Mose wa ngunza wavova vo avo tulemvokele nkanikinu mia Nzambi, sambulwa tusambulwa. (Nsiku 10:13; 11:27) Ke tulemvokelanga kaka Nzambi ko mu kuma kia venga e tumbu. E fu ya Nzambi ikutufilanga mu kunlemvokela kadi zola tukunzolanga ye ke tuzolele vanga diambu ko dilenda kunkendeleka. “E nsas’a zola Nzambi i yau yayi: twalemvokelanga nkanikinu miandi.”—1 Yoane 5:3.

Kansi, aweyi tuvuilanga e nsambu vava tulemvokelanga Nzambi? Yambula twavovela mpila zole.

“Omono Yave, mono i Nzambi aku, Ndiona okulonganga muna wete diaku, . . . okufilanga muna nzila ina ofwete diatila.”—YESAYA 48:17.

Yave wa Nzambi una vo i Mvangi eto, otomene kutuzaya ye okutuvananga luludiku tuvuidi o mfunu. Avo tuzolele vo malongi mandi matusadisa mu baka e nzengo zambote, tufwete longokanga mana masonama muna Sono Yavauka kimana twazaya mana Nzambi kazolele vo twavanga yo sadila mo.

“Akwa kiese awana bewanga e diambu dia Nzambi yo lunda dio!”—LUKA 11:28.

O unu, ulolo wa wantu ana belemvokelanga mana masonama muna Diambu dia Nzambi bena ye kiese kiakieleka. Kasikil’owu, badika e nona kia muntu mosi ozingilanga kuna Espanha, ona wakala ye fu kia funga makasi mu nzaki yo bamina akaka kumosi yo nkaz’andi. Lumbu kimosi, watanga mana Mose wa ngunza kasoneka mu kuma kia lulembamu lwa Yosefe wa mwan’a Yakobo. Yosefe watekwa se mbundu yo siwa mu pelezo kondwa kuma. Kana una vo i wau, wakwamanana songa lulembamu, tatidila luvuvamu yo loloka akaka. (Tuku kapu kia 37-45) O muntu ndioyo ozingilanga kuna Espanha wavova vo: “O badika e nona kia Yosefe diamfila mu songa e fu nze lulembamu, nkenda ye volo. Owau, ngina ye zingu kiakiese.”

E Sono Yavauka ikutuvananga tuludiku twayingi muna mpila tufwete kadilanga ye akaka. E longi dilende ditoma vovela e diambu diadi.