Butuku Bwa Mwa Munahano Bukataza Batu Mwa Lifasi Kaufela
“Ka nako kaufela nibanga ni lipilaelo nihaiba ka nako yenili ninosi mwa muzuzu.”
“Nibanga ni lipilaelo zeñata nihaiba ka nako yeniikutwa hande. Hanitabanga hahulu, nazibanga kuli hamulaho wa nakonyana hape nikaikutwa ‘bulutu.’”
“Nilikanga kuisa pilu kwa lika zeezahala ka nako yeo, kono fokuñwi nikalanga kubilaela ka za lika zeñwi zeñata.”
Litaba ze fahalimu libulezwi ki batu babakatazwa ki butuku bwa mwa munahano. Kana mina kamba mutu yomuñwi yemulata ukatazwa ki butuku bwa mwa munahano?
Muhupule kuli haki mina munosi babakopana ni muinelo wo. Batu babañata kacenu bakatazwa ki butuku bwa mwa munahano, ibe kuli ki bona kamba ki mutu yomuñwi yebalata.
Kusina kukakanya, lupila mwa “linako zetaata, zeziyeza,” ili zetahisa miinelo yemiñata yemaswe. (2 Timotea 3:1) Patisiso yeñwi yeneezizwe ibonisa kuli mutu alimuñwi kwa batu ba 8, ukatazwa ki butuku bwa mwa munahano. Bakeñisa butuku bwa COVID-19, mwa silimo sa 2020, palo ya batu bane bakatazwa ki lipilaelo ni minahano neli yetuna kufita palo ya mwa silimo sa 2019.
Ki kwa butokwa kuziba palo ya batu babakatazwa ki lipilaelo ni minahano kacenu. Kono sa butokwa ni kufita, ki kuziba mo mina ni batu bomulata mukona kubela ni buiketo bwa mwa munahano.
Buiketo bwa mwa munahano ki nto mañi?
Kuba ni buiketo bwa mwa munahano kuama kuikutwa hande ni kueza lika zeswanela. Mutu yanani buiketo bwa mwa munahano wakona kueza misebezi yesakatalisi hahulu, kusebeza ka taata, ni kuikutwa kuli waikola bupilo.
Butuku bwa mwa munahano . . .
-
HAKI bufokoli bwanani bona mutu.
-
KI muinelo otahisanga kuli mutu akone kuikutwa hahulu kulembwala ni kutahisa kuli apalelwe kunahana hande, mi muinelo wo hape ukona kuama maikuto ni mikwa yahae.
-
Muinelo wo hape ukona kutahisa kuli apalelwe kupilisana hande ni batu babañwi ni kueza lika za butokwa mwa bupilo.
-
Muinelo wo ukona kuama batu kaufela, kusina taba ni lilimo zabona, sizo, simuluho yabona, mushobo wabona, bulapeli bwabona, ibe kuli baitutile kamba kutokwa, ibe kuli bafumile kamba ki babotana.
Zekona kutusa batu babakatazwa ki butuku bwa mwa munahano
Haiba mina kamba mutu yemulata akala kubonisa lisupo zecwale ka kusaba ni nako yeñata ya kulobala, kusaca hande, kulembwala ka nako yetelele, kuba ni lipilaelo kamba kufilikana, mwendi mukatokwa kukupa tuso kuli mutatulule butata bo. Kono mukona kukupa kai tuso?
Jesu Kreste, muuna yabutali ka kufitisisa yakile apila fa lifasi, naabulezi kuli: “Batu babaiketile habatokwi mualafi, kono baba mutokwa ki babakula.” (Mateu 9:12) Batu babakula ili babaamuhezi likalafo, bakona kueza lika zeñwi zekona kubatusa kukusufaza kwa lisupo zebonisa kuli bakula, mi bakona kutusiwa kuba ni tabo mwa bupilo. Batu babacwalo habaswaneli kuliyeha kubata likalafo haiba balemuha kuli butuku bwabona buzwelapili kutotobela. a
Nihaike kuli Bibele haki buka ya likalafo, litaba zefumaneha mwateñi zakona kulutusa kuba ni buiketo bobunde bwa mwa munahano. Lumikupa kuli mubale litaba zelatelela ze mwa magazini ye, ili zekona kumitusa kuziba mwakutalimanela ni matata atiswa ki butuku bwa mwa munahano.
a Tawala ya Mulibeleli ye haitalusi mualafelo omuswanela kuitusisanga. Kono mañi ni mañi utokwa kunyakisisa ka tokomelo pili asika eza kale katulo ya ka butu.
Hape Mwendi Mwakona Kutabela Litaba Ze
LITUTO ZA BUTOKWA ZA MWA BIBELE
Ki Kabakalañi Mulimu Hatuhelezi Manyando?
Batu babañata baipuzanga ka za libaka mwa lifasi hakunani hahulu sitoyo ni manyando. Bibele ilufa kalabo yekolwisa ili yeomba-omba.
MUZWELEPILI KUTONA!
Butuku Bwa Mwa Munahano Buzwelapili Kuekezeha ku Babanca—Bibele Ibulelañi fa Taba Yeo?
Mwa Bibele kunani likelezo zekona kutusa babanca babakatazwa ki butuku bwa mwa munahano.
MUZUHE!
Ze mu Swanela ku Ziba ka za Matuku A Mwa Munahano
Mihato ye 9 ya kona ku mi tusa ku talimana hande hahulu ni butuku bwa mwa munahano.
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
