Ji mang’eny diher ni kik buon-gi nikech rangi mar pien dendgi, kata kamano, pod ibuonogi abuona.

•   “Tim mar buono ji nikech rangi mar pien dendgi, pod en chandruok maduong’ ahinya e skunde, riwruoge, kod kuonde ma ji odakie. Timno miyo ji mang’eny winjo e chunygi ni ok dewgi.”​—António Guterres, Jagoro Maduong’ mar Riwruok mar Pinje (UN).

 Be tim mar buono ji nikech rangi mar pien dendgi chieng’ norum? Ang’o ma Muma wacho?

 Muma konyowa ng’eyo kaka Nyasaye neno ji ma wuok e ogendni mopogore opogore.

•   “[Nyasaye] noloso ogendni duto koa kuom ng’ato achiel, mondo gidag e piny mangima.”​—Tich Joote 17:26.

•   “Nyasaye ok buon ng’ato ang’ata, to e oganda moro amora, ng’at moluore kendo ma timo gik makare, oyiego.”​—Tich Joote 10:34, 35.

 Muma nyiso ni dhano duto gin joot achiel, kendo ni Nyasaye oyie gi ji duto, kata bed ni pien dendgi chalo nade.

 Pinyruodh Nyasaye ma en sirkal manie polo, e ma biro miyo ji duto oherre ma ok gidewo kaka pien dendgi chalo. Sirkandno biro puonjo ji kaka ginyalo timo ne jowetegi gik makare. Ibiro puonj ji kaka ginyalo golo e chunygi paro moro amora ma ginyalo bedogo ni ogendni moko oloyo ogendni mamoko mana nikech rangi mar pien dendgi.

•   “Jo modak e piny [biro] puonjore tim makare.”​—Isaya 26:9.

•   “Tim makare nokel kuwe, kendo tim makare nomi ji obed gi chuny mokuwe kod arita mosiko.”​—Isaya 32:17.

 E kindewagi, puonj manie Muma dhi nyime konyo ji tara gi tara mondo ging’e kaka ginyalo miyo jowetegi luor kendo herogi.

•   Mondo ipuonjri weche momedore, som gaset mar Amkeni! ma wiye wacho ni, “Je, Inawezekana Kuushinda Ubaguzi?”

•   Mondo ing’e kaka jonyuol nyalo konyo nyithindgi kik obuon ji, som sula ma wiye wacho ni, “Unaweza Kuzungumzaje na Watoto Wako Kuhusu Ubaguzi?”