Nze una olongokele mu finkanda fiafi, Bibila kina ye nkanikinu miayingi milenda kusadisa kumosi ye esi nzo aku. Yave ozolele vo wakala ye kiese. Osianga nsilu vo kele vo osidi nsambila andi va fulu kiantete, “e lekwa yayi yawonso ikunukudikilwa.” (Matai 6:33) Ozolele vo wakala nkundi andi. Sadila konso lau mu vanga kikundi yo Nzambi. O kala nkundi a Nzambi i lau diampwena o muntu kalenda vwa.—Matai 22:37, 38.

ADIEYI BIBILA KIVOVANGA? ‘Omono ikala ese kwa yeno, oyeno nukala wan’ame amakala ye amakento, u kavovele Yave.’ (2 Korinto 6:18) Yave ozolele vo wakala nkundi andi. E sambu kilenda kusadisa mu vwa lau diadi. Yave ozolele vo ‘wasambanga ntangwa zawonso.’ (1 Tesalonika 5:17) Yave ozolele mpe zaya ngindu zaku ye mana mekutokanesanga. (Filipi 4:6) Vava osambanga y’esi nzo aku, yau bebakula vo obadikilanga Nzambi vo muntu akieleka.

Kumokena kaka ko yo Nzambi, kansi unlemvokelanga mpe. Olenda wo vanga muna longokanga Diambu diandi ye nkanda misasilanga Bibila. (Nkunga 1:1, 2) Vaulanga e ntangwa mu badika mana olongokanga. (Nkunga 77:11, 12) Muna lemvokela Nzambi divavanga mpe vo wendanga muna tukutakanu twa Kikristu.—Nkunga 122:1-4.

O vovela Yave kw’akaka i mpila yakaka yamfunu ya siamisina ngwizani aku yo yandi. Ekolo ovanganga wo, okumika ngwizani aku yo yandi.—Matai 28:19, 20.

ADIEYI OLENDA VANGA?

• Vaulanga e ntangwa ya tanga Bibila yo samba konso lumbu

• Yeno awonso mu nzo nusia mambu ma mwanda va fulu kiantete

ADIEYI BIBILA KIVOVANGA? “Nufinama Nzambi, oyandi mpe okunufinama.” (Yakobo 4:8) Vanga programa ya nsambila y’esi nzo yo sadila yo. (Etuku 18:19) Kansi, ediadi ke diau kaka ko divavwanga. Nufwete yambula vo Nzambi kafila zingu kieno. Wau vo nu esi nzo, nukumika ngwizani eno yo Nzambi muna kumvovelanga ‘vava nufongele muna nzo yovo se nukiya yovo leka yovo sikama.’ (Nsiku 6:6, 7) Nutanginina Yosua ona wavova vo: “Vo i mono y’esi nzo ame, Yave tusadila.”—Yosua 24:15.

ADIEYI OLENDA VANGA?

• Kala ye programa ya longa yo lungisa nsatu za konso muntu muna nzo