Mu matanda mavule, Leta i mupeleje muntu kwifwena na muntu mukwabo, ne bantu kwibunga. Batumoni ba Yehova bakōkele ino mbila koku kadi bapwila pambulwa kwitūla mu kyaka. Pa kufikila’po, bipwilo bipwilanga kupityila ku mpangiko ya mavideo pa Entelenete, kimfwa ya Zoom.

 Mwanda wa mpangiko ya kupwila ikale yendelela biyampe kadi yambulwa kyaka, Kitango Kyendeji kyaitabije kwingidija byabuntu biletwa, mwanda wa kupota’ko konte ya Zoom ya bipwilo. Kino i kikwashe bya binebine bipwilo byadi bikomenwa kufikila pa madolala 15 kutūla ku 20, nansha ne kupita, a kupota nao makonte akwasha kulonda mpangiko ku mavideo pa Entelenete. Bino bipwilo, divule byadi bingidija mampangiko a ku bitupu atwela’ko bantu batyetye’tu, kadi ampikwa kukingwa senene. Bipwilo byonso bingidija makonte a Zoom aletele bulongolodi, bimwenanga mu mpangiko mikingwe ipēla kwingidija, kadi ikwasha bantu bavule belunge pa kulonda kupwila ko-konso. Kufika pano, bipwilo 65 000 ne kupita bingidijanga ano makonte mu matanda 170 ne kupita.

 Kipwilo kya Kairagi, mu Manado, mu Sulawesi wa Kungala, mu Indonesie, kyalekele kwingidija konte ya ku bitupu ya kulonda mpangiko ku mavideo pa Entelenete, kyaingidija konte ya Zoom iletele bulongolodi. Tutu Hadi Santoso unena’mba: “Ne batutu ne bakaka bakolelwa kwingidija senene matelefone pano balondanga biyampe kupwila, nakampata mwanda pano kupwila kekukiketekangapo kyaba ne kyaba bilomba belunge monka mhm.”

 Lester Jijón, mukulumpe mu Kipwilo kya Guayacanes Oeste mu Guayaquil, ya mu Équateur, unena’mba: “Pa mwanda wa kubulwa lupeto kwa batutu ne bakaka bavule, bipwilo bimo kebyadipo bya kubwanya kupota licence ya Zoom ibwanya kukwasha bonso mu kipwilo balonde kupwila. Ino pano tufwija’ko bininge bulongolodi, mwanda konte ya Zoom yotudi nayo pano, ilengeja twite bantu bavule ku kupwila pambulwa kutyina’mba bisa kuketekaketeka.”

 Johnson Mwanza, mukulumpe mu Kipwilo kya Ngwerere Nord mu Lusaka, mu Zambia, walembele amba: “Batutu ne bakaka bavule banenanga kyaba kyonso amba, ‘mpangiko ya bulongolodi ya Zoom itufwenyanga kudi batutu ne bakaka kadi ilengejanga twiivwane’mba Yehova witusenswe ne kwituta mutyima.’”

 Makonte a Zoom apotwanga na lupeto lwa kukwasha nalo mu bimpengele. Luno lupeto, lutambanga ku byabuntu bya kukwatakanya mwingilo wa ntanda yonso. Bino byabuntu bivudile kutūlwa na kutwela mu donate.isa4310.com. Mwafwaiko ne kuleta byabuntu na mutyima tō, bikwasha ne ku bimpengele bikwabo ntanda yonso.—2 Kodinda 8:14