MUTWE WA MWANDA WA PA KIBALU | LELO BATUMONI BA YEHOVA I BĀNI?
Lelo I Bika Bikulupile Batumoni ba Yehova?
Batumoni ba Yehova bakulupile’mba “Kisonekwa kyonso i kisonekejibwe na mushipiditu wa Leza kadi i kya kamweno.” (2 Temote 3:16) Twingidijanga Bible bu kalombwe wa bine pa kwifunda myanda ya Mupangi ne pa kwikala na būmi bulumbuluke.
Bible unena amba: “Bayūke’mba, abe enka, wa dijina dya bu-Yehova, Wi Mwine mukatakata mwine panopantanda ponsololo.” (Ñimbo 83:18) Nanshi, byotudi Batumoni, twikankilanga’ko kutōta enka Yehova Leza kete ne kuyukanya dijina dyandi dya bunka.—Isaiah 43:10-12.
Byotudi bene Kidishitu tukulupile amba Yesu, i “Mwanā Leza,” * wāile pano panshi ne kwikala bu Meshiasa. (Yoano 1:34, 41; 4:25, 26) Yesu pa kufwa, wāsangwilwa kokwa kūlu. (1 Kodinda 15:3, 4) Mwenda mafuku wāikala Mulopwe wa Bulopwe bwa Leza. (Kusokwelwa 11:15) Buno Bulopwe i umbikalo wa bine mwine ukajokeja Paladisa pano panshi. (Danyele 2:44) Bible unena amba, “bakikōkeji bakapyananga ntanda; kadi bakēsangaja mu bungi bwa ndoe.”—Ñimbo 37:11, 29.
“Kitatyi kyobadi batanga mu Bible, bamwene amba Leza wisambanga nabo. Nansha byobadi batanwa na makambakano a mu būmi, bakimbile mu Kinenwa kya Leza madingi mafike’po. . . . Bamwene amba, Kinenwa kya Leza i kyūmi.”—Benjamin Cherayath mwendeji wa kipwilo kya Katolika, julunale wa mu Alemanye witwa Münsterländische Volkszeitung
Batumoni ba Yehova bakulupile amba misoñanya ya mu Bible i imwenwa’mo kamweno nansha ke dyalelo dine. (Isaya 48:17, 18) Kadi, tulamete bininge ku ino misoñanya. Kimfwa, mwanda Bible witudyumuna kwepuka kulonga bilongwa bibwanya kusubija milangwe ne ngitu yetu, ketufwaninwepo kutoma mfwanka nansha bintu bikolwañana. (2 Kodinda 7:1) Tufwaninwe kadi kwepuka bilongwa bipelejibwe mu Bible, pamo bwa bunkolwankolwa, busekese ne bwivi.—1 Kodinda 6:9-11.
^ mus. 5 Bible wisambila kadi padi Yesu bu “Mwana mubutulwe bunka wa Leza” mwanda i aye umbajinji kadi wāpangilwe enka na Yehova kete.—Yoano 3:18; Kolose 1:13-15.