Kaka Inyalo Nyagori gi Ngima ka Yutoni Odok Piny

JAL miluongo ni Obed en wuoro ma nigi nyithindo ariyo. Notiyo kuom higini apar e otel ma rahuma e taon moro maduong’ e piny Afrika kendo ne ok one pek e chopo dwaro mag joode. Kinde ka kinde, ne otero joode dhi bayo kuonde mabeyo mag yueyo e pinygi. Magi duto ne orumo dichiel kane olalo tije e otel nikech kwan mag welo ma ne biro e otendno ne odok chien.

Stephen noyudo osetiyo e bengi moro maduong’ kuom higini 22, kendo e kindeno noseidho rang’iny mamalo mobedo maneja. Kambino ne miye gik mang’eny kaka ot maduong’, mtoka, jotich me ot, kendo ne giterone nyithindo e skunde mag huma. Kane bengino ochako timo lokruok e tije ma jotich timo, tichne norumo. Stephen wacho ni: “Mano ne oturo chunywa an kaachiel gi jooda. Chunya ne onyosore, ne an gi mirima, koda kibaji.”

Magi gin gik majatimore. Chandruoge mag pesa mosemako piny mangima osemiyo ji mang’eny ma ne nigi tije mabeyo olalo tijegi. Chuno ji mang’eny mopo koyudo tich mondo oyie kawo osara mapiny to koni ginyagore gi bech gik moko masiko idho. Bed ni en piny ma nigi dongruok kata ooyo, onge kamoro amora e pinyni ma chandruoge mag pesa pok omulo.

Rieko Matiyo Dwarore

Seche ma yutowa odok piny kata walalo tijwa, chunywa nyalo pong’ gi parruok. En adier ni ng’ato nyaka bedie gi kibaji e okang’ moro. Kata kamano, jal moro mariek kinde moro nowacho niya: “Ka dipo nong’no oteri chieng’ chandruok, tekoni tin.” (Ngeche 24:10) Kar weyo kibaji olowa seche ma wayudo ng’ikni e yutowa, dwarore ni watim gima Wach Nyasaye jiwo, wati gi “rieko makare.”​​—⁠Ngeche 2:7.

Kata obedo ni Muma ok en bug weche pesa, puonj momiyowa mondo wanyagre gi weche mwaromogo e ngima osekonyo ji tara gi tara e piny mangima. We wanon ane moko kuom puonj ma Muma chiwo mondo otawa.

Kwan nengo. Par ane weche ma Yesu nowacho mayudore e bug Luka 14:28: “Ere ng’ato kuomu madwaro gero ohinga, ma ok bed piny mondi, kendo okwan nengo, mondo one ka en kod gi ma dotiekego? ” Gima nyalo nyiso ni ng’ato tiyo gi puonjno en loso bajet kendo luwogo. To mana kaka Obed oyie, mano ok en gima yot. Owacho niya: “Kane pok alalo tija, ne wajong’iewo gik mang’eny turi e supamaket, to ng’eny gik ma ne wang’iewo ne ok gin gik ma ochuno. Ne ok walos bajet nikech ne wan gi pesa moromowa ng’iewo gimoro amora ma ne wadwaro.” Kata kamano, chano motelo biro miyo yuto makoro odok piny otigo e chopo gigo madwarore gadier ne joot.

Tim lokruok e kit ngimani. Timo lokruok mondo idag e ngima mapiny en gima tek, kata kamano en gima dwarore. Ngero moro mar Muma wacho ni: “Ng’a moterore  mos oneno gi moro marach mi opondo.” (Ngeche 22:3) Stephen wacho niya: “Mondo wakung pesa, ne wadar wadhi dak e odwa ma ne en ot matin kendo ma ne pok otiek los iye. Bende ne watero nyithindo e skunde ma nengogi ni piny to somo pod ne berie.”

Mondo utim lokruok mar dak e ngima mapiny kaka joot, dwarore ni uwuo ayanga e kindu kuom wechego. Austin, ma ne osetiyo e bengi kuom higini ochiko wacho kama: “An kachiel gi jaoda ne wabet piny kendo ne wandiko gik ma ne dwarore kuom adier. Ne ochunowa dwoko chien pesa ma ne watiyogo e nyiewo chiemo ma nengone ni malo, dhi bayo kuonde michuloe pesa mang’eny, koda nyiewo lewni manyien maok ochuno ma nengogi tek. Amor ni jooda ne oriwo lwedo lokruogegi duto.” En adier ni nyalo bedo matek mondo nyithindo matindo ong’e gimomiyo lokruok ma kamago dwarore, kata kamano kaka jonyuol, unyalo konyogi ng’eyo gimomiyo.

Bed gi chuny moikore kawo tich mopogore. Kapo ni iseng’iyo tiyo tij ofis, tiyo tij lwedo nyalo nenore ni tek ahinya. Austin wacho niya: “Kawo tije lwedo ne chando chunya ahinya nikech ne aseng’iyo tiyo kaka maneja e kambi maduong’.” Mani ok kawwa gi wuoro nikech Muma wacho e Ngeche 29:25 niya: “Luoro mar dhano omiye ruako wino e ng’ute.” Parruok ahinya kuom kaka jomoko biro neni ok bi pidhoni joodi. Ang’o manyalo konyi loyo parruok ma kamago?

Bolruok e gima duong’. Bang’ lalo tije mar otel, jal moro ma ne Obed tiyogo chon ne omiye tich kar loso mtokni. Tijno ne dwaro ni owuoth mabor e ndeche motimo buru mondo onyiew rangi koda gige loso mtokni. Obed wacho niya: “Ne ok ahero tijno, en mana ni ne onge tich machielo. Bolruok ne okonya timo lokruok mar bedo gi tich ma pesane ni piny nyading’wen ne osara ma yande ayudo, kata kamano, pesano ne oroma pidho jooda.” Donge neno weche e yo ma kamano nyalo konyi?

Bed ng’at ma gigene rome. Diksonari moro wacho ni ng’at ma gigene oromo en ng’at “mamor gi chal ma entie.” Wechego nyalo nenore matek ne ng’at ma nigi chandruoge madongo mag pesa. Kata kamano, par ane wechegi ma ne owach gi jaote Paulo, jamisonari ma nong’eyo tiend chando gimoro: “Asepuonjora romo ka moro amora ma antie. Ang’eyo bet kachando, kendo ang’eyo bet ka an gi mathoth.”​​—⁠Jo Filipi 4:⁠11, 12.

Nyalo bedo ni sani ineno ni weche pek kuomi, kata kamano, e pinyni ma weche siko lokoree, weche nyalo bedo marach moloyo. Wanyalo yudo ber gadier ka wakawo mapek puonj ma Paulo nochiwo: “Adier, ka ng’ato gire orome, bedo jadini kelo ohala maduong’. Omiyo ka wan gi chiemo kod lewini, mago mondo oromwa.” Maok ojiw samuoyo, Paulo ne nyiso paro mowinjore wabedgo kuom gige ringruok.​​—⁠1 Timotheo 6:⁠6, 8.

Kama Wanyalo Yudoe Mor Madier

Mor madier ok yudre kuom choko mwandu duto mwadwaro kata dak e ngima maonge chando gimoro. Yesu owuon ema ne owacho niya: “Miyo kelo gueth moloyo kawo.” Kuom adier, mor yudore kuom tiyo gi gigewa e konyo ji kendo bedo jogo majiwo chuny jomoko.​​—⁠Tich Joote 20:35.

Jachwechwa, Jehova Nyasaye ong’eyo maber gigo duto mwachando. Kokalo kuom Wachne, ma en Muma, osechiwo puonj matiyo gadier mosekonyo ji mang’eny bero kit ngimagi kendo tieko parruok manono. En adier ni onge lokruok mabiro timore dichiel e yor hono mondo yuto ng’ato omedre. Kata kamano, Yesu nosingo ne jogo ‘madwaro mokwongo pinyruodh Nyasaye, gi wachne makare’ gigo duto madwarore e ngima.​​—⁠Mathayo 6:​33.