Ku Kateleha kwa Pupo ya Jehova

‘Jehova, Misebezi Ya Hao Ki Ye Miñata Cwañi!’

IBE kuli lu pila mwa matakanyani kamba mwa tolopo, mwa malundu a lumbile kamba bukaufi ni liwate, lu potolohilwe ki pupo ye makaza. Ka ku swanela, 2004 Calendar of Jehovah’s Witnesses i na ni maswaniso a mañata a bonisa misebezi ya Jehova Mulimu ye makaza.

Batu ba ba na ni buitebuho kamita ba isize mamelelo kwa misebezi ya Mulimu. Ka mutala, mu nahane Salumoni ya n’a na ni butali bo ne bu “fita butali bwa batu ba ba kwa Upa kamukana.” Bibele i li: “A bulela ni za likota ku kala ka sidare ya kwa Lebanoni, ku isa kwa hisopa ye imelela fa mamota; a bulela ni za lifolofolo za libatana, za linyunywani, ni za ze zamaya ka mba, ni za litapi.” (1 Malena 4:​30, 33) Mulena Davida, ndat’ahe Salumoni, hañata n’a yeyanga misebezi ya Mulimu ye ezizwe ka bukwala. N’a susumelizwe ku bulela ka ku makala ku Mubupi wa hae kuli: “[Jehova, NW], misebezi ya hao ki ye miñata cwañi! Kaufel’a yona i bonahala ku ezwa ka butali; lifasi li tezi maluwo a hao.”​—Samu 104:24. *

Ni luna lu ka eza hande ku nyakisisa pupo. Ka mutala, lu kana lwa ‘talima lihalimu’ ni ku ipuza kuli: “Ya ezize linto zeo ki mañi?” Kaniti luli ki Jehova Mulimu, ya na ni ‘mata a matuna’ ili yo “bulena bwa hae bu tiile”!​—Isaya 40:⁠26.

Ku yeya misebezi ya Jehova ku swanela ku lu tusa cwañi? Ka linzila ze talu. Ku kona: (1) ku lu hupulisa ku itebuha bupilo bwa luna, (2) ku lu susueza ku tusa ba bañwi kuli ni bona ba itute kwa pupo, mi (3) ku lu susumeza kuli lu zibe ni ku itebuha Mubupi wa luna ka ku tala.

Bupilo bwa luna batu bo bu fitela kwahule bwa “lifolofolo ze si na kutwisiso,” bu lu tusa ku nyakisisa ni ku itebuha pupo ye makaza. (2 Pitrosi 2:​12) Meto a luna a kona ku bona naha ye kateleha. Lizebe za luna li kona ku utwa lipina ze munati za linyunywani. Mi kutwisiso ya luna ya nako ni sibaka i kona ku lu hupulisa ze ñata ze tabisa. Nihaike kuli ka nako ye ha lu si ka petahala, kaniti luli lu tabela ku pila!

Bashemi ba kona ku ikola ku bona bana ba bona ha ba tabela pupo. Banana haki mo ba latela ku fumana liketa fa likamba, ku uta limunanu, ku pahama likota! Bashemi ba ka bata ku tusa bana ba bona ku ziba kuli pupo i tahile ka Mubupi. Sabo ni likute ze ba ka ba ni zona kwa pupo ya Jehova li kona ku zwelapili mwa bupilo bwa bona kaufela.​—Samu 111:​2,10.

Mubonelo wa luna ne u ka ba wa makutelakaufi luli ha ne lu ka tabela fela pupo ni ku palelwa ku itebuha Mubupi. Bupolofita bwa Isaya  bu lu tusa ku yeya sisupo seo, ha bu li: “Kikuli ha u si ka ziba? Kamba ha u si ka utwa kuli [Muñ’a] Bupilo ki Mulimu wa kamita, Mubupi wa mafelelezo a lifasi? H’a fokoli, mi h’a katali; ngana ya hae ha ku na ya i kona.”​—Isaya 40:⁠28.

Kaniti, misebezi ya Jehova i paka butali bwa hae bo bu sa koni ku bapanywa, m’ata a hae a sa koni ku likanyezwa, ni lilato la hae le lituna ku luna. Ha lu bona bunde bwa pupo kai ni kai ni ku lemuha tulemeno twa Ya ezize lika zeo kaufela, haike lu susuezwe ku bulela mwa n’a bulelezi Davida kuli: “Ha ku na ya swana sina Wena [Muñ’a] Bupilo,  . . . kwa misebezi, ha ku na ye swana sina ya hao.”​—Samu 86:⁠8.

Lwa kona ku kolwa kuli batu ba ba ipeya ku utwa ba ka zwelapili ku tabiswa ki z’a bupile Jehova. Lu ka ba ni kolo ye sa feli ya ku ituta za Jehova kamita-ni-mita. (Muekelesia 3:11) Mi ha lu nze lu ituta ze ñata za hae, lu ka lata Mubupi wa luna hahulu ni ku fita.

[Litaluso za kwatasi]

[Mbokisi fa likepe 9]

Tumbo ku Mubupi

Buñata bwa ba sayansi ba ba itebuha pupo ba lumela kuli Mulimu ki yena Mubupi. Ki ye mitala i sikai ye bonisa cwalo:

“Kalulo ye ni ituta ya sayansi i banga ye tabisa ka linako ze ni fumananga lika ze nca ni ku ipulelisanga kuli, ‘Kona kuli Mulimu kona mwa n’a ezelize nto ye.’ Se ni bata ki ku utwisisa kalulonyana ye ñwi ya mulelo wa Mulimu.”​—Henry Schaefer, caziba wa za tuto ya chemistry.

“Ka za se si tisa kuli milalambinda i yanduluke, ku itingile kwa kutwisiso ya mubali ku ziba kuli ki nto mañi, kono ne lu si ke lwa kona ku utwisisa mo ku tezi kuli ku be cwalo ha ne lu ka kasheza Yena [Mulimu] kwatuko.”​—Edward Milne, caziba wa za linaleli wa kwa Britain.

“Lwa ziba kuli lipalo ze nde ka ku fitisisa za kona ku talusa mo i tezi pupo kakuli Mulimu ki yena ya n’a bupile lika.”​—Alexander Polyakov, caziba wa lipalo wa kwa Russia.

“Mwa tuto ya luna ka za lika za ka taho lu nyakisisa muhupulo wa Mubupi, ku tekelela milelo ya hae, ni ku taluhanya likezo ze li za Hae isi za luna.”​—Louis Agassiz, caziba wa ze pila wa kwa America.

[Siswaniso se si fa likepe 8]

Gentoo penguins, Antarctic Peninsula

[Siswaniso se si fa likepe 9]

Grand Teton National Park, Wyoming, U.S.A.

[Manzwi a bañi ba siswaniso]

Jack Hoehn/Index Stock Photography