1-2. Kaka inyisowa e Tich Joote 8:27-31, 35-38, ang’o ma nochwalo Ja-Ethiopia moro mondo obatise?

BE DIHER ni obatisi mondo ibed japuonjre Kristo? Hero Jehova kendo goyone erokamano kuom gik mabeyo mosetimo osechwalo ji mang’eny mondo okaw okang’ mar batiso. Ne ane ranyisi mar Ja-Ethiopia moro ma ne tiyo e od ruoth.

² Ja-Ethiopiano nokawo okang’ mapiyo bang’ fwenyo e Ndiko ni nonego obatise. (Som Tich Joote 8:27-31, 35-38.) Ang’o ma nochwale? Nenore maler ni nomor gi Wach Nyasaye; mano e momiyo nosomo bug Isaya sama ne en e gache. Bende, ka ne Filipo oseyalone, noneno gimomiyo nonego ogo erokamano kuom gima Yesu nosetimone. To ang’o momiyo Ja-Ethiopiano nodhi Jerusalem? En nikech nohero Jehova. Wang’eyo mano nade? Noyudo oa lamo Jehova Jerusalem. Nenore ni noweyo din ma noponie, mi oriwore gi oganda Jo-Israel, ma e oganda kende ma nosesingore ne Nyasaye madier. Hera ma noherogo Jehova e ma nochwale mondo okaw okang’ machielo maduong’, ma en batiso mondo obed japuonjre Kristo.​—Mat. 28:19.

3. Ang’o ma nyalo mono ng’ato kawo okang’ mar batiso? (Ne sanduk ma wiye wacho ni “ Chunyi Chalo Nade?”)

³ Hera miherogo Jehova e ma biro chwali mondo obatisi. To be ing’eyo ni nitie hera machielo ma nyalo moni kawo okang’ mar batiso? En hera maneno? Ne ane ranyisi  ma luwogi. Inyalo hero joodu kod osiepeni ahinya ma chop kama iluor ni ka obatisi to gibiro sin kodi. (Mat. 10:37) Kata, inyalo hero timbe moko ming’eyo maber ni Nyasaye osin-go kendo inyalo yudo ka tekni weyogi. (Zab. 97:10) Kata, samoro ne ipon ka itimo nyasi moko mag dinde mag miriambo, to pod ihero gik ma ji timoga e nyasigo. Mano nyalo miyo weyo nyasigo otami kata obedo ni ing’eyo maber ni Jehova ok mor kodgi. (1 Kor. 10:20, 21) Yiero ma nyaka itim en ma: En ng’a kata ang’o mibiro hero moloyo?

4. Ang’o monego ochwali mondo ikaw okang’ mar batiso?

⁴ Nyalo bedo ni nitie gik mang’eny mihero kendo ma mori. Kuom ranyisi, samoro ne ihero Muma kata ka ne pok ichako puonjori gi Joneno mag Jehova. Bende, samoro ne ihero Yesu. E wi mago, nikech koro iseng’eyo Joneno mag Jehova e yo maber, samoro gin bende iseherogi. Kata kamano, hero gigo kende ok oromo chwali mondo ichiw ngimani ne Jehova mi batisi. Gima duong’ ma biro miyo obatisi en hera miherogo Jehova. Ka ihero Jehova moloyo gik moko duto, ok ibi yie mondo gimoro amora kata ng’ato ang’ata omoni tiyone. Hera miherogo Jehova e ma biro chwali mondo obatisi, kendo herano e ma biro konyi siko kimakori kode bang’ batiso.

5. Gin penjo mage ma koro wadwaro nono?

⁵ Yesu nowacho ni nyaka waher Jehova gi chunywa duto, ngimawa duto, pachwa duto, kod tekowa duto. (Mar. 12:30) Ang’o minyalo timo mondo ipuonjri hero Jehova e yo matut kamano kendo miye luor? Ka wasiko waparo matut kuom hera ma Jehova oherowago, mano biro miyo wan bende wahere. (1 Joh. 4:19) Ka wasehero Jehova kamano, mano biro chwalowa mondo watim ang’o momedore? *

6. Ka luwore gi Jo-Rumi 1:20, achiel kuom yore ma inyalo puonjorigo e wi Jehova en mane?

⁶ Puonjri e wi Jehova kokalo kuom gik mochueyo. (Som Jo-Rumi 1:20; Fwe. 4:11) Par matut e wi gik ma nyiso ni Jehova nochueyo yiende kod le e yo mariek. Tem nono yo makende mochuego dendi. (Zab. 139:14) Par bende teko ma Jehova oketo e i chieng’ ma en mana achiel kuom sulwe bilionde modhuro. * (Isa. 40:26) Sama itimo kamano, luor mimiyo Jehova biro medore. Kata kamano, ng’eyo ni Jehova riek kendo en gi teko mang’eny en mana achiel kuom yore ma nyalo konyi bedo gi winjruok maber kode. To mondo ihere, dwarore ni imed ng’eye.

7. Mondo iher Jehova e yo matut, en ang’o ma dwarore ni ibedgo gadier?

⁷ Dwarore ni ibed gadier chuth ni Jehova dewi. Be dibed ni iwinjo ka ok yotni yie ni Jachuech mar polo gi piny ong’eyi kendo dewi? Ka en kamano, par ni Jehova ‘ok ni mabor gi ng’ato ka ng’ato kuomwa.’ (Tich 17:26-28) Jehova “nono chuny ji duto,” kendo osingoni mana kaka nosingo ne Daudi ni “ka imanye, to ibiro yude.” (1 We. 28:9) Kuom  adier, gimomiyo ipuonjori Muma sani en nikech Jehova ‘oseywayi ire.’ (Jer. 31:3) Kaka imedo bedo ma mor gi gik ma Jehova osetimoni kendo bedo gi chuny mar goyo erokamano, e kaka ibiro medo here.

8. Ere kaka inyalo nyiso ni ihero Jehova?

⁸ Achiel kuom yore minyalo nyisogo Jehova ni in be ihere en wuoyo kode e lamo. Kaka imedo nyiso Jehova gik ma chandi kendo goyone erokamano kuom gik mosetimoni, e kaka hera miherego biro medore. Sama ineno kaka Jehova dwoko lamogi, osiep ma ni e kindi kode biro medo bedo motegno. (Zab. 116:1) Ibiro bedo gadier ni ong’eyi maber. Kata kamano, mondo isud machiegni gi Jehova, dwarore ni ing’e pache. Bende, dwarore ni ing’e gik modwaro ni itim. Ibiro ng’eyo gik modwarogo mana kipuonjori Muma ma en Wachne.

9. Ere kaka inyalo nyiso ni ihero Muma?

⁹ Puonjri hero Muma ma en Wach Nyasaye. Muma kende e buk moting’o adiera e wi Jehova kod gik modwaro ni itim. Inyalo nyiso ni ihero Muma kuom some pile, ikori maber ne puonjruok mari, kendo tiyo gi gik mipuonjori. (Zab. 119:97, 99; Joh. 17:17) Be in gi chenro moriere mar somo Muma? Be iluwo chenrono mondo isom Muma pile ma ok ibari?

10. Achiel kuom gik momiyo Muma en buk makende en ang’o?

¹⁰ Achiel kuom gik momiyo Muma en buk makende en ni oting’o weche ma nondik gi joma noneno gik ma Yesu notimo achiel kachiel. En e buk kende ma nyisi adimba gik ma Yesu osetimoni. Kaka imedo puonjori gik ma Yesu nowacho kendo timo, e kaka ibiro medo sudo machiegni kode.

11. Ere kaka inyalo puonjori hero Jehova?

¹¹ Puonjri hero Yesu to hera miherogo Nyasaye biro medore. Nikech ang’o? Nikech Yesu nonyiso kido mag Wuon-gi e yo makare chuth. (Joh. 14:9) Omiyo,  kaka imedo puonjori e wi Yesu, e kaka hera miherogo Jehova biro medore. Tem paro kaka Yesu nokecho joma nodhier, jotuo, kod joma ne onge nyalo. Parie bende kaka puonjne osekonyi ahinya e ngimani sama itiyo kodgi.​—Mat. 5:1-11; 7:24-27.

12. Ang’o ma chunyi biro chwali mondo itim kaka imedo puonjori e wi Yesu?

¹² Ibiro medo hero Yesu ahinya sama iparo matut kuom misango ma nochiwo mondo owenwa richowa. (Mat. 20:28) Samoro amora miparo ni Yesu noikore thoni in iwuon, ibiro neno gimomiyo onego ilok chunyi oa e richo kendo ikwa Jehova mondo oweni richoni. (Tich 3:19, 20; 1 Joh. 1:9) Kendo kaka imedo hero Jehova gi Yesu, e kaka ibiro medo gombo bedo machiegni gi joma oherogi.

13. Ang’o ma Jehova biro miyi?

¹³ Puonjri hero joma ohero Jehova. Joodu ma ok gin Joneno kod osiepeni machon samoro ok nyal ng’eyo gimomiyo idwaro chiwo ngimani ne Jehova. Ginyalo kata kwedi. Jehova biro miyi oweteni gi nyimineni e kanyakla. Jogo biro tegi kendo heri ahinya. (Mar. 10:29, 30; Hib. 10:24, 25) Mosmos, samoro joodu moko biro riwore kodi e tiyo ne Jehova kendo luwo chikene.​—1 Pet. 2:12.

14. Ka luwore gi 1 Johana 5:3, isefwenyo ni chike Jehova chalo nade?

¹⁴ Puonjri hero chike Jehova kendo tiyo kodgi e ngimani. Ka ne pok ichako ng’eyo yore Jehova, nyaka bed ni ne in gi chikegi moko ma niluwo, to sani koro isefwenyo ni chike Jehova e ma beyo mogik. (Zab. 1:1-3; som 1 Johana 5:3.) Temie paro puonj ma Muma chiwo ne chwo, mon, jonyuol, kod nyithindo. (Efe. 5:22–6:4) Nyaka bed ni iseneno iwuon kaka puonj mag Muma osekelo mor e odu. Bende, nyalo bedo ni timbeni tinde beyo mana nikech iluwo puonj ma Jehova chiwo e wi yiero osiepe mowinjore. Donge tinde iwinjo ka imor gadier? (Nge. 13:20; 1 Kor. 15:33) Samoro gik mowach malogo osetimore e ngimani.

15. Ang’o ma inyalo timo kinde ma iyudo ka ok yotni tiyo gi puonj ma ni e Muma?

¹⁵ Nitie kinde ma ok nyal bedoni mayot ng’eyo kaka onego iti gi puonj moko ma ni e Muma. Mano e momiyo Jehova osemiyowa buge ma lero Muma kokalo kuom riwruok mar ogandane mondo okonywa pogo gik ma kare gi gik ma ok kare. (Hib. 5:13, 14) Sama ipuonjori bugego, ibiro neno kaka gikonyi, kendo ibiro medo gombo bedo e riwruok mar oganda Jehova.

16. Ere kaka Jehova osechano joge?

¹⁶ Puonjri hero yo ma Jehova ochanogo joge, kendo iriw chenrono lwedo. Jehova osechano mondo joge obed e kanyakla mopogore opogore; Yesu Wuod Nyasaye e Wi kanyaklago duto. (Efe. 1:22; 5:23) Yesu oseketo owete moko mowal ma kwan-gi nok mondo ota tich ma odwaro ni otim e kindegi. Yesu noluongo owetego ni “jatich mogen kendo mariek,” kendo gikawo mapek tich momigi mar miyi chiemb chuny, kendo konyi mondo ibed gi winjruok maber gi Jehova. (Mat. 24:45-47) Achiel kuom yore ma jatich mogen nyisogo ni odewi en kuom keto owete molony mondo obed jokwath. (Isa. 32:1, 2; Hib. 13:17; 1 Pet. 5:2, 3) Jodong-kanyakla oikore hoyi, konyi, kendo siri e  yo moro amora mondo imed sudo machiegni gi Jehova. Kata kamano, achiel kuom gik madongo ma gibiro konyi timo en ng’eyo kaka inyalo konyo jomamoko mondo giher Jehova.​—Efe. 4:11-13.

17. Ka luwore gi Jo-Rumi 10:10, 13, 14, ang’o momiyo wapuonjoga ji e wi Jehova?

¹⁷ Kony jomamoko mondo giher Jehova. Yesu nochiko jolupne mondo gipuonj jomoko e wi Jehova. (Mat. 28:19, 20) Wanyalo luwo aluwa chikno mana nikech idwaro ni watim kamano. Kata kamano, kaka imedo hero Jehova, in bende ibiro winjo e chunyi kaka Petro gi Johana ma nowacho niya: “Ok wanyal weyo wuoyo e wi gik ma waseneno kendo ma wasewinjo.” (Tich 4:20) Achiel kuom gik ma morowaga ahinya en sama wakonyo ng’ato mochako hero Jehova. Tem ane paro kaka Filipo ne mor ka ne okonyo Ja-Ethiopiacha ng’eyo adiera ma ni e Ndiko mi obatise! Sama iluwo ranyisi mar Filipo kaachiel gi chik ma Yesu nomiyowa ni wadhi wayal ne ji, inyiso ni igombo bedo achiel kuom Joneno mag Jehova. (Som Jo-Rumi 10:10, 13, 14.) Mano e kinde ma samoro in bende ibiro penjo penjo ma Ja-Ethiopiacha nopenjo. Nopenjo niya: “Be nitie gima dimi kik batisa?”​—Tich 8:36.

18. Ang’o ma wabiro nono e sula ma luwo?

¹⁸ Batiso en okang’ maduong’ ahinya ma inyalo kawo e ngimani. Nikech mano, dwarore ni ipar matut gimomiyo idwaro ni obatisi. Gin weche mage monego ing’e e wi batiso? Ang’o monego itim ka pok obatisi kod bang’ ka osebatisi? Wabiro yudo dwoko mag penjogo e sula ma luwo.