Kacenu, Lipaki za Jehova baamuhelanga hahulu lihatiso zetomile fa Bibele za kubalela fa tupangaliko ni mavidio amañata kufita lili kaufela. Kono mwa libaka zeñata za lifasi, mizwale ni likaizeli baluna bapalelwa kuba ni Intaneti bakeñisa kuli yatula. Mwa libaka zeñwi mona, Intaneti yayanga hañata-ñata, kamba mwendi lubilo lwayona halubangi hande, mi mane fokuñwi mwendi haibangi feela teñi.

 Nihakulicwalo, kwatabisa kuziba kuli mizwale ni likaizeli baluna babañata sebakona kuikungela lihatiso za kubalela fa tupangaliko niha kusina Intaneti! Taba yeo ikonahala cwañi?

 Kulukisizwe kuli liputeho zefumana taata kuba ni Intaneti libe ni kambokisi kakabizwa JW Box. Mwahali, kambokisi ka, kanani kapangaliko kakalekilwe kwa kampani yeñwi kakakonahalisa kuli lipangaliko likone kulumelana litaba fa Intaneti kamba kuamuhela litaba zezwa kwa sipangaliko sisili. Kambokisi kao hape kanani progilamu yelukisizwe ki ba Liluko la Likompyuta fa Betele, lihatiso za kubalela fa tupangaliko, ni mavidio afumaneha fa webusaiti ya jw.org. Mbokisi ni mbokisi ileka masheleñi abato eza K1,500.

 Mizwale ni likaizeli habali kwa Ndu ya Mubuso bakona kukonekita tupangaliko twabona kwa mbokisi ya JW Box kusina kuitusisa muhala, mi bakona kuikungela lihatiso ni mavidio. Mane nihaiba babanani lipangaliko zakale kamba zecipile bakona kukonekita. Kono ki nto mañi yetusa kuli JW Box ibe ni lihatiso zenca liputeho niha lisina Intaneti? Ofisi ya mutai ilumelanga liputeho ma USB ka nako ni nako. Yeñwi ni yeñwi ya ma USB ao ileka masheleñi abato eza K80, mi fateñi kubeiwanga litaba zeengilwe fa jw.org, ili zeshimbululelwanga fa JW Box.

 Mbokisi ya JW Box itusize cwañi mizwale baluna? Ndate lubasi yomuñwi yabizwa Nathan Adruandra, yapila kwa Democratic Republic of Congo, utalusa kuli: “Kuzwa feela kwamulaho, neninze nilika kuikungela vidio ya “Jehova, . . . Nisepile Wena” ni ya Muhupule Musalaa Lota. Kono nekupalile feela mi taba yeo yanizwafisa. Cwale senikona kuikungela mavidio a, fa foni yaka, mi taba ye itusa luna bashemi kuluta bana baluna.”

 Muzwale yomuñwi yatusanga liputeho za kwa Nigeria kuziba mwakuitusiseza JW Box utalusa kuli: “Mizwale ni likaizeli baanga JW Box kuba mpo yende hahulu yezwa ku Jehova. Batabile luli kuli cwale sekuli bunolo kuikungela lihatiso ni mavidio zeli kalulo ya Lihatiso Zeluitusisanga Kwa Kuluta Batu.”

 Tumbokisi totufitelela 1,700 setulumezwi kwa mizwale baluna kwa Africa, Oceania, ni South America, mi kopano isweli kueza litukiso za kuli liputeho zeñata zeñwi ni zona likone kulumelwa. Musebezi wo ulifezwi cwañi? Ulifezwi ka linubu zefiwanga kuli lituse mwa musebezi wa mwa lifasi kaufela, mi buñata bwa linubu zeo lifiwanga ka kuitusisa donate.isa4310.com. Lwaitumela luli kwa bufani bwamina.