Marta ma en achiel kuom Joneno mag Jehova e piny Guatemala osebedo ka puonjore dho Kekchi mondo opuonj joma wacho dhokno adiera mag Muma. Chieng’ moro noneno dichwo moro ka wuok e osiptal. Dichwono ne chalone achiel kuom joma odak Kekchi ma en gweng’ moro manie gode ma Joneno mag Jehova ok hinyga lendoe. Marta nodhi ir dichwono mochako wuoyo kode kotiyo gi weche matin ma nosepuonjore e dho Kekchi.

 Marta nonyiso dichwono chenro ma wan-gago mar puonjo ji Muma. Dichwono noyie gi chenrono, kata kamano, nowacho ni noonge gi pesa monyalo chulo mondo opuonje Muma. Marta nolerone ni Joneno mag Jehova puonjoga ji Muma ma onge chudo moro amora. Bende, nonyise ni ginyalo kata puonjore ka gitiyo gi simu, kendo ni joode duto bende ne nyalo bedo e puonjruogno. Dichwono noyie puonjore Muma. Nikech dichwono ne nyalo somo dho Spain kendo ndike, Marta nomiye Muma Maler​—Loko mar Piny Manyien mar dho Spain. Bende, nomiye bug Ang’o ma Muma Puonjo Kuom Adier? mar dho Kekchi. Juma ma noluwo, dichwono, jaode, kod nyithinde ariyo nochako puonjore Muma gi Marta ka gitiyo gi simu. Ne gipuonjorega diriyo e juma. Marta wacho kama: “Nikech ne ok ang’eyo wacho dho Kekchi maber, ne wapuonjorega gi dho Spain, kae to dichwono ne lokoga ne jaode gik ma wawacho. Nyithindgi to ne winjo dho Spain maber.”

 Dichwono ne en pasta e kanisgi. Nochako puonjo jokanisgi gik ma nopuonjore. Jokanisgigo ne mor winjo gik ma nopuonjorego kendo ne gipenje kama nosepuonjoree weche manyien-go. Ka ne onyisogi wach puonjruokne mar Muma, gin bende ne gichako biro e puonjruogno mosmos. Mapiyo nono, chiegni ji 15 ne chokorega juma ka juma mondo gipuonjre Muma gi Marta. Bang’ kinde, ne gichako keto maikrofon but simu mondo ji duto ma nobiro e puonjruogno owinji.

 Ka ne Marta onyiso jodong-kanyaklagi wach jopuonjrego, achiel kuom jodongogo nolimo gweng’ ma ne jopuonjrego odakie. Jaduong’no nogwelo jogo mondo gibi giwinj twak ma jarit-alwora a ne dhi golo e gweng’ moro man machiegni kodgi. Mondo ng’ato ochop e gweng’ machielono, ne dwarore ni oidh mtoka kuom sa achiel kae to owuoth gi tiende kuom seche ariyo. Jopuonjrego noyie, kendo 17 kuomgi nodhi mowinjo twagno.

 Jumbe moko bang’e, jarit-alworano kaachiel gi Joneno mamoko nolimo gweng’no kendo ne gibedo kuno kuom odiechienge ang’wen. E seche mag okinyi, ne ginenoga vidio mag dho Kekchi ma yudore e websaitwa mar jw.org, kae to ne gipuonjore brosua mar Gin Jomage Matimo Dwaro mar Jehova e Kindegi? E seche mag odiechieng’ ne ginenoga vidio mopogore opogore mag JW Broadcasting. Jarit-alworano notimo chenro mondo ng’ato ka ng’ato kuom jogo oyud ng’at ma puonje Muma.

 E odiechienge ang’wen-go, Jonenogo nolendo e gwenge man machiegni kanyo, kendo ne gigwelo ji e chokruok moro makende. Ji 47 nobiro e chokruogno kendo owete ma ne ni kanyo nonyisogi chenro mar puonjruok mar Muma. Joot 11 ma ne ni kanyo noyie mondo opuonjgi Muma.

 Dweche moko matin bang’e, jodong-kanyakla nochano ni gitimga chokruoge e giko juma ka juma e gweng’no. E kindegi, ji ma dirom 40 biroga e chokruoge ma ok gibare. Kendo ka ne owete otimo Rapar mar tho Yesu e gweng’no, ne gimor ahinya ka ne ji 91 obiro.

 Marta paro wechego duto kowacho kama: “Adwoko mana ne Jehova erokamano. Nitie sama anenoga ni ok atim mathoth e tij Jehova. Kata kamano, wan mana gige tich e lwet Jehova. Nong’eyo chuny jogweng’no kendo noywayogi ir joge. Jehova oherogi ahinya.”