EKUMA AKAKA BEKATIKISILANGA? Kana nkutu vava bevwanga mfunu wa lufiaulwisu, ayingi beyindulanga vo ke diansongi ko mu lomba lusadisu kwa Nzambi muna zizidila e mpasi benwananga zau. Nkento mosi oyikilwanga vo Raquel wavova vo: “Vava imonanga ulolo wa mpasi benwananga zau wantu ova nza, imonanga vo e mpasi zame zakete kwandi. Ekiaki i kuma ikatikisilanga lomba lusadisu kwa Nzambi.”

NKAND’A NZAMBI ADIEYI ULONGANGA? Nzambi osadisanga yo fiaulwisa wantu mu mpil’esivi. Wantu awonso va ntoto asumuki, e sumu i kimbevo kilembi sasuka eki kifilanga wantu mu lembi vanga luzolo lwa Nzambi una ufwene. Kana una vo i wau, Nzambi ‘watuzola, watuma mpe o Mwan’andi [Yesu Kristu], muna lembeka masumu meto.’ (1 Yoane 4:10) Muna kimenga kia lufwa lwa Yesu, Nzambi wateta e nzila kimana twalolokwa masumu, twakala ye ntona zavelela ye vuvu kia zinga yakwele mvu muna nz’ampa ya luvuvamu. * Nga kimenga kiaki ke sinsu kia nzol’a Nzambi ko muna ngeye?

Badika e nona kia Paulu wa ntumwa. Vava kabakula e nsas’a kimenga kia Yesu, wasoneka vo: ‘Ngin’o moyo mu kuma kia lukwikilu lwame muna Mwan’a Nzambi, ona wanzola, wakiyekola mu kuma kiame.’ (Ngalatia 2:20) Kieleka, Yesu wafwa vitila Paulu kakituka Nkristu. Kansi, Paulu wabadikila kimenga kia Yesu vo i lukau lwa Nzambi kwa yandi.

E kimenga kia Yesu i lukau lwa Nzambi mpe kwa ngeye. Lukau lwalu i ziku kisonganga vo Nzambi mfunu kikilu kekuvwanga. Lukau lwalu lulenda kutwasila ‘lufiaulwisu lua mvu ya mvu, ye vuvu kiambote . . . yo kusikidisa muna salu yambote, yo mambu mawonso mambote.’—2 Tesalonika 2:16, 17.

Yesu wavana moyo andi se kimenga vioka 2.000 ma mvu. Adieyi Nzambi kevanganga o unu mu songa vo ozolele kala ye ngwizani ambote yo ngeye?