Bendeji ba ntanda yonso ne malongolodi a matanda keabwenyepo kuleta ndoe. Tamba pa Divita dya Ntanda dya II, pano po pene pokwaikala kubulwa kumvwañana. Kintu kya bantu midiyala ibidi—ko kunena’mba kipindi kimo pa bipindi biná bya bantu ba pano pa ntanda, badi mu bifuko mudi tuvutakanya.

 Mwanda waka bantu i bakomenwe kutūla’ko ndoe? Le Bible unena’po namani?

1.  1. Bantu badi na mwikadila wibalengeja bakomenwe nansha kutompa kulonga ndoe. Bible wālaile amba mu kino kyetu kitatyi, “bantu bakekala ba kwisanswa abo bene, ba kusanswa lupeto, ba kwitumbika, ba kwizunzula, . . . ba kubulwa lulamato, . . . bapela kumvwañana ko-konso, . . . ba kubulwa kwīfula, ba bukalabale bwa malwa, . . . ba mitwe myūmu, bayule mitatulo.”—2 Temote 3:2-4.

2.  2. Bantu, ekale muntu wa pandi wa pandi nansha mu kikonge, kebadipo na bukomo bwa kupwija makambakano abo pampikwa bukwashi bwa Umpangi wabo, Yehova a Leza. Bible ulombola’mba “muntu wenda kadipo na lupusa lwa kōlola ditabula dyandi.”—Yelemia 10:23.

3.  3. Ntanda idi mu lupusa lwa mwendeji mukomo kadi mubi, Satana Dyabola, mwine “ongolanga ntanda yonso ikelwe na bantu.” (Kusokwelwa 12:9) “Ntanda yonsololo [byoikidi] mu lupusa lwa yewa mubi,” kukekala’nka mavita ne kubulwa kumvwañana.—1 Yoano 5:19.

 Bible witukulupija’mba Leza ye usa kuleta ndoe, ke bantupo.

•   “‘Mwanda ndyukile biyampe milangwe yonemulangila,’ i Yehova unena, ‘milangwe ya ndoe, ke ya kyamalwapo, mwanda wa kwimupa būmi bwa kumeso ne lukulupilo.’”—Yelemia 29:11.

 Le Leza ukafikidija namani uno mulao? “Leza mwine upāna ndoe usa kusonsakanya Satana.” (Bene Loma 16:20) Leza usa kwingidija buludiki bwa momwa mūlu, bwine butela Bible bu “Bulopwe bwa Leza,” mwanda wa kutūla’ko ndoe ntanda yonso. (Luka 4:43) Yesu Kidishitu, Mulopwe wa buno Bulopwe pasa kushilula kuludika, bantu basa kufundijibwa mwa kwikadila mu ndoe.—Isaya 9:6, 7.

•   Pa kuyukila’ko bivule, tanga kishinte kinena’mba “Le Bulopwe bwa Leza Bukalonga Bika?”