Kishima “mūlu” i kingidijibwe mu Bible na buluji busatu bukatampe: (1) madiulu amweka na meso; (2) kīkalo kya mishipiditu; ne (3) kyelekejo kya kyepelo kya peulu, nansha kizunzulwe. Mu buluji bo-bonso, myanda isambilwepo ye ya kwitukwasha tuyuke buluji bwinebwine. a

1.   Madiulu amweka na meso. Mu buno buluji, “madiulu” afunkila pa lwelele lwa pa ntanda, mupukumanga luvula, mutumbukanga toni, munokanga mvula ne mashika mekwate, ne mupenanga mapeni. (Ñimbo ya Mitōto 78:26; Nkindi 30:19; Isaya 55:10; Luka 17:24) Abwanya ne kufunkila pa byaba bya kulampe, pa kifuko padi “dyuba ne kweji ne ñenyenye.”—Kupituluka mu Bijila 4:19; Ngalwilo 1:1.

2.   Kīkalo kya mishipiditu. Kishima “mūlu” kifunkila na pa madiulu a ku mushipiditu, nansha kīkalo kya mishipiditu, bantu badi peulu bininge kutabuka diulu ne ntanda bimweka na meso. (1 Balopwe 8:27; Yoano 6:38) Mu ano madiulu a ku mushipiditu ye mwikele Yehova Leza, aye “Mushipiditu,” ne bamwikeulu bapangile. (Yoano 4:24; Mateo 24:36) Kyaba kimo, “madiulu” elekejanga bamwikeulu ba kikōkeji, “kipwilo kya bajila.”—Ñimbo ya Mitōto 89:5-7.

    Kadi Bible wingidijanga kishima “madiulu” mwanda wa kufunkila pa kipindi kya mu kīkalo kya mishipiditu mwine mushikete Yehova, “mu kīkalo” kyandi. (1 Balopwe 8:43, 49; Bahebelu 9:24; Kusokwelwa 13:6) Kimfwa, Bible wālaile amba Satana ne bandemona bādi ba kwelwa pano panshi, ne kuleka kujokela monka ku meso a Leza. Inoko, bādi enka ba kushala bu bipangwa bya ku mushipiditu.—Kusokwelwa 12:7-9, 12.

3.   Kyelekejo kya kyepelo kya peulu nansha kizunzulwe. Bisonekwa bitelanga “mūlu” mwanda wa kwelekeja kyepelo kya peulu, nakampata mu mwanda utala balupusa baludika. Kino kyepelo kibwanya kwikala’po:

   •   Yehova Leza, Mfumu mwinē bukomo bonso.—2 Bilongwa bya Mafuku 32:20; Luka 15:21.

   •   Bulopwe bwa Leza, umbikalo ukapingakena pa buludiki bwa muntu. Bible utela buno Bulopwe bu “madiulu mapya.”—Isaya 65:17; 66:22; 2 Petelo 3:13. b

   •   Bene Kidishitu badi pano pa ntanda, badi na lukulupilo lwa kwenda mūlu.—Bene Efisesa 2:6.

   •   Maludiki a bantu ezunzwile ao mene pa babikalwa bao.—Isaya 14:12-14; Danyele 4:20-22; 2 Petelo 3:7.

   •   Mishipiditu mibi iludika ntanda dyalelo.—Bene Efisesa 6:12; 1 Yoano 5:19.

Le mūlu i bika?

 Kīkalo kya mishipiditu i kifuko kidi’mo mingilo mikatampe. Mudi bamwikeulu midiyo tutwa na tutwa “balonda kinenwa [kya Yehova].”—Ñimbo ya Mitōto 103:20, 21; Danyele 7:10.

 Bible unena’mba mūlu mudi kitōkeji kya kiké. (1 Temote 6:15, 16) Mupolofeto Ezekyele wāmwene mu kimonwa “kitōkeji kya kiké” mūlu, Danyele nandi wāmona mu kimonwa “kamunonga ka mudilo.” (Ezekyele 1:26-28; Danyele 7:9, 10) Mūlu i mujila, nansha mwampikwa disubi, kadi muyampe.—Ñimbo ya Mitōto 96:6; Isaya 63:15; Kusokwelwa 4:2, 3.

 Bintu binena Bible pa mwanda utala mūlu bileñanga moyo. (Ezekyele 43:2, 3) Inoko, bantu kebabwanyapo kwivwanija mwine mwikadile mūlu ne pa mfulo, mwanda ketubwanyapo kuyuka bipita mu kīkalo kya mishipiditu.