Zasoneka Luka 7:1-50
7 Vava kafokwele vova mambu kwa nkangu, okotele muna Kafanau.
2 Ntaudi mosi a mfidi a makesa, ona ketoma zolanga, oyelele, se kefwa.+
3 Vava kawidi nsangu mu kuma kia Yesu, otumini akuluntu a Ayuda bandodokela keza vuluza ntaudi andi.
4 Balweke kwa Yesu, bayantikidi kundodokela, bavovele vo: “Muntu ndioyo wafwana kikilu mu tambula lusadisu lwaku,
5 kadi zula kieto kezolanga, yandi watunga e sambilu dieto.”
6 O Yesu wele yau. Kansi vava kafinama vana nzo, o mfidi a makesa otumini akundi andi bamvovesa vo: “E Mfumu, kuyivangi mpasi ko, kadi kiafwana ko wakota kuna nsi a nludi ame.+
7 I kuma ngindulwidi vo omono kibeni kifwene kwiza koko wina ko. Vova kaka e diambu, o ntaudi ame kasasuka.
8 Kadi omono mpe kunsi a wisa ngina, ngina mpe ye makesa ituminanga, avo mpovele kwa mosi vo: ‘Wenda!’ wele, kwa wankaka vo: ‘Wiza!’ wizidi, ye kwa ntaudi ame vo: ‘Vanga edi!’ ovangidi dio.”
9 Yesu vava kawidi mambu mama, osivikidi muntu ndioyo, ovilukidi kwa ndonga ina inlende, ovovele vo: “Inuvovese vo, kana nkutu muna Isaele, kiasolwele muntu ko una ye lukwikilu lwanene nze lwalu.”+
10 Awana batumwa vava bavutukidi kuna nzo, bawene o ntaudi osasukidi.+
11 Ke vavioka kolo ko, wele muna mbanz’a Naini, alongoki ye ndong’ayingi bele yandi kumosi.
12 Vava kafinamene vana vitu dia mbanza, omwene muntu wafwa onatwanga, i mwana mosi kaka wa ngudi andi,+ wa nkento wafwilwa yakala. Ndong’ayingi itukidi muna mbanza ikedi yandi.
13 O Mfumu vava kamwene, umfwididi e nkenda,+ umvovese vo: “Yambula o dila.”+
14 Wizidi finama kipoyo kia mvumbi, osimbidi kio, anati baningamene. I bosi, ovovele vo: “E toko, ivovese vo, telama!”+
15 O mvumbi ovumbukidi, oyantikidi o vova. Yesu umvene kwa ngudi andi.+
16 Awonso babakamene wonga, bakembelele Nzambi, oku vo: “Ngunza anene obundumukini ova twina,”+ “O Nzambi ovutwidi e sungididi kiandi kwa nkangu andi.”+
17 E nsangu zazi mu kuma kiandi, zimwangane muna Yuda yawonso ye muna zunga kiawonso.
18 Alongoki a Yoane bansamunuini mambu mama mawonso.+
19 O Yoane obokele alongoki andi wole, ubatumini kuna kwa Mfumu, bayuvula vo: “Nga ongeye i Ndiona okwiza,+ yovo wankaka tuvingila?”
20 Vava balweke kwa yandi, bavovele vo: “O Yoane wa Mvubi ututumini kwa ngeye, twayuvula vo: ‘Nga ongeye i Ndiona okwiza, yovo wankaka tuvingila?’”
21 Muna ola yoyo, owukidi wantu ayingi bakedi ye yimbevo,+ yimbevo yangolo yo vaikisa mianda miambi yo temona meso ma mpofo zayingi.
22 Ubavutwidi vo: “Nuenda samuna kwa Yoane mana numwene ye mana nuwidi: Ampofo mu mona bena,+ e mbevo za malu mu diata zina, akwa wazi mu veleleswa bena, afwa-matu mu wá bena,+ o mafwa mu fulwa mena, asukami mu samunuinua bena e nsangu zambote.+
23 Kiese kwa ndiona olembi tá sakuba mu kuma kiame.”+
24 Awana batumwa kwa Yoane, vava bayenda, Yesu oyantikidi samuna mambu ma Yoane kwa ndonga vo: “Nki nuele tala kuna makanga? E tutu divuembeswa kwa tembw’e?+
25 Ozevo, nki nuele tala? Muntu ovuete mvuatu miantalu e?+ Kadi, awana bavuete mvuatu miantalu ye bezingilanga muna umvuama, muna lûmbu lwa atinu bena.
26 Ozevo, nki nuele tala? Ngunza? Elo, inuvovese vo, o muntu nuele tala osundidi o mfunu ke mu ngunza ko.+
27 Diasonama mu kuma kiandi vo: ‘Tala! Ntwikidi ntumw’ame kuna ntwal’aku,* ona okukubikila e nzila kuna ntwal’aku.’+
28 Inuvovese vo, vana vena awana bawutwa kw’akento, ke vena mosi ko osundidi Yoane onene, kansi ndiona wandwelo muna Kintinu kia Nzambi osundidi Yoane onene.”+
29 (Vava nkangu awonso ye avakulwisi a mpaku bawidi wo, balungisi Nzambi, kadi mu mvub’a Yoane bavubilwa.+
30 Kansi, Afarisi ye awana batomene zaya o Nsiku, babembola luludiku luna Nzambi kavana kwa yau,+ wau balembi vubwa kwa yandi.)
31 “Aki nani ndenda tezanesa ye wantu a mbandu yayi? Aki nani bafwananene yau?+
32 Bena nze yingiana-ngiana bavuende vana zandu bebokaziananga, oku vo: ‘Tunusikidi e matutu, kansi ke nukinini ko; tunubongele mbembo, kansi ke nudididi ko.’
33 Diau dimosi mpe, Yoane wa Mvubi wizidi, yandi kadie mbolo, ngatu nua vinyu,+ oyeno nuvovele vo: ‘Nkuya kena wau.’
34 O Mwan’a muntu wizidi, odidi, onuini, kansi oyeno nuvovele vo: ‘Tala o nkwa loko, nduvu a vinyu, nkundi wa avakulwisi a mpaku ye asumuki!’ +
35 Kansi, e ngangu zilungisilwanga muna wan’andi* awonsono.”+
36 Mfarisi mosi undodokele kenda dia yandi. Wele muna nzo a Mfarisi, ovuende vana meza.
37 Nkento mosi wakala muna mbanza, wazayakana vo nsumuki, vava kazeye wo vo Yesu odianga muna nzo a Mfarisi, onete mbwata* ya mazi mansunga.+
38 Otelamene kuna nima, kuna kafididi malu mandi, odididi, oyantikidi yondeleka o malu mandi muna mansanga, yo kungunuina mo muna nsuki zandi. Ofibulwidi mpe malu mandi, okusidi mo mazi mansunga.
39 O Mfarisi ona umbokelese, vava kamwene wo, ovovele muna ntim’andi vo: “O muntu ndioyu kele vo kakala ngunza, wadi wo zaya vo nkento ndioyu okunsimbanga, nsumuki.”+
40 Kansi, o Yesu umvutwidi vo: “E Simone, diambu ngina diau nzolele kusamunuina.” Ovovele vo: “E Nlongi, vova kwaku!”
41 “Nsompeki mosi wakala ye wantu wole bandia e mfuka; o mosi, mfuk’a 500 za denali* kakala yau, kansi wankaka 50.
42 Wau ke bena y’eki bafuta ko, ubayambulwidi e mfuka yau awole. Nga nani otoma kunzola vana bena?”
43 Simone ovutwidi vo: “Muna ngindu zame, ndiona kayambulwila nzimbu zayingi.” Umvovese vo: “Otomene vutula.”
44 Ovilukidi kwa nkento, ovovele kwa Simone vo: “Omwene nkento ndioyu e? Nkotele mu nzo aku; ngeye kumpani maza ma sukula malu. Kansi oyandi, muna mansanga i kayondelekele malu mame, yo kungunuina mo muna nsuki zandi.
45 Ongeye kumfibidi ko, kansi oyandi, tukamena kakotele mo, kayambwidi fibulula malu mame ko.
46 Ongeye kukusidi ntu ame mazi ko, kansi oyandi mazi mansunga kakusidi mu malu mame.
47 Muna kuma kiaki, isamunuini vo, o masumu mandi kana una vo mayingi,* malolokelo,+ e kuma kadi, zola kwayingi kasongele. Kansi, ona ololokelo ndolok’akete, nzol’akete kaka kasongele.”
48 I bosi ovovele kwa nkento vo: “O masumu maku malolokelo.”+
49 Awana bavuende yandi vana meza bayantikidi vovana vo: “Nani ndioyo ololokanga masumu?”+
50 Ovovele kwa nkento vo: “Lukwikilu lwaku luvulwizi;+ wendela kuna luvuvamu.”
Mvovo vana yand'a lukaya
^ Mvovo wa sina: “oku ndose aku.”
^ Yovo “mavangu mandi.”
^ Mvovo wa sina: “mbwat’a alabasta.” Tala Nsas’a Mvovo. “Alabasta.”
^ Yovo “mampwena.”
