Lipuzo Ze Zwa kwa Babali

Kana ku na ni se si kona ku eziwa haiba Mukreste ya tozizwe u fokozi hahulu mwa mubili kuli u palelwa ku kopana ni puteho fa kupuzo ya Mulalelo wa Mulena?

Ee, ku na ni se si kona ku eziwa mi kwa swanela cwalo ka ku babalela Mukreste ya tozizwe ya fokozi hahulu mwa mubili ili y’o mwendi a sa koni ku zuha fa bulobalo mi kacwalo u palelwa ku fumaneha teñi muta puteho i eza Kupuzo ya lifu la Kreste. Muta ku ba cwalo, sitopa sa maeluda s’a kona ku keta eluda kamba Mukreste yo muñwi ya hulile kwa moya ku iseza mulumeli yo muñwi yo liswanisezo za sinkwa ni veine bona busihu b’o, lizazi li si ka pazula kale.

Ha ku konahala, eluda kamba muzwale yo muñwi yo ya isize liswanisezo, wa kona ku bulela manzwi a makuswani ni ku bala mañolo a swanela. Wa kona ku latelela mwa n’a ezelize Jesu ha n’a tomile Mulalelo wa Mulena. Ka mutala, n’a kana a bala Mateu 26:26, kihona a fa sinkwa se si si na mumela hasamulaho wa tapelo. Ku zwa f’o, muzwale yo ya isize liswanisezo, wa kona ku bala Mateu kauhanyo 26, litimana 27 ni 28, ni ku fa veine hasamulaho wa tapelo ye ñwi. W’a kona ku bulela manzwi a makuswani ka za se i yemela swanisezo ni swanisezo, mi neikaba hande ku kwala ka tapelo.

Kaniti, mutu u swanela ku lika ka mo ku konahalela kaufela kuli a fumanehe kwa mukopano wa puteho wa ku hupula Mulalelo wa Mulena. Kono ki sifi se si konwa ku eziwa haiba muinelo u tatafezi maswe ku eza kuli Mukreste ya tozizwe u kula hahulu, u mwa sipatela, kamba ka butata bo buñwi u palelwa ku fumaneha kwa Kupuzo la Nisani 14 lizazi ha se li likezi? Mukreste ya tozizwe yo wa kona ku latelela taba ye mwa Mulao wa Mushe ili ku hupula Mulalelo kwa mukunda hamulaho wa mazazi a 30.—Numere 9:9-14.