Mu Omba-ombiwe mi mu Omba-ombe ba Bañwi

Bakeñisa kuli ha lu si ka petahala, kaufelaa luna lwa kulanga, mi mane ba bañwi ba kulanga matuku a matuna luli. Lu kona ku tiyela cwañi miinelo ye cwalo?

Nto ye ñwi ye kona ku lu tusa ku tiyela miinelo yeo ki ku omba-ombiwa ki ba lubasi lwa luna, balikani ba luna, ni balumeli sina luna.

Haiba mulikanaa luna a ambola ni luna ka musa ni ka lilato, ku swana feela inge kuli u lu fa mulyani o ka lu folisa kuli lu ikutwe hande. (Liprov. 16:24; 18:24; 25:11) Bakreste ba niti ha ba nahanangi kuli ki bona feela ba ba tokwa ku omba-ombiwa. Ba nganga muhato wa “ku omba-omba ni ba bañwi ba ba mwa ñalelwa ya mufuta ufi kamba ufi ka ku omba-ombiwa ko [ba] amuhela ku Mulimu.” (2 Makor. 1:4; Luka 6:31) Bo Antonio, ba ba sebeza sina muokameli wa sikiliti mwa naha ya Mexico, ne ba omba-ombilwe ni ku omba-omba ba bañwi.

Bo Antonio ne ba ikutwile ku lembwala hahulu ha ne ba fumanwi ni butuku bo bu bizwa lymphoma, ili mufuta wa kansa ya mwa mali. Ku si na taba ni kuli ne ba lembwalile hahulu, bo Antonio ne ba likile ka taata ku itiisa. Kamukwaufi? Ne ba hupulanga lipina za Mubuso ni ku opela lipina zeo ilikuli ba nahanisise fa manzwi a lipina zeo. Nto ye ñwi hape ye ne ba omba-ombanga hahulu ne li ku lapela ka ku tumusa ni ku balanga Bibele.

Bo Antonio ba bulela kuli ku si na taba ni lika zeo ze nee ba omba-ombanga, tuso ye tuna ne i zwanga kwa balumeli sina bona. Ba bulela kuli: “Na ni musalaa ka ha ne lu ikutwanga ku lembwala hahulu, ne lu kupanga mutu wahabo luna ili muuna-muhulu mwa puteho kuli a tahe ni ku to lapela ni luna. Ku eza cwalo ne ku lu omba-ombanga mi ne ku lu tusize luli.” Bo Antonio ba zwelapili kuli: “Lwa itumela hahulu kwa tuso ye lu filwe ki ba lubasi lwa luna ni balumeli sina luna, ne lu konile ku tiyela muinelo wa luna.” Bo Antonio ne ba itebuhile hahulu bakeñisa ku ba ni balikani be ne ba ba bonisize lilato ni ku ba tokomela!

Nto ye ñwi ye kona ku lu tusa ha lu li mwa miinelo ye taata ki moya o kenile o lu sepisizwe. Muapositola Pitrosi naa bulezi kuli moya o kenile wa Mulimu ki ‘mpo ye lu filwe feela.’ (Lik. 2:38) Taba yeo ne i bonahezi kuli ki ya niti fa Pentekota ya 33 C.E., ili fo ne ba tozelizwe Bakreste ba bañata. Nihaike kuli Pitrosi naa ama kwa Bakreste ba ba tozizwe, kaufelaa luna lwa kona ku tusiwa ki moya o kenile. Jehova u fa mpo yeo ya moya o kenile ka buñata, kamukwaocwalo, haike mu zwelepili ku kupa moya o kenile ka buñata.—Isa. 40:28-31.

MU IYAKATWE BA BA LI MWA MANYANDO

Muapositola Paulusi naa tiyezi miinelo ye taata, mi mane fokuñwi naa kopani ni miinelo ye libisa kwa lifu. (2 Makor. 1:8-10) Kono Paulusi naa si ka bilaela hahulu kuli naa ka shwa. Naa omba-ombilwe ki ku ziba kuli Mulimu naa mu tusa. Naa ñozi kuli: “Ku lumbekwe Mulimu Ndatahe Mulenaa luna Jesu Kreste, yena Ndate sishemo ni Mulimu ya omba-omba mwa miinelo kaufela, ya lu omba-omba mwa liñalelwa za luna kamukana.” (2 Makor. 1:3, 4) Paulusi naa si ka zwafiswa ki miinelo ye taata ya naa kopana ni yona. Mane miliko ya naa kopana ni yona ne i mu tusize ku utwela ba bañwi makeke, ili nto ye ne mu tusize ku omba-omba hande ba bañwi ka nako ye ne ba kopana ni miinelo ye taata.

Hamulaho wa ku fola, bo Antonio, ne ba kutezi mwa musebezi wa maeto. Kwa makalelo, bo Antonio ne ba bonisanga feela kuli ba iyakatwa balumeli sina bona, kono cwale bona ni bakubona ba ngile muhato o mutuna wa ku potelanga bakuli ni ku ba susueza. Ka mutala, hamulaho wa ku potela Mukreste yo muñwi ya naa kula butuku bo butuna, bo Antonio ne ba lemuhile kuli muzwale yo naa sa tabeli ku fumanehanga kwa mikopano. Bo Antonio ba talusa kuli: “Ne si kuli muzwale yo naa sa lati Jehova ni mizwale, kono muzwale yo naa sa tabeli ku kopana bakeñisa kuli butuku bwa hae ne bu mu tahiselize kuli a ikutwe ku sa ba wa butokwa.”

Nto ye ñwi ye ne ba ezize bo Antonio kuli ba susueze muzwale yo ya naa kula ne li ku mu kupa kuli a lapele ka nako ye ne ku ezizwe kakitinyana. Nihaike kuli muzwale yo naa ikutwa kuli naa sa swaneli ku lapela, a lumela ku eza cwalo. Bo Antonio ba talusa kuli: “Muzwale yo naa lapezi tapelo ye nde, mi hamulaho naa ikutwile hande ku fita mwa naa ikutwela kwa makalelo. Naa ikutwile ku ba wa butokwa.”

Kaniti, kaufelaa luna lwa kopananga ni miinelo ye taata ku si na taba ni fo a fita manyando a luna. Kono sina mwa naa bulelezi Paulusi, haiba lu kopana ni miinelo ye taata, lu ka kona ku omba-omba hande ba bañwi. Kamukwaocwalo, haike lu iyakatwange Bakreste sina luna ka ku ba omba-omba ka nako ye ba kopana ni miinelo ye taata.