Kusengibwa—ne Kusenga Bakwabo

Byotudi bantu bakubulwa kubwaninina batwe bonso tubelanga, bamo babela’nka ne misongo mikomo. Le tukanekenya namani shi tubatanwa na bino bikoleja?

Bukwashi bwakamweno pa kunekenya i bwa kusengibwa na kisaka, balunda ne banabetu mu lwitabijo.

Kanye ka mulunda ne binenwa bya buswe, bibwanya kwikala bu māni a kwitundapa ne kwitutalaja mutyima. (Nk. 16:24; 18:24; 25:11) Ino, bene Kidishitu ba bine kebatelepo mutyima bininge’nka ku kusengibwa. Babadikilanga ‘kusenga boba badi mu byamalwa, shi bika, shi bika, ponka pa kanye ka kusengwa kobasengibwa abo bene kudi Leza.’ (2 Kod. 1:4; Luka 6:31) Antonio, mutadi wa distrike wa mu Meksike wēmwenine kino.

Pobāmukwete misongo ya lymphome, muswelo wa misongo ya dyaya dya mu mashi, Antonio wātyintyidilwe na njia. Inoko wānekenye milangwe yandi mibi. Namani? Na kuvuluka ñimbo ya Bulopwe ne kwiimba mwanda wa kwivwana binenwa ne kulangulukila’po. Kulombela na diwi ditunduke ne kutanga Bible nako kwāmusengele bininge.

Pano Antonio i mujingulule’mba, bukwashi bukatampe bwātambile kudi banababo mu lwitabijo. Unena’mba: “Kitatyi kyotwāzumbije mutyima ami ne wami mukaji, twāityile mubutule umo kadi mukulumpe pa kipwilo āye alombele netu. Kino kyētusengele ne kwitutalaja mutyima.” Ubweja’ko amba, “kulangulukila’tu pa bukwashi bwa kyetu kisaka ne bwa banabetu mu lwitabijo kwētukweshe tunekenye milangwe mibi mu kitatyi kityetye.” Bine wāfwijije’ko bininge pa kwikala na bano balunda ba buswe ne bakilelo!

Kintu kikwabo kibwanya kwitukwasha mu bitatyi bya tusua i mushipiditu sandu wālailwe. Mutumibwa Petelo wānene amba, mushipiditu sandu wa Leza i “kyabuntu.” (Bil. 2:38) Bino binenwa byāfikidile kitatyi kyāshingilwe bantu bavule māni pa Pentekosa 33 K.K. Kadi batwe bonso tudi na kyabuntu kya mushipiditu sandu. Byokipānwanga pampikwa mfulo, penepa ubulwe’po kulomba’kyo?—Is. 40:28-31.

TA MUTYIMA BININGE BOBA BASUSUKA

Mutumibwa Polo wāuminine bikoleja bivule, kyaba kimo’nka ne bikoleja bileta lufu. (2 Kod. 1:8-10) Ino, Polo kādipo na moyo wa lufu. Wāsengelwe pa kuyuka’mba Leza udi nandi. Wāsonekele amba: “Atotwe ne kutotwa Leza Shandya Mfumwetu Yesu Kidishitu, Shandya byalusa, Leza wa kanye ka kusenga konso; wakwitusenga mu byamalwa byetu byonso.” (2 Kod. 1:3, 4) Polo kālekelepo makambakano amutyintyidile. Ino matompo aāūminine amukweshe atamije lusa lwa bu bana na bana’mba, akumbanye senene mwa kusengela bakwabo mu bitatyi byobasakilwa bukwashi.

Antonio pa kukoma, wābwenye kujokela mu mwingilo wa kwendakana. Wādi utele nyeke mutyima banababo mu lwitabijo, inoko pano aye ne wandi mukaji baloñanga bukomo bukatampe bwa kupempula ne kukankamika babela. Kimfwa, pa kupwa kupempula mwine Kidishitu umo wadi ubela bininge, Antonio wājingulwile’mba uno tutu kādipo usaka kutanwa ku kupwila. Antonio ushintulula amba, “kekunenapo amba kādipo usenswe Yehova ne banabetu, ino i misongo yāikele na lupusa pa milangwe yandi mine yādi keimulengeja emone bu wa mpikwa mvubu.”

Kintu kimo kyālongele Antonio pa kukankamika uno tutu, i kumunena alombele ku kwibunga kwa kyungwija. Nansha byādi biivwana uno tutu bu kafwaninwepo, ino wāitabije lwito. Antonio usekununa amba: “Walombela ino milombelo miyampe, kupwa weivwana bu muntu mukwabo. Weivwana bu udi na mvubu.”

Bine, mu ludingo lukatampe nansha lutyetye, batwe bonso twāfikilwe na masusu kampanda. Inoko, enka na mwānene’kyo Polo, kino kibwanya kwitukumbanya mwa kusengela bakwetu kitatyi kyobasakilwa bukwashi. Nanshi, tutenekwei na misongo ya banabetu bene Kidishitu ne kwiula Yehova wetu Leza, na kwikala nsulo ya busengi bwa kusenga bakwetu.