Gik Makelo Mor e Ngima Joot

Pidho Nyithindo Mondo Gibed Joma Kawo Ting’

George: * “Gima ne timore pile pile gotieno en ni Michael, wuoda ma jahigini ang’wen ne jaweyo gike mag tugo kokeyore kamoro amora e ot. Ne ajanyise mondo odwokgi kama owinjore kapok odhi nindo. Kata kamano, mano ne miyo Michael ywak matek kendo botore. Seche moko ne iya jawang’ ma arogne, to mano ne miyo waduto wawinj marach moloyo. Ne adwaro ni wanind gi kuwe. Omiyo ne ajawera kode, kendo an awuon ema ne adwoko gigene mag tugo.”

Emily: “Chandruok nochakore ka Jenny nyara ma jahigini 13 ne ok ong’eyo kaka onego otim tich ma ne japuonjne omiyogi. Ka Jenny nochopo e ot, noywak kuom sa mangima. Ne atemo jiwe ni okwa japuonjgi olerne tijno to ne otamore kowacho ni japuonjgi chunye rach kendo ok onyal temo penje gimoro. Ne adwaro ni adhi e skul gie sano mondo anyis japuonjno kaka en japuonj marach. Ne aneno ni onge ng’at ma ne nigi ratiro mar kwinyona nyathi kamano! ”

BE SECHE moko nyithindi timore kaka nyathi George koda mar Emily? Mana kaka jonyuol ariyogi, jonyuol mang’eny winjo marach sama nyathi nenore ni chandore e timo gimoro. En gima nie chuny janyuol ni orit nyathine kik hinyre. Kata kamano, timbe nyithindo monyis malogo ne miyo jonyuolgo thuolo mar puonjo nyithindgi okaw ting’. En adier ni gima nyathi ma jahigini 4 nyalo puonjore opogore gi gima nyathi ma jahigini 13 nyalo puonjore.

Kata kamano, adiera en ni kinde duto ok ibi bedoe e ngima nyathino mondo igeng’ne chandruok. Gikone, nyathi biro weyo min-gi gi wuon mare kendo “oting’ ting’ne owuon.” (Jo Galatia 6:5; Chakruok 2:24) Mondo gikony nyithindgi obed joma nyalo ritore kendgi, jonyuol onego otim kinda mondo gipuonj nyithindgi obed joma dewo  jomoko, kendo makawo ting’. Puonjo nyithindo kamano ok yot!

Gima ber en ni jonyuol nyalo luwo ranyisi maber ma Yesu noketo kuom kaka notimo ne jopuonjrene. Yesu ne ok en janyuol sie. Kata kamano, gimomiyo noyiero kendo tiego jopuonjre mage ne en mondo oteggi gidhi nyime gi tich kata ka en oonge. (Mathayo 28:19, 20) Yesu nochopo gima jonyuol duto geno chopo e pidho nyithindo makawo ting’. Ne ane yore adek ma Yesu noketonego jonyuol ranyisi.

Ket ne Nyathini ‘Ranyisi’ Kane Yesu chiegni tho, nowacho ne jopuonjrene kama: “Asemiyou ranyis mondo un bende utim kaka asetimonu.” (Johana 13:15) Kamano bende, jonyuol onego oler kendo oket ranyisi manyiso e yo maber tiend kawo ting’.

Penjri ane kama: ‘Be kinde ka kinde awuoyo maber kuom kaka akawo ting’ meka? Be awuoyo maber kaka tiyo matek ne jomoko kelona mor? Koso kinde duto aywagora ka apimora gi jomoko ma ngimagi nenore ni yot?’

En adier ni onge ng’ama ok nyal both. Waduto seche moko wawinjo ka ting’ ohewowa. Kata kamano, ranyisi miketo nyalo bedo yo maberie moloyo mar puonjo nyithindi one gimomiyo ber bedo joma kawo ting’.

TEM ANE TIMO KAMA: Ka nyalore, kinde ka kinde dhi gi nyathini kama itiye mondo inyise tich mitimo mamiyo iyudo pesa mipidhogigo. Ka nitie tich michiwori timo ne ng’ato, dhi kanyachiel gi nyathini ukony ng’atno. Bang’e wuo kode kuom mor miyudo e kawo ting’no.​—Tich Joote 20:35.

Bed gi Paro Mowinjore Yesu nong’eyo ni ne dhi kawo kinde kapok jopuonjrene ong’eyo kawo ting’ kaka ne odwaro. Kinde moro, nowachonegi kama: “An gi weche mang’eny mowinjore awachnu, to ok unyal makogi koro.” (Johana 16:12) Yesu ok ne wach ne jopuonjrene ni otim gimoro gie sano kapok opuonjogi. Kar timo kamano, notiyo gi seche mabuora e puonjogi gik mang’eny. Mana bang’ Yesu ng’eyo ni jopuonjrene koro ne nyalo, eka ne oorogi kendgi.

Kamano bende, ok en gima owinjore mondo jonyuol owe nyithindgi okaw ting’ mag joma dongo kapok giikore. Kata kamano, sama nyithindo medo bedo madongo, jonyuol onego oyier tije mowinjore mondo gimi nyithindgi otim. Kuom ranyisi, jonyuol onego opuonj nyithindgi mondo ging’e rito ler mar dendgi, gitim ler mar ot, ging’e rito sa, kendo tiyo gi pesa e yo mariek. Sama nyathi chako dhi e skul, jonyuol onego okony nyathi ng’eyo ni tije mimiye e skul gin ting’ madwarore ni okaw gi pek.

E wi miyo nyithindo migepe, nitie gimachielo madwarore ni jonyuol otim. Mondo nyithindo ochop tijego e yo maber, nyaka jonyuol konygi. George, ma ne owuo kuome motelo, nofwenyo ni gimachielo ma ne miyo Michael wuode iye owang’ ahinya ne en ni noneno ni tij kano gige tugo ne tek. George wacho ni, “Kar rogo ne Michael mondo okwany gik tugo, ne apuonje yo moro mayot mar kano gigo.”

En ang’o sie ma George notimo? George wacho niya: “Mokwongo, ne ayango sa sie mar choko gige tugogo otieno kotieno. Kae to ne wachoko gigo kode a kamoro achiel nyaka kamachielo. Ne aketo choko gigo obed kaka tuk piem mondo wane ni ng’ano manyalo loyo nyawadgi. Bang’ kinde, timo mano nobedo gima watimo pile kapok wanindo. Ne awacho ne Michael ni, kotimo tijno mapiyo to ne adhi medo somone sigana moro gotienono. To kapo ni odigni, to abiro somone mana sigendini matin.”

TEM ANE TIMO KAMA: Non ane gima nyithindi nyalo timo mondo gikony e tije mag  ot. Penjri kama, ‘Be pod atimo ne nyithinda gik ma onego gitim kendgi? ’ Ka en kamano, ti tijego kanyachiel gi nyithindi ma ibed gadier ni ginyalo timogi kendgi. Nyisgi maler ber kata rach mabiro bedoe kaluwore gi kaka gitiyo. Kae to bang’ tijego, chiw kum ka dwarore kata migi mich mowinjore.

Ketnegi Weche Adimba Mana kaka jopuonj duto mabeyo timo, Yesu bende nong’eyo ni yo maber moloyo mar puonjruok gimoro en timo gino. Kuom ranyisi, kane Yesu oneno ni osechopo kinde mowinjore, ne ooro jopuonjrene “ariyo ariyo ni mondo gitel nyime, gidhi e mier duto kod gwenge duto, ku ma en owuon nodwaro dhiyoe.” (Luka 10:1) Kata kamano, ok noweyogi aweya maok otayogi. Kapok ne oorogi, noketonegi weche adimba kaka ne gidhi timo. (Luka 10:⁠2-​12) Kane jopuonjrenego oduogo monyise kaka gik moko nodhi maber, Yesu nopwoyogi kendo nojiwogi. (Luka 10:⁠17⁠-⁠24) Nonyisogi kaka nogenogi kendo nomor kodgi.

Sama nyithindi temo loyo migepe matek, ijatimo nade? Be itemo geng’o nyithindi kik tim tije ma giluoro timo nikech ok idwar ni gichandre kata giwinj lit mabedoe ka gimoro otamogi timo? Chunyi nyalo dwaro ni “irese” kata timone migawono.

Kata kamano, par ane wachni: Kapo ni seche duto irikni mondo “ires” nyithindi ka gin gi migawo mapek, en ang’o mitemo puonjogi? Be igenogi gadier kendo inenogi ka jogo manyalo timo gimoro giwegi? Koso inyisogi ni pod ikwanogi kaka nyithindo mayom manyaka timnegi gimoro amora?

Kuom ranyisi, Emily ma ne owuo kuome motelo ne otimo ang’o mondo okony nyare ma ne chandore? Kar donjore e wachno, ne ong’ado ni Jenny owuon owuo gi japuonjne. Ka gin kaachiel, Emily kod Jenny nondiko piny penjo ma ne Jenny dhi penjo japuonjno. Kae to ne giwuoyo kuom kaka Jenny ne dhi chako wuoyo gi japuonjne. Kendo ne gitimo ranyisi kaka wuoyono ne nyalo bedo. Emily wacho ni, “Jenny noyudo chir mar dhi wuoyo gi japuonjne kendo japuonjne ne opwoye kuom timo kamano. Jenny ne mor ahinya​​—⁠kendo an bende ne amor kode.”

TEM ANE TIMO KAMA: Ndik piny pek moro ma nyathini kaloe gie sani. E dir gima indikono, ndik gima inyalo timo mondo ikonye olo pekno owuon. Tim ranyisi gi nyathini mondo ong’e okenge madwarore ni oluw mondo olo pekno. Nyise ni in gadier ni onyalo chopo migawono.

Kapo ni isiko ka igeng’o nyathini kik onyagre gi migepe matek, inyalo thiro nyalo mare mar kedo gi chandruoge mag ngima. Kar timo kamano, jiw nyithindi mondo gidong ka gin joma nyalo kawo ting’. Timo kamano biro bedo achiel kuom mich maduong’ minyalo miyogi.

[Weche moler piny]

PENJRI ANE KAMA . . .

▪ Be an gi paro mowinjore kuom gima adwaro ni nyithinda otim?

▪ Be awuoyo kodgi kendo nyisogi gima dwarore ni gitim mondo gidhi maber?

▪ Ne ajiwo kata pwoyo nyathina mogik karang’o?