Miinelo yetaata yesweli kuezahala mwa lifasi, ikona kutahiseza batu butata kwa mubili ni mwa munahano. Buñata bwa batu babaziyelizwe hahulu ki miinelo yetaata ye, habahupulangi kuli nako yeñwi miinelo ikaba hande. Baezanga cwañi?

• Babañwi bapalelwanga nihaiba kunahana ka za lika zekaezahala kwapili.

• Babañwi balikanga kufeza lipilaelo zabona ka kunwa bucwala kamba kuitusisa milyani yekola.

• Babañwi baikutwanga kuli ki kokunde kushwa kufita kupila, kacwalo babatanga kuipulaya.

• Yemiñwi ya miinelo yetaata yelukopana ni yona ikona kuba ya nakonyana feela mi yakona kufela ka sipundumukela.

• Nihaike kuli muinelo omutalimana ni ona haukoni kucinca, kunani lika zemukona kueza zekona kumitusa kuli mukone kuutiyela.

• Bibele isepisa lika zekafelisa miinelo yetaata yebakopana ni yona batu.

Bibele ibulela kuli: “Musike mwabilaela za lizazi lelitatama, kakuli lizazi lelitatama litaha ni lipilaelo zalona. Lizazi ni lizazi linani butata bwalona.”—Mateu 6:34.

Musike mwabilaela hahulu ka za lika zekaezahala kwapili kuli mane mupalelwe kueza lika zemuswanela kueza ka nako ya cwale.

Kuikalelwa hahulu ka za lika zemaswe zekona kuezahala kukona kuekeza feela kwa lipilaelo za mina, ni kufokolisa sepo yamina ya za kwapili.

Muñoli yomuñwi wa Lisamu naabulezi ku Mulimu mwa tapelo kuli: “Linzwi lahao ki lambi yemonyehela mahutu aka, ni liseli la mwa nzila yaka.” (Samu 119:105) Munyakisise mo Bibele lona linzwi la Mulimu iswanela ni lambi.

Ka nako ya busihu, lambi ikona kulutusa kuli luzibe folukona kuhata. Ka mukwa oswana, mwa Bibele kunani lituto zekona kulutusa halubata kueza likatulo zetaata.

Lambi ikona kulumonyehela mwa nzila ili kuli lukone kubona ze kwapili. Ka nzila yeswana, Bibele ikona kulutusa kuziba zekaezahala kwapili.