Bibele ibulela kuli Armagedoni haki ndwa yekaama feela sibaka silisiñwi mwa lifasi, kono ki ndwa yekaba teñi mwa lifasi kaufela mwahalaa Mulimu ni mibuso kaufela ya lifasi.

•   “Lipulelo zetile ka kususumezwa ki madimona . . . liya kwa malena ba lifasi kaufela, kubakubukanyeza hamoho kwa ndwa ya lizazi lelituna la Mulimu Yamaata Kaufela. . . . Zabakubukanyeza hamoho kwa sibaka sesibizwa Armagedoni ka Siheberu.”—Sinulo 16:14, 16.

 Linzwi la “Armagedoni” lizwa fa linzwi la Siheberu la Har Meghid·dohnʹ, lelitalusa “Lilundu la Megido.” Megido neli muleneñi one ufumaneha mwa Isilaele wa kwaikale. Ka lona libaka leo, batu babañwi balumela kuli ndwa ya Armagedoni ikabela mwa Israel. Nihakulicwalo, mwa sibaka sa Megido kamba mwa libaka zeñwi za kwa Middle East hakukoni kukopanela “malena ba lifasi kaufela” ni limpi zabona bakeñisa kuli hakuna sibaka sesituna fobakona kukwana.

 Buka ya Sinulo neiñozwi ka “kuitusisa lisupo,” kamba liswanisezo. (Sinulo 1:1) Armagedoni haiami kwa sibaka sa luli sa fa lifasi kono iama kwa kezahalo yekaezahala mwa lifasi kaufela, ili fo linaha likakopana hamoho kulwanisa bubusi bwa Mulimu lwa mafelelezo.—Sinulo 19:11-16, 19-21.