Bene Levi 23:1-44
23 Yehova wesamba monka na Mosesa amba:
2 “Wisambe na bene Isalela wibalombole amba, ‘Masobo a bitatyi+ a Yehova omufwaninwe kusapula+ i bitango bijila. Ano’a i masobo ami a bitatyi:
3 “‘Mukengila mafuku asamba, ino difuku dya busamba-bubidi i sabato ya kukōkolokwa ku byonso,+ i kitango kijila. Kemubwanyapo kwingila mwingilo nansha umo. Ifwaninwe kwikala sabato kudi Yehova konso komushikete.+
4 “‘Ano’a i masobo a bitatyi a Yehova, bitango bijila byomufwaninwe kusapula pa kitatyi kyobitungilwe:
5 Mu kweji mubajinji, mu difuku dya 14 dya kweji,+ pa kapita i kāni* i Pashika+ kudi Yehova.
6 “‘Mu difuku dya 15 dya uno kweji i Masobo a Mikate Yampikwa Kiyujo kudi Yehova.+ Mukadya mikate yampikwa kiyujo mu mafuku asamba-abidi.+
7 Mu difuku dibajinji, mukekala na kitango kijila.+ Kemufwaninwepo kwingila mwingilo mukomo nansha umo.
8 Ino mukaleta kyamulambu kyelwe na mudilo kudi Yehova mu mafuku asamba-abidi. Kukekala kitango kijila mu difuku dya busamba-bubidi. Kemufwaninwepo kwingila mwingilo mukomo nansha umo.’”
9 Yehova wesamba monka na Mosesa amba:
10 “Wisambe na bene Isalela wibalombole amba, ‘Pomukatwela mu ntanda yonemupa ne mubaangula byangulwa byayo, mufwaninwe kuselela kudi kitobo kīta kimo kya byangulwa bibajinji+ bya mu mwangulo wenu.+
11 Nandi ukapēpeja kīta’kya koku ne koku ku meso a Yehova amba mumone kwitabijibwa. Kitobo ukekipēpeja mu difuku dilonda Sabato.
12 Mu difuku dyobakapēpeja kīta, mufwaninwe kulambula mukōko mulume mwana wampikwa bulema wa mwaka umo ne kwika, bu kyamulambu kisōkwe kudi Yehova.
13 Kyamulambu kyakyo kya miseke kikekala kya bipindi bibidi bya pa bipindi dikumi bya efa* wa bukula bupēla butyange na māni, bu kyamulambu kyelwe na mudilo kudi Yehova, luvumba luyampe.* Kyamulambu kyakyo kya bitomibwa kikekala kya kipindi kimo kya pa bipindi biná bya hina* wa vinyu.
14 Kemufwaninwepo kudya mikate, miseke mikange, nansha miseke mipya kufika ne ku dino difuku, enka ne byomusela kyamulambu kya Leza wenu. I kitungo kya myaka na myaka ku nkongo yenu yonsololo konso komushikete.
15 “‘Mukabala masabato asamba-abidi tamba difuku dilonda dya Sabato, tamba difuku dyomusela kīta kya kyamulambu kya kupēpeja.+ Akekala mayenga matuntulu.
16 Mukabala mafuku 50+ kufika ne mu difuku dilonda Sabato wa busamba-bubidi, penepa kemuleta kyamulambu kya miseke mipya kudi Yehova.+
17 Mukasela mu bīkalo byenu mikate ibidi bu kyamulambu kya kupēpeja. Ino’i ikalongwa na bipindi bibidi bya pa bipindi dikumi bya efa* wa bukula bupēla. Ikalongwa na kiyujo,+ bu byangulwa bibajinji byele kudi Yehova.+
18 Kadi mukaleta pamo ne mikate’ya twana twa mikōko tulume tusamba-tubidi twampikwa bulema, twa mwaka umo umo, ne ñombe mwana umo ne mikōko milume ibidi.+ Bikekala ke kyamulambu kisōkwe kudi Yehova pamo ne kyamulambu kya miseke ne byamulambu bya bitomibwa bidingakene, bu kyamulambu kyelwe na mudilo, kya luvumba luyampe* kudi Yehova.
19 Kadi mufwaninwe kulambula mbuji mwana umo bu kyamulambu kya bubi+ ne twana twa mikōko tubidi tulume, twa mwaka umo umo, bu kitapwa kya kipwano.+
20 Kitobo ukapēpeja’byo koku ne koku pamo ne mikate ya byangulwa bibajinji byele, bu kyamulambu kya kupēpeja ku meso a Yehova, ne twana twa mikōko tulume tubidi. Bikekala bu kintu kya kitobo kijila kudi Yehova.+
21 Mu dine difuku’dya mukela lubila+ lwa kitango kijila komudi. Kemukengilapo mwingilo mukomo nansha umo. I kitungo kya myaka na myaka mu bīkalo byenu byonso ku nkongo yenu yonsololo.
22 “‘Shi mubaangula mwangulo wa mu ntanda yenu, kemufwaninwepo kwangudidila kufulakufula kwa madimi enu kadi kemufwaninwe kukōkolola byobya bishala ku mwangulo wenu.+ Mufwaninwe kushila’byo mulanda*+ ne mweni wa kibundi.+ Amiwa ne Yehova Leza wenu.’”
23 Yehova wesamba monka na Mosesa amba:
24 “Lombola bene Isalela amba, ‘Mu kweji wa busamba-bubidi, mu difuku dibajinji dya kweji, mufwaninwe kukōkolokwa ku byonso, kivulukilo kisapulwa na kwila bimpungidi,+ kitango kijila.
25 Kemukengilapo mwingilo mukomo nansha umo, kadi mukaleta kyamulambu kyelwe na mudilo kudi Yehova.’”
26 Yehova wesamba monka na Mosesa amba:
27 “Inoko, mu difuku dya dikumi dya uno kweji wa busamba-bubidi i Difuku dya Kupūta Bubi.+ Mukekala na kitango kijila, kadi mufwaninwe banwe* kwikala na bulanda+ ne kuleta kyamulambu kyelwe na mudilo kudi Yehova.
28 Kemufwaninwepo kwingila mwingilo nansha umo mu dino difuku dya pa bula mwanda i difuku dya kupūta bubi+ mwanda wa kwimupūtyila bubi ku meso a Yehova Leza wenu.
29 Yewa ense* kakekalapo na bulanda* mu dino difuku ukatyibwa’ko* mu bantu bandi.+
30 Kadi nkonakanya mu bantu bandi muntu* ense wingila mwingilo o-onso mu dino difuku.
31 Kemufwaninwepo kwingila mwingilo nansha umo. I kitungo kya myaka na myaka ku nkongo yenu yonsololo konso komushikete.
32 I sabato ya banwe kukōkolokwa ku byonso, kadi banwe* mukekala na bulanda+ mu difuku dya kitema dya kweji ku kyolwa. Mufwaninwe kulama sabato yenu tamba kyolwa kufika ne ku kyolwa kikwabo.”
33 Yehova wesamba monka na Mosesa amba:
34 “Lombola bene Isalela amba, ‘Mu difuku dya 15 dya uno kweji wa busamba-bubidi i Masobo a Bitanda* a mafuku asamba-abidi kudi Yehova.+
35 Kukekala kitango kijila mu difuku dibajinji, kemukengilapo mwingilo mukomo nansha umo.
36 Mufwaninwe kuleta kyamulambu kyelwe na mudilo kudi Yehova mu mafuku asamba-abidi. Mu difuku dya mwānda mukekala na kitango kijila,+ kadi mufwaninwe kuleta kyamulambu kyelwe na mudilo kudi Yehova. I kitango kikola. Kemukengilapo mwingilo mukomo nansha umo.
37 “‘Ano’a i masobo a bitatyi+ a Yehova omufwaninwe kusapula bu bitango bijila+ mwanda wa kuleta kyamulambu kyelwe na mudilo kudi Yehova: kyamulambu kisōkwe+ ne kyamulambu kya miseke+ kya kitapwa ne byamulambu bya bitomibwa+ mungya mobipangilwe difuku ne difuku.
38 Bino’bi i bya kutentekela pa byobya bilambwilwe mu masabato a Yehova,+ ne byabuntu byenu,+ byamulambu byenu bya mpiko,+ ne byamulambu byenu bya kwilanga,+ byomukapa Yehova.
39 Inoko, mu difuku dya 15 dya kweji wa busamba-bubidi, shi mubakongakanya bipa mu ntanda’ya, mukasoba masobo a Yehova mu mafuku asamba-abidi.+ Mu difuku dibajinji i kukōkolokwa ku byonso ne mu difuku dya mwānda i kukōkolokwa ku byonso.+
40 Mu difuku dibajinji, mukayata bipa bya mityi milumbuluke, malala a tunkindu,+ misambo ya mityi ya mani mangimangi ne mityi ya myelebi ya mu musanza,* kadi mukasangala+ ku meso a Yehova Leza wenu mu mafuku asamba-abidi.+
41 Mukasoba’o bu masobo a Yehova mu mafuku asamba-abidi mwaka ne mwaka.+ Mukasoba’o mu kweji wa busamba-bubidi, bu kitungo kya myaka na myaka ku nkongo yenu yonsololo.
42 Mukashikata mu bitanda mafuku asamba-abidi.+ Bene Isalela bonso bakashikata mu bitanda,
43 mwanda wa nkongo yenu ikāya’ko iyuke+ amba i mu bitanda monashikatyije bene Isalela ponebalupwile mu ntanda ya Edipito.+ Amiwa ne Yehova Leza wenu.’”
44 Penepo Mosesa wasapwila bene Isalela masobo a bitatyi a Yehova.
Kunshi kwa Dyani
^ Kishima pa kishima i, “pa bukata bwa byolwa bibidi.”
^ Bipindi bibidi bya pa bipindi dikumi bya efa i malitele 4,4 (makwatyi 4 a byūmu). Tala Mbwejo B14.
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Hina umo i malitele 3,67. Tala Mbwejo B14.
^ Bipindi bibidi bya pa bipindi dikumi bya efa i malitele 4,4 (makwatyi 4 a byūmu). Tala Mbwejo B14.
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “kimonya-malwa.”
^ Nansha’mba “myuya yenu.” “Kwikala na bulanda” kwivwanwanga divule bu kushintulula miswelo palapala ya kwipela, kubadila’mo ne kushikilwa na nzala.
^ Nansha’mba “muya onso.”
^ Bibwanika padi i, “kashikilwapo na nzala.”
^ Nansha’mba “ukepaibwa.”
^ Nansha’mba “muya.”
^ Nansha’mba “myuya yenu.”
^ Nansha’mba “Mwa Kufyama Kyaba Kityetye.”
^ Nansha’mba “kinekaneka.”
