Nyasaye nowacho ne Adam niya: “E ndalo michamogo, tho to initho.” (Chakruok 2:17) Di ne bed ni nochue Adam mondo bang’e otho, di ne onge tiende mondo Nyasaye omiye chikno. Adam nong’eyo maber ni ka ne onyalo weyo ma ok ochamo olemo ma ne ni e yath ma Nyasaye nokwere, ne ok odhi tho.

Ne ok ochuno ni Adam gi Hawa ocham olemo ma ne okwergino e ka gibed mangima. Ne nitie yiende ma ne nigi olemo mathoth ma ne ginyalo chamo. (Chakruok 2:9) Weyo ma ok gichamo olemo ma ne ni e yath ma ne okwergino ne dhi nyiso ni giluwo chik Nyasaye ma e ng’ama nomiyogi ngima. Mano bende ne dhi nyiso ni giyie mondo Nyasaye e ma ochikgi.

Mondo wang’e gimomiyo Adam gi Hawa notho, wane ane mbaka moro ma nonyuolo weche ma mulo ngima dhano duto. Satan Jachien notiyo gi thuol mondo owach miriambo moro malich ahinya. Muma nyisowa niya: “Thuol ne riek moloyo gibuya duto me piny ma ne Jehova Nyasaye osechweyo. Mi nowacho ni dhako niya, Mano adieri koso, Nyasaye osewacho, Kik ucham kuom yien duto ma ni e puodho?”​—Chakruok 3:1.

Hawa nodwoke niya: “Chamo olemb yien me puodho to wanyalo chamo: To kuom olemb yath ma ni e dier puodho, Nyasaye osewacho niya, Kik ucham kuome, kata mule kik umule, dipo kutho.” Kae to thuol nowachone niya: “Ok unutho ngang’: To Nyasaye ong’eyo ka e chieng’no muchame, wang’u noyepi, mi nubedi ka Nyasaye, kung’eyo mabeyo gi maricho.” Omiyo, Satan ne temo wacho ni Jehova ne en jamiriambo kendo ni nitie gimoro maber ma ne otuono jonyuolwa mokwongo.​—Chakruok 3:2-5.

Hawa noyie gi gima Satan nonyise. Norango yadhno, kendo olemb yadhno nolombe. Nopono olemo e yadhno mochako chamo. Muma medo wacho niya: “Nomiyo chwore bende, en bende nochamo.”​—Chakruok 3:6.

Nyaka bed ni Nyasaye nowinjo malit ahinya ka noneno ka nyithinde otamore winje! Notimo nang’o? Nonyiso Adam niya: “Nyaka idogi e lowo; nikech kanyo e ma nogolie: Nikech in buru, kendo inidogi ni buru.” (Chakruok 3:17-19) To mana kaka Nyasaye nowacho, ‘ndalo duto mag ngima Adam ne gin higni 930 mi notho.’ (Chakruok 5:5) Adam ne ok odhi e polo ka nosetho kata ne ok odhi nyime gi ngima kamoro machielo. Ne oonge ka ne Jehova Nyasaye pok ochueye gi buru.  Omiyo, ka notho, ngimane norumo mi ochalo gi buru ma nochueyego. Nobedo ma onge. Mano kaka en gima lit!

Nikech Adam gi Hawa noketho chik Nyasaye goyiem, ne gibedo dhano morem kendo ne gilalo thuolo ma ne gin-go mar dak nyaka chieng’. Dendgi nobedo gi lokruok; ne gibedo dhano ma joricho. Chandruok ma ne giyudo nikech ketho chik Nyasaye ne ok omakogi mana kendgi. Ne ginyuolo nyithindo gi richono. Jo-Rumi 5:12 wacho kama: “Kaka richo nodonjo e piny kokalo kuom ng’ato achiel [Adam], kendo tho nobiro kokalo kuom richo, tho nolandore kuom ji duto nikech giduto ne gisetimo richo.”

Muma luongo richo kod tho ni ‘law moumo wang’ ji kod kitamba moyar kuom ogendni duto.’ (Isaiah 25:7) Richo kod tho omako ji te ma onge ng’at ma nyalo pondo. Adier, “kuom Adam dhano duto tho.” (1 Jo-Korintho 15:22) Penjo ma ng’ato ka ng’ato nyalo dong’ ka penjore en penjo ma jaote Paulo nopenjo niya: “En ng’a ma biro resa kuom ringruok ma tera e tho ma kamani?”​—Jo-Rumi 7:24.