KI LIFI likonkwani zene muitomezi hane musali babanca? Mwendi nemubata kunyala kamba kunyalwa, kuba ni buikoneli bwakueza hande musebezi omuñwi, kamba kukena musebezi omutabela. Kono hañata lika mwa bupilo halibangi sina molunahanelanga kuli lika bela. Miinelo yesika libelelwa yakona kutahisa kuli lika licince. Kona zeneezahezi ku bo Anja, bo Delina, ni bo Gregory.

• Bo Anja, babapila kwa Germany, nebafumanwi ni butuku bwa kansa inze banani lilimo ze 21, mi butuku bo, butahisa kuli basike baikoikonela kupeta nto ifi kamba ifi mwa bupilo.

• Bo Delina, babapila kwa United States, bakatazwa ki butuku bobuñwi (dystonia) bobutahisa kuli lilama za mubili wabona hamohocwalo ni misinga ya kwa booko lisike zabeleka hande. Kwandaa zeo, bo Delina bauta bahulwani babona babalaalu balihole.

• Bo Gregory, babapila kwa Canada, bakatazwa ki butuku bobutuna hahulu bwa mwa munahano.

Kusina taba ni miinelo yebali kuyona yeo, bo Anja, bo Delina, ni bo Gregory, bakonile kutiyela miinelo yetaata yebatalimana ni yona mwa bupilo. Ka mukwaufi?

Lishitanguti leliñwi la mwa Bibele libulela kuli: “Ha u fokola mwa lizazi la ziyezi, maata a hao ki a manyinyani.” (Liproverbia 24:10) Manzwi ao ki a niti: Kuba ni mubonelo omunde ki kwa butokwa hahulu. Kacwalo, haiba mubilaezwa hahulu ki muinelo omuli kuona, mukapalelwa kueza liketo zeka mitusa, kono kuba ni mubonelo omunde ku ka mitusa kueza liketo zeka mitahiseza tabo kusina taba ni muinelo omuli kuona.

Hamunyakise ka mo taba yeo neibezi ya niti ku bo Anja, bo Delina, ni bo Gregory.