10) Malaike ok geng’ jotich Nyasaye kuom tem duto ma ginyalo romogo. Muma wacho ni Nyasaye nyalo ‘loso yo mar wuok’ e tem moro ka omiyo ng’ato rieko kod teko mar nano.—1 Jo-Korintho 10:12, 13; Jakobo 1:2-5.
Miriambo miwacho e wi malaike
Miriambo: Malaike te beyo.
Adiera: Muma wuoyo e wi “teko mar oganda mar jochiende” kod “malaike ma notimo richo.” (Jo-Efeso 6:12; 2 Petro 2:4) Malaike marichogi gin jochiende nikech ne giriwo lwedo Satan e ng’anyo ne Nyasaye.
Miriambo: Malaike ok nyal tho.
Adiera: Malaike maricho moriwo nyaka Satan Jachien ibiro kethi.—Juda 6.
Miriambo: Ji bedo malaike ka githo.
Adiera: Malaike gin chuech mag Nyasaye mopogore gi dhano, ok gin dhano mochier. (Jo-Kolosai 1:16) Nyasaye miyo joma ochier mondo odhi e polo, del ma ok nyal tho. (1 Jo-Korintho 15:53, 54) Gibiro bedo e rang’iny ma malo moloyo malaike.—1 Jo-Korintho 6:3.
Miriambo: Nochue malaike mondo oti ne dhano.
Adiera: Malaike winjo chik Nyasaye to ok mar dhano. (Zaburi 103:20, 21) Kata mana Yesu nong’eyo ni onyalo kwayo Nyasaye mondo okonye to ok malaike.—Mathayo 26:53.
Miriambo: Wanyalo wuoyo gi malaike ka wakwayogi mondo gikonywa.
Adiera: Sama wawuoyo gi Nyasaye, mano en yo achiel ma walamego; en kende e ma onego olame. (Fweny 19:10) Onego walem ka wawuoyo gi Nyasaye kende, to mana kokalo kuom Yesu.—Johana 14:6.
^ par. 5 Loko moko mag Muma tiyo gi nying mar “Lusifa” e Isaya 14:12, kendo ji mang’eny paro ni en e nying malaika ma ne olokore mobedo Satan Jachien. Kata kamano, e dho Hibrania, wach motigo e ndikoni en “sulwe marieny.” Weche moluoro ndikoni ok ti gi nyingni kiwuoyo kuom Satan, kar mano owuoyo e wi loch mar Babulon ma Nyasaye ne dhi ketho nikech wich-teko. (Isaya 14:4, 13-20) “Sulwe marieny” notigo e jaro loch mar Babulon bang’ ka ne osekethe.
^ par. 13 Jomoko paroga ni ndiko ma wuoyo e wi kaka malaika noreso Petro e jela, nyiso ni ne en gi malaika ma rite. (Tich Joote 12:6-16) Kata kamano, ka ne jopuonjre wuoyo kuom ‘malaika mar Petro,’ nyalo bedo ni ne giparo apara ni malaika ma ne wuoyo gi dwond Petro e ma obiro irgi to ok Petro owuon.
Samoro Inyalo Hero Magi Bende
DWOKO PENJO MA JI NIGO E WI MUMA
Malaika Maduong’ Miluongo ni Mikael En Ng’a?
En gi nying moro machielo manyalo bedo ni ing’eyo.
OHINGA MAR JARITO
Be Ng’ato ka Ng’ato Nigi Malaika ma Rite?
Be en gima owinjore paro ni malaika kata malaike nyalo riti?
