Marta, Mbangi ya Yehova yimosi ya ku Guatemala, zu dia Kekchi kalongokaka ngatu kalongesa nsangu za Bibila kwe bantu bazonzaka zu diango. Tilumbu timosi, yandi wamona bakala dimosi dieri dukaka ku lupitalu. Marta bu keri mu talaka, wayizi bakula ti yandi ku mahata me ku miongo ma bazonzaka Kekchi katûka, ku lembo vulu samuninaka Mbangi za Yehova. Buna, Marta wapusana kwe bakala diango mpe wamuzonzela mu Kekchi, mu ndambu yi kazaba.

Marta walomba kwe bakala diango tala ti balendi kongoka Bibila. Na nsayi yayansoni, bakala diango diayizi tambula, ka wamutêla ti ka bâ na mbongo ko zi kaketi mu futa. Marta wamutêla ti ndongokolo ya Bibila na Mbangi za Yehova ofele kwa yena. Yandi wamutêla mpe ti lendi longoka na yandi, mpe na kanda diandi diadiansoni, ku telefone. Bakala diango diayizi tambula. Mu bungu ti Espagnol kazonzaka mpe katangaka, Marta wamuhana La Bible. Traduction du monde nouveau mu zu dia Espagnol. Marta wamuhana mpe buku dia Qu’enseigne réellement la Bible ? Lumingu lwalanda, bakala diango, mukento’andi, na bala bawu ba bole babatika mu longoka Bibila na Marta ku telefone. Marta têle ti: “Mu bungu ti ka ndieri’â tomo zonzaka Kekchi ko, mu Espagnol tweri longokaka, mpe mu bungu dia mukento’andi, yandi beni weri bangulaka misamu mi tweri tâka mu Espagnol. Bala Espagnol ya beri zonzaka.”

Bakala diango pasteur yeri mu dibundu diandi. Yandi wabatika mu longesaka misamu mi keri longokaka mu Bibila kwe bantu ba dibundu diandi. Bantu ba bango bayizi tomo yangalala mu bungu dia misamu mi bayizi wâ mpe bayizi mu yula kwe kayizi bakila ndongosolo zo na môna. Bu kabazonzela ndongokolo’andi ya Bibila, ni babatika mu bâka tintwari na yandi bu keri longokaka. Ntangu fioti ha manima, kampe bantu 15 beri kutakanaka mu longoka Bibila ku telefone na Marta. Ha manima, bayizi tula micro ngatu bantu babansoni batomo wâ.

Marta bu kazonzela ndonkolo yo ya Bibila kwe bakuluntu ba timvuka tiandi, wumosi mu bawu wayenda ku hata dîna di bâka milongoki mia Marta. Yandi watikisa bantu ku tinzonzi tia keti sa munkengi wa tizunga * ku hata dimosi di basaka heure yimosi mu kaminio, mboko mu malu heure zole basaka mu tûla kûna. Milongoki miatambula mu kwenda, mpe bantu 17 bayenda.

Tumingu twayôka ha manima, mukengi wa tizunga na Mbangi za Yehova zakaka bayôkesa bilumbu biyà na milongoki miango. Mu pari, video zizonzelaka Bibila za mu Kekchi beri talaka mu jw.org, mpe mukanda wa Banani batasarila luzolo lwa Yehova mu ntangu yawu yi e? beri longokaka. Ha manima midi, video za JW Télédiffusion beri talaka. Munkengi wa tizunga wasa mpe ti muna mulongoki kabâ na mulongi’andi ya yandi beni.

Mu bilumbu bio bia biyà, Mbangi za yehova zayizi samuna mpe mu mahata ma tizunga me penepene na mahata ma Kekchi; mpe bayizi tikisa bantu ngatu bizi ku lukutakanu lumosi lwa nzitukulu. Ku lukutakanu lwango, bampangi bayizi lomba kwe bantu 47 mu longoka Bibila. Makanda 11 mayizi tambula mu longoka Bibila.

Ngonda zayoka ha manima, bakuluntu batika mu saka tukutakanu samedi peleko dimanche za tumingu twatwansoni. Bwawu bu, bantu kampe 40 bakwizaka ku tukutakanu ntangu zazansoni. Mpe mu ntangu bampangi bayizi sa Mbambukulu moyo ya lufwa lwa Yezu, nsayi yayingi yabâ nawu bu bamona bantu 91 bayiza ku Mbambukulu.

Bu kabambukaka bwe musamu wo wabatikila mpe bwe wakurila, Marta têle ti: “Matondo mamingi nivutulaka kwe Yehova. Ntangu zakaka nibanzaka ti ka ndedi’â nasala tisalu tiatingi ko. Kâ, beto bisalulu kwa biena mu moko ma Nzambi. Yandi wazaba nti biabâ mu mitima mia bantu bô, mpe ni kababenda mu kanda diandi. Yehova bawu kazololo.”