Yesu zabisaka banlonguki na yandi ti: ‘Beno kevuanda bambangi na munu. . . tii na kisika yina meluta ntama na ntoto.’ (Bisalu 1:8) Bubu yayi, Bambangi ya Yehova kena kukokisa kiyekua yango na vema nionso. Kasi na bitini yankaka ya ntoto, buela diaka na bizunga yina kele na bantu mingi, baka ntete ve kimbangi. Mpe bayinsi yankaka kele kaka na Bambangi ya Yehova fioti (Matayo 9:37, 38) Yinki beto kesalaka samu beto samunina bantu mingi?

 Samu na kuzitisa ntumu ya Yesu, komite ya kisalu ya Kimvuka ya Ntuadisi ya Bambangi ya Yehova ketindaka bamisionere na baterituare yina kele na nsatu ya bansamuni. Bubu yayi, yakele na bamisionere 3 090 yina kele na baterituare na yinza ya mvimba. a Mingi kati na bau bakaka formasion na bakalasi ya Biblia, lokola kalasi ya bamuangisi nsangu ya Kimfumu. Bamisionere kele pene ya kubika bayinzo na bau samu na kukuenda na babuala ya kinzenza. Na mayele na bau, formasion na bau, mpe mambu yina bamezaba, bamisionere yango kena kumuangisa nsangu ya mbote mpe bakele bifuani ya mbote samu na banlonguki ya yimpa.

 Na konso Betele, biro ya Departema ya kisalu kesalaka kintuadi na komite ya filiale samu na kulandila bansatu ya bamisionere, lokola kisika bafueti vuanda, mavimpi na bau, mpe mbongo samu na kukokisa bansatu yankaka. Na mvula ya kisalu ya 2020, Bambangi ya Yehova salaka depanse ya badolare kana 27 milion (U.S.) samu na mambu metadila bamisionere. Na mutindu yina nde, bamisionere lenda tula dikebi mpe ngolo na bau nionso na kisalu ya kusamuna, ata mpe samu na kukindisa bimvuka yina kele na baterituare na bau.

 Yinki mutindu bamisionere yina kele na baterituare kena kubaka mambote na kisalu ya kusamuna? Frank Madsen, yina kesalaka na komite ya fialiale ya Malawi metuba: “Na kibakala mpe makoki na bau, bamisionere kena kusadisa bimvuka babanda kusamuna na baterituare yina kele mpasi, lokola gated communities mpe bizunga yina ketubaka ndinga ya kinzenza. Katula yau, bakesalaka ngolo samu na kulonguka ndinga ya buala ya terituare yina bakele mpe nzingulu na yau, yakele mpenza kifuani samu na bampangi yankaka, mpe kikadulu na bau kena kutinda bayankaka bakukipesa na kisalu ya ntangu nionso. Beto mepesa Yehova matondo samu na bamisionere yina kele na baterituare.”

 Mpangi ya komite ya filiale ya buala yankaka metuba: “Bamisionere kele bifuani yina kena kumonisa ti Bambangi ya Yehova ya yinza ya mvimba kele na bumosi. Ata bantu yina kele Bambangi ya Yehova ve lenda mona puelele ti beto kebikaka ve banzingulu na beto kabula beto, kasi malongi ya Biblia sadisaka beto kuma dibuta yina kele na bumosi.”

 Yinki mutindu bamisionere kena kusadisa bansamuni yina kele na baterituare na bau? Paulo, na buala ya Timor-Leste, kesepelaka na biyekua yina bamisionere kele na yau na kimvuka. Yandi metuba: “Terituare na beto kele mpenza na shalere. Kasi atako bamisionere yango kekatukaka na babuala yina kele madidi, bakebikaka ve ti shalere pekisa bau basamuna. Bakekuizaka ntangu nionso na balukutakanu ya kisalu ya kusamuna. Bakevutukilaka bantu mbala na mbala na bayinzo na bau na kati kati ya kilumbu, ntangu yina shalere kevuandaka mpenza ngolo, ata mpe na nkokila. Bamesadisa bantu mingi bazaba kedika, mpe munu kele kati na bantu yango. Samu na vema mpe kiese na bau, bakesadilaka luzingu na bau nionso samu na kusadila Yehova, mpe yaketindaka kimvuka ya mvimba sadila yandi na vema.”

 Ketti, yina kele mpasudi nzila ya ngonda na ngonda na Malawi, kena kutubila mutindu bankuelani mosi yina kele bamisionere sadisaka dibuta na yandi: “Ntangu bankuelani yango kuizaka na kimvuka na beto, munu vuandaka kaka munu mosi Mbangi ya Yehova na dibuta na munu. Kasi bankuelani yango pesaka munu lusadusu ya mbote, mpe bakumaka zola dibuta na munu. Kifuani na bau ya mbote sadisaka bana na munu samu bamona mutindu kusadila Yehova kenataka mambote na luzingu. Na nzila ya kikadulu ya mbote ya bamisionere, bana na munu tatu ya banketo kena kusadila Yehova lokola bampasudi nzila ya ngonda na ngonda mpe bakala na munu bandaka kukuenda na balukutakanu.”

 Wapi kekatukaka mbongo yina kelombamaka samu na kusadisa bamisionere? Na nzila ya makabu yina kekatukaka na yinza ya mvimba, mingi kati na yau kepesamaka na mayele yina kele na donate.isa4310.com. Beto kesepelaka mpenza na makabu na beno yina beno kepesaka na ntima ya mvimba.