YINDULA vo muna nzila ya tombe okangalelanga. Kana una vo kuma kolo kubwitidi, kuna yo wonga wa vila ko kadi mini una kiau vana koko. Avo ominikini vana osia o kulu, omwene vana vau e lekwa ina vana ndambu. Avo ominikini kuna ntwala, o ntemo a mini kiaki ukusonga e nzila okwendanga yo mona kana nkutu kuna vala.

O Nkand’a Nzambi ulenda tezaneswa ye mini kiaki. Nze una tulongokele muna malongi mavitidi, Diambu dia Nzambi dilenda kutusadisa mu zizidila e mpasi za lumbu ke lumbu tunuananga zau mu nza yayi. Kansi, Nkand’a Nzambi mayingi diaka uvanganga. Ukutuzayisanga mpe mana mevangama kuna sentu. Ediadi dikutusadisanga mu mona yo landa e nzila ikututwasila zingu kiakiese. (Nkunga 119:105) Mu nkia mpila?

Tubadika mpila zole zina Nkand’a Nzambi ukutuvaninanga vuvu kiakieleka kia kusentu: 1 Ukutusadisanga mu kala ye kani diasikila muna zingu, 2 Ukutulonganga una tulenda kadila ye kikundi kiakwele mvu yo Mvangi eto.

Nkand’a Nzambi ukutuvananga malongi mambote malenda kutusadisa mu zizidila e mpasi. Nkand’a Nzambi mayingi uvanganga, ke vana kaka lusadisu ko muna mambu ma zingu. Vana fulu kia kutukasakesa mu sia kaka e sungididi muna ntokani ye zolela ya yeto kibeni, Nkand’a Nzambi ukutulonganga twasia e sungididi muna diambu disundidi o mfunu muna zingu. Mu mpila yayi tulenda kadila ye kiese kiakielela muna zingu.

Badika o nkanikinu owu wa Nkand’a Nzambi: “Edi disundidi e kiese dia vana, ke mu tambula ko.” (Mavangu 20:35) Nga osungamene e lumbu wasadisa muntu wakala mu mpasi? Nga watamba kala matu kwa nkundi aku ekolo kazayisanga e ntokani zandi?  Nga kumonanga kiese ko vava ovevolanga e mpasi za muntu ankaka?

Kiese kiayingi tukalanga kiau vava tukayilanga akaka lembi vingila vo yau mpe batukayila. Nsoneki mosi wavova vo: “Ke dilendakana ko dia kayila akaka lembi vingila vo watambula lutila nkutu ina bavene nanga vo wavanina kuna mvevo lembi vingila konso nsendo.” Kansi, vava tusadisanga akaka, musungula awana ke balendi kutuvulwila konso lekwa ko, nsendo tubakanga. Tuyambulanga sia e sungididi muna zolela ya yeto kibeni. Vava tusadisanga akaka, ntwadi tusalanga yo Mvangi eto ona obadikilanga e mbote tuvanganga kw’akaka nze lekwa tusompekele kwa yandi. (Ngana 19:17) Nzambi oyangalelanga mana tuvanganga muna sadisa asukami. Osianga o nsilu wa kutuvana moyo a mvu ya mvu muna paradiso ova ntoto. Ekwe nsambu tulenda vua kuna sentu!—Nkunga 37:29; Luka 14:12-14. *

Edi disundidi o mfunu, Nkand’a Nzambi ukutulonganga vo tulenda kala ye kani diasikila muna zingu avo tusambidi Yave wa Nzambi aludi. E Diambu diandi dikutukasakesanga vo twamvana nkembo, zitu yo nlemvo una umfwanukini. (Kimpovi 12:13; Lusengomono 4:11) Avo tuvangidi wo, tulungisa diambu diamfunu kikilu: Tumwesa Mvangi eto e kiese. Nzambi okutuvovesanga vo: “Kala ye ngangu wamwesa ntim’ame kiese” (Ngana 27:11) Yindula diambu edi: Vava tubakanga nzengo zambote zina e ngwizani ye nkanikinu mia Nkand’a Nzambi, tuyangidikanga o ntim’a Se dieto dianzodi kuna zulu. Ekuma? E kuma kadi mfunu kekutuvuanga, ozolele vo twalemvokela nkanikinu miandi kimana twakala ye kiese. (Yesaya 48:17, 18) Kieleka, nkia diambu disundidi o mfunu muna zingu avo ke sambila Mfumu a nsema wawonso ko yo vanga mana mekunyangidikanga?

Nkand’a Nzambi ukutuvovesanga mpe vo twavanga kikundi yo Mvangi eto. Tutanganga vo: “Nufinama Nzambi, oyandi mpe okunufinama.” (Yakobo 4:8) Ezak’e ntangwa tulenda katikisa kana vo tulenda kikilu kala akundi a Mvangi a nsema wawonso. Kansi, Nkand’a Nzambi ukutusianga nsilu vo avo ‘tuvava Nzambi, tukunsolola’ kadi “kavavukidi konso muntu omu yeto ko.” (Mavangu 17:27) O lemvokela e longi dia Nkand’a Nzambi dia vanga kikundi yo Nzambi mfunu kikilu dina muna vua moyo a mvu a mvu. Mu nkia mpila?

Yindula diambu edi: Kana nkutu nkia ngolo tukala zau, ke mosi ko mu yeto olenda venga emvimba o mbeni ambi ansuka, i sia vo, lufwa. (1 Korinto 15:26) Kansi, Nzambi ozinganga yakwele mvu. Kalendi fwa ko. Ozolele vo akundi andi mpe bazinga yakwele mvu. Nkand’a Nzambi uyikanga luzolo lwa Yave mu kuma kia awana bekumvavanga mu mvovo emi: “E ntima mieno mizinga yakwele mvu.”—Nkunga 22:26.

Adieyi tulenda vanga mu kala akundi a Nzambi yakwele mvu? Kwamanana longoka mu kuma kiandi muna Nkand’a Nzambi. (Yoane 17:3; 2 Timoteo 3:16) Lombanga lusadisu lwa Nzambi kimana wabakula e Diambu diandi. O Nkand’a Nzambi ukutuvovesanga vo avo ‘tukwamanana lomba e ngangu kwa Nzambi,’ okutuvana zo. * (Yakobo 1:5) Sianga e ngolo za sadila mana olongokanga yo yambula vo Diambu dia Nzambi diakala se “mini kia tambi [yaku], yo ntemo a mayendelo [maku]” tuka owau yakwele mvu.—Nkunga 119:105.