Ang’o ma Inyalo Timo Mondo Idag Nyaka Chieng’?

TUGE

Dwoko ma Muma chiwo

Muma singonwa niya: “Ng’at ma timo dwach Nyasaye siko nyaka chieng’.” (1 Johana 2:17) Nyasaye dwaro ni itim ang’o?

Puonjri e wi Nyasaye kod Wuode ma en Yesu. Ka ne Yesu lemo, nowacho kama: “Ka ng’ato ong’eyi, in Nyasaye makende mar adier kod jal ma ne ioro Yesu Kristo, to en gi ngima ma nyaka chieng’.” (Johana 17:3) ‘Ng’eyo’ Nyasaye kaachiel gi Yesu oriwo timo ang’o? Wanyalo ng’eyogi ka wapuonjore Muma kendo tiyo gi puonjgo e ngimawa. * Muma konyowa ng’eyo pach Jachuechwa kendo Jachiw ngima, ma en Jehova Nyasaye. (Tich Joote 17:24, 25) Muma bende puonjowa e wi Yesu, ma nopuonjo “weche mag ngima ma nyaka chieng’.”—Johana 6:67-69.
Ket yie kuom misango ma Yesu nochiwo. Yesu nobiro e piny mondo “oti ne ji kendo mondo ochiw ngimane owar ji mang’eny.” (Mathayo 20:28) Misango ma Yesu nochiwo noyawo thuolo ne ji mondo giyud ngima ma nyaka chieng’ e Paradiso e pinyka. * (Zaburi 37:29) Yesu nowacho kama: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.” (Johana 3:16) Ndikono nyiso ni dwarore watim gik momedore moloyo mana keto yie kuom Yesu. Nyaka ‘waket yie kuome,’ wadag kaluwore gi puonj mage kendo watim dwach Wuon-gi.—Mathayo 7:21; Jakobo 2:17.
Bed gi winjruok motegno gi Nyasaye. Nyasaye dwaro ni wasud machiegni kode kendo wabed osiepene. (Jakobo 2:23; 4:8) Nyasaye siko nyaka chieng’. Ok onyal tho kendo odwaro ni osiepene bende odag nyaka chieng’. E Muma, Nyasaye nyisowa gik modwaro ni jogo ma manye otim. Owacho niya: ‘Mad udag nyaka chieng’.’—Zaburi 22:26.

Miriambo ma Ji Wacho e Wi Ngima ma Nyaka Chieng’

Miriambo: Dongruok ma dhano timo biro miyo giyud ngima ma nyaka chieng’.

Adiera: Kata obedo ni osetim dongruok mathoth e weche thieth mondo ochwalgo ngima mar dhano, kinda ma kamago ok nyal miyo ji oyud ngima ma nyaka chieng’. Nyasaye kende e ma nyalo miyowa ngima ma nyaka chieng’ nikech en kende e “soko mar ngima.” (Zaburi 36:9) Osingo ni “obiro tieko tho chuth” kendo chiwo ngima ma nyaka chieng’ ne joma omakore kode.—Isaya 25:8; 1 Johana 2:25.

Miriambo: Nitie mana ogendni moko ma biro yudo ngima ma nyaka chieng’.

Adiera: Nyasaye ok buon ji. Muma wacho ni, “e oganda moro amora, ng’at moluore kendo ma timo gik makare, oyiego.” (Tich Joote 10:34, 35) Joma winjo Nyasaye ma wuok e ogendni kod dhoudi mopogore opogore nyalo dak nyaka chieng’.

Miriambo: Ngima ma nyaka chieng’ ok bi bedo mamit.

Adiera: Mich mar ngima ma nyaka chieng’ wuok kuom Nyasaye moherowa kendo ma dwaro ni wabed mamor. (Jakobo 1:17; 1 Johana 4:8) Ong’eyo ni timo gik ma morowa nyalo miyo wabed mamor. (Eklesiastes 3:12) Nyasaye singo ni joma biro dak nyaka chieng’ e piny biro bedo gi tich ma gitimo kendo tijno biro konyogi kaachiel gi wedegi gi osiepegi.—Isaya 65:22, 23.

E wi mano, joma biro dak nyaka chieng’ biro medo puonjore gik manyien e wi Jachuech kod gik mathoth mosechueyo. Ne ochueyo dhano gi gombo mar dak nyaka chieng’ kendo mondo gipuonjre gik mathoth kuome. Kata kamano, dhano ok nyal ‘fwenyo ngang’ tije duto mag Nyasaye madier a chakruok nyaka giko.’ (Eklesiastes 3:10, 11) Omiyo, joma biro dak nyaka chieng’ biro medo puonjore kendo timo gik mathoth.

^ par. 2 Joneno mag Jehova ochiwore mar puonjo ji Muma ma onge chudo. Mondo iyud weche momedore, ne vidio ma wacho ni Ere Kaka Wapuonjoga Ji Muma?

^ par. 3 Som sula ma wacho ni “Yesu Waro Ji e Yo Mane?”