KESHAI’NKA KUKESHA!
Kwikala’ko kwa Kyanga Kikomo Ntanda Yonso—Le Bible Unena’po Namani?
Mu Kweji 7, 2022, mwadi malapolo alombola’mba kubaikala kyanga kikomo ntanda yonso:
“Uno ke musunsa wa bubidi mu uno kweji obadyumuna bantu kudi ba lupusa ba mu Shine amba, kusa kwikala kyanga kikomo mu bibundi kubwipi kwa 70.”—25 Kweji 7, 2022, CNN Wire Service.
“Mu Bulaya mudi kyanga kikomo ke kyamwekele kashā, o mwanda mu matanda mavule i batambwe na mudilo wa mu ntanda.”—17 Kweji 7, 2022, The Guardian.
“Mu Dya Yenga, kwadi kyanga kikomo ke kyamwekele kashā mu bibundi bivule bya mu États-Unis.”—24 Kweji 7, 2022, The New York Times.
Le bino byonso bilombola bika? Le kumeso’ku bisa kukoma kushikata pa ino ntanda? Le Bible unena’po namani?
Le kwikala’ko kwa bitatyi bya kyanga kikomo i kufikidila kwa bupolofeto bwa mu Bible?
I amo. Bitatyi bya kyanga kikomo kya ntanda yonso bikwatañene na byobya byālaile Bible amba bisa kulongeka mu ano etu mafuku. Kimfwa, Yesu wālaile amba tukamonanga “binkumbulu bilenga moyo,” nansha “bya kulengeja moyo ne biyukeno bikatampe.” (Luka 21:11; Dibuku Dijila) Kukanda kwa kyanga ntanda yonso i kulengeje bantu bavule bakwatwe moyo amba bintu bilonga bantu, bisa kona ntanda tukomenwe kushikata’po.
Le bikakoma kushikata pa ino ntanda?
Aa. Leza wāpangile ntanda mwanda wa bantu bashikate’po lonso. (Ñimbo ya Mitōto 115:16; Musapudi 1:4) Leza kasapo kutala bitupu bantu bonakanye ntanda, ino usa “konakanya boba bonakanya ntanda.”—Kusokwelwa 11:18.
Tala’tu buno bupolofeto bubidi bulombala bintu bikwabo bilaile Leza:
“Mu ntanda mutuputupu ne ntanda myūmu tē bikasepelela, kadi dilungu mudi zolē dikasangala ne kutōya maluba pamo bwa safelona.” (Isaya 35:1) Leza kakalekapo ntanda ikale bwa mu ntanda mutuputupu mwampikwa kushikata bantu, ino usa kulongolola bifuko byonso byonekele.
“Utalanga ntanda, wiilengeja ipe bipa bingi ne kwiipeteja bininge.” (Ñimbo ya Mitōto 65:9) Na bukwashi bwa Leza, ntanda isa kwikala ke paladisa.
Shi usaka kuyukila’ko bivule pa kushinta kwa mwikadilo wa kūlu mokufikidijija bupolofeto bwa mu Bible, tanga kishinte “Les changement climatiques et notre avenir: qu’en dit la Bible ?”
Shi usaka kuyukila’ko bivule pa mulao wa kulongololwa kwa bifuko byonekele pano pa ntanda, tala kishinte “Le I Ani Ukakūla Ntanda?”
Tala'po Bidi ne Bino:
BIPANGUJO BYA MU BIBLE BILONDOLWELWE
Le Kiyukeno kya “Mafuku a Mfulo,” Nansha “Kyaba kya ku Mfulo” I Kiyukeno’ka?
Bible utela ngikadilo nansha bintu byadi bya kulongeka kumeso kwa “mfulo ya ntanda.”
ESSENTIAL BIBLE TEACHINGS
Mwanda waka Leza wāpangile ntanda?
Ntanda yetu i miyule’mo bintu bilumbuluke. I mitūlwe pa kifuko kifwaninwe na ku dyuba, ijinanga na kulonda ndudi, ne kujokoloka na lubilo lufwaninwe. Mwanda waka Leza wālongele bukomo pa kupanga ntanda?
BIPANGUJO BYA MU BIBLE BILONDOLWELWE
Lelo Ntanda Ikonakanibwa?
Byobya binena Bible bibwanya kukutulumuja.
