BATU banani mibonelo yeshutana-shutana ka za bupilo ni lifu. Batu babañwi baikutwa kuli habakashwa, bakazwelapili kupila, mi balumela kuli mwendi bakafetuha kuba nto yeñwi kamba bakayo pila kwa sibaka sesiñwi. Babañwi bona baikutwa kuli bakapepwa sinca ni kuba nto isili. Mi babañwi bona baikutwa kuli mutu hashwile, ku yena kufelile.

Mwendi munani mubonelo oshutana ka za taba ye ka kuya ka momuhuliselizwe kamba ka kuya ka sizo samina. Bakeñisa kuli batu banani mibonelo yeshutana-shutana ka za zeezahalanga ku mutu hashwa, kana kunani mutu kamba nto yeñwi yekona kulutusa kufumana likalabo zesepeha ni za niti kwa puzo yekataza hahulu ye?

Ka lilimo zeñata, baeteleli ba bulapeli balutile tuto ya kuli mutu unani moyo osashwi. Buñata bwa batu baba mwa bulapeli bobutumile kaufela, ibe kuli ki Bakreste, Mahindu, Majuda, Mamozilemu, ni likopano zeñwi za bulapeli, balumela kuli kunani moyo osashwi ili oyozwelangapili kupila kwa sibaka sa mioya. Mabuddha bona balumela kuli ka kukuta-kutela kupepwa sinca, maata aanani ona mutu aamukonisa kupila akona kuyo zwelapili kupila kwa sibaka sesinde sesibizwa Nirvana.

Kabakala lituto zeo, batu babañata mwa lifasi bafitile fa kulumela kuli mutu hashwa, uyopilanga mwa lifasi leliñwi. Mi babañata baanga kuli mwa bupilo, kushwa ki kwa butokwa hahulu, mi balumela kuli mulelo wa Mulimu ki wa kuli batu bashwange. Kono Bibele ibulelañi fa taba ye? Muipalele taba yetatama. Kalabo yemukafumana yakona kumikomokisa.